ރައީސުލްޖުމްހޫރިއްޔާގެ ތަރުޖަމާން މުޙައްމަދު މަބްރޫކް ޢަޒީޒް ބާއްވަވާ ނޫސްވެރިންގެ ބައްދަލުވުމެއް މިއަދު އޮންނާނެއެވެ. މިނިއުސް ކޮންފަރެންސް އޮންނާނީ މިއަދު މެންދުރު ފަހު 14:30 ގައި ކަމަށެވެ. މިއީ ރައީސުލްޖުމްހޫރިއްޔާގެ ތަރުޖަމާނަކަށް މުހައްމަދު މަބްރޫކް އަޒީޒު ޢައްޔަންކުރެއްވި ފަހުން ބާއްވަވާ ފުރަތަމަ ނޫސްވެރިންގެ ބައްދަލުވުމެވެ.
ރައީސުލްޖުމްހޫރިއްޔާގެ އޮފީހުން ސިލްސިލާ ނޫސްވެރިންގެ ބައްދަލުވުންތަކެއް ބޭއްވުމަށް ނިންމަވާފައިވާ ކަމަށް މަބްރޫކްވަނީ ވިދާޅުވެފައެވެ. އެގޮތުން ތަރުޖަމާނަކަށް ވަޑައިގަތުމަށްފަހު ރައީސުލްޖުމްހޫރިއްޔާއާއި މަޝްވަރާކުރައްވަވާ މަބްރޫކް ވިދާޅުވެފައިވަނީ މައުލޫމާތު ފޯރުކޮށްދިނުމުގެ އިންތިޒާމުތައް ހަރުދަނާކޮށް އިތުރަށް ކުރިއެރުވައި މީޑިއާއަށް މައުލޫމާތު ފޯރުކޮށްދިނުން ކުރިއަށްވުރެ ފަސޭހަކުރައްވާނެކަމަށެވެ.
މީގެ އިތުރުން ރައީސް އޮފީހުގެ ޚަބަރާއި މަޢުލޫމާތު ގެނެސްދިނުމަށް ހުރިހާ މީޑިއާ ތަކުންވެސް އެކަމަށް ޚާއްސަ ނޫސްވެރިން ކަނޑައަޅައި ޕްރެސް ޓީމެއް އެކުލަވާލަން ނިންމާފައިވާކަންވެސް މަބްރޫކް ވަނީ ހާމަކުރައްވާފައެވެ. ސިލްސިލާ ގޮތެއްގައި ރައީސުލްޖުމްހޫރިއްޔާގެ އޮފީހުން މީޑިއާއާއި ބައްދަލުކޮށް މަޢުލޫމާތު ދިނުމަށް ނިންމަވާފައިވާއިރު، މިއީ ރައީސް އޮފީހުގެ ތާރީޚްގައިވެސް ސިލްސިލާ ގޮތެއްގައި މީޑިއާއަށް މަޢުލޫމާތު ދެއްވުމަށް ނިންމެވި ފުރަތަމަ ފަހަރެވެ.
ދާއިމީގޮތެއްގައި ސިލްސިލާ މީޑިއާ ބައްދަލުވުންތަކެއް ރައީސުލްޖުމްހޫރިއްޔާގެ އޮފީހުން ބޭއްވުމަށް ނިންމެވި ތާރީޚީ ނިންމެވުމަކީ މަބްރޫކް ރައީސް އޮފީހުގެ ތަރުޖަމާނަކަށް ވަޑައިގެން ނިންމެވި ނިންމެވުމެކެވެ. މިއާއެކު ޢާންމުންނާއި މީޑިއާއިން ބޭނުންވާ މަޢުލޫމާތު ފަސޭހަކަމާއެކު ލިބޭނެކަމާމެދު ކުރާ އުންމީދުވަނީ ބޮޑުވެގެން ގޮސްފައެވެ. އެއީ ރައީސުލްޖުމްޙޫރިއްޔާގެ އޮފީހުގެ ސްޕޯކްސްޕަރސަންގެ މަޤާމަށް މަބްރޫކް އައްޔަންކުރައްވައިފިނަމަ އެއީ ލިބިގެންދާނެ ވަރަށްބޮޑު ފަސޭހައެއްކަމުގައި މީގެކުރިން ނޫސްވެރިންގެ މެދުގައިވެސް ވާހަކަދެކެވިފައިވާތީއެވެ.