އިޖުތިމާޢީ އަދި ޢާއިލީ ގުޅުމުގެތެރެއިން ބޮޑުވުމުގެ ފުރުޞަތު ދިނުމަށްޓަކައި، ދައުލަތުން ބަލަހައްޓަމުންދިޔަ 11 ކުއްޖަކު، ފުވައްމުލަކު ސިޓީގައި ޤައިމުކޮށްފައިވާ އަމާން ވެށްޓަށް ބަދަލުކޮށްފިއެވެ. މިއާއެކު ދައުލަތުން ބަލަހައްޓަކުންދާ ކުދިންގެ ތެރެއިން މިހާތަނަށް އަތޮޅުތަކަށް ބަދަލުކުރި ކުދިންގެ ޢަދަދުވަނީ 44އަށް އަރާފައެވެ. މިކުދިން ފުވައްމުލައް ސިޓީގެ އަމާންވެއްޓަށް ގޮސްފައިވަނީ ޖެނޑަރ މިނިސްޓަރ ޢާއިޝަތު މުޙައްމަދު ދީދީއާ އެކުގައެވެ.
އެކި ސަބަބުތަކާ ގުޅިގެން ދައުލަތުގެ ބެލުމުގެދަށަށް ނަގާފައިވާ ކުދިން، ދިރިއުޅެމުން އައިސްފައިވަނީ މާލޭގައި ހުންނަ ވިލިމާލޭ ކުޑަކުދިންގެ ހިޔާއާއި ހުޅުމާލޭގައި ހުންނަ ފިޔަވަތީގައެވެ. މި 11ކުދިންނާއެކު މިވަގުތު ފުވައްމުލައް ސޓީގެ ފެމިލީ އެންޑް ޗިލްޑްރަން ސަރވިސް ސެންޓަރުގެ ބެލުމުގެ ދަށުގައި ތިބި 5 ކުދިންނާއެކު، ޖުމްލަ 16 ކުދިން މަރުކަޒުގައި ދިރިއުޅެމުން ދާނެއެވެ.
އަތޮޅުތަކުގެ އެކި ސަރަޙައްދުތަކުގައި "އަމާން ވެށި" ޤާއިމުކުރަން ފަށާފައިވަނީ މާލެ ސަރަހައްދުގެ ތޮއްޖެހިފައިވާ މަރުކަޒުތަކުގައި ކުދިން ގެންގުޅުމުގެ ބަދަލުގައި، އެހެން ކުދިންނެކޭ އެއްގޮތަށް މުޖުތަމަޢުގެ ތެރޭގައި ބޮޑުވުމުގެ ފުރުޞަތު ދިނުމެވެ.
އިޖުތިމާޢީ އަދި ޢާއިލީ ގުޅުމުގެ ތެރެއިން ބޮޑުވުމުގެ ފުރުޞަތު ފަހިކޮށްދިނިމުގެ ގޮތުން 11 ކުއްޖަކު ޏ.ފުވައްމުލަކު "އަމާން ވެށި"އަށް ބަދަލުކޮށްފި pic.twitter.com/ySYDBzytbo
— Ministry of Gender, Family and Social Services (@MoGFSSmv) January 24, 2021
ސަރުކާރުގެ ވިސްނުމަކީ ކޮންމެ ކުއްޖަކީވެސް ޢާއިލީ މާޙައުލުގެ ތެރެއިން ލޯތްބާއި އަޅާލުމާއެކު ބޮޑުވާ ކުދިންނަށް ހެދުމެވެ. ދަޢުލަތަށް ނަގާ ކުދިން މިހާރު ތިބެނީ، އެކުދިންގެ އުމުރުފުރާއާ ގުޅޭ މަރުކަޒުތަކުގައި މާލޭގައެވެ. މީގެ ސަބަބުން އެއް ޢާއިލާއަށް ނިސްބަތްވާ ކުދިން ދެ މަރުކަޒުގައިވެސް އުޅެންޖެހޭ ޙާލަތު ދިމާވެއެވެ.
ނަމަވެސް އަތޮޅުތަކުގައި ހުރި "އަމާން ވެށި"އަށް ކުދިން ބަދަލުކުރާއިރު، އެ ކުދިންގެ ޢާއިލާގެ އެހެން ކުދިންނާ އެކު ދިރިއުޅެވޭގޮތަށް ބަދަލުކުރަމުންދާކަމަށް ޖެންޑަރ މިނިސްޓަރީއިން މަޢުލޫމާތުދެއެވެ. އަދި މި ކުދިންނާ ރަށުގެ އެހެން އާއިލާތަކާ ގުޅިގެން އާއިލީ ވެއްޓެއްގެ ތެރެއިން ބޮޑުވުމުގެ ފުރުޞަތު ފަހިކޮށްދޭނެކަމަށް ޖެންޑަރ މިނިސްޓްރީއިން ވިދާޅުވެއެވެ.
އަތޮޅުތަކުގައި ހަދާފައިވާ އަމާން ވެށިތަކުގައި ކުދިން ދިރިއުޅޭނީ ކަނޑައެޅިފައިވާ ވަކި އަދަދަކަށެވެ. މީގެ ސަބަބުން ކުދިންނަށް ބޭނުންވާ ޚާއްސަ އަޅާލުމާ ބޭނުންވާ ތަރުބިއްޔަތު ދިނުމާ، އަދި ކުދިންނަށް ދިރިއުޅުމަށް ބޭނުންވާ ހުނަރުތައްވެސް ފުރިހަމަށް ފޯރުކޮށްދެވޭނެކަމަށް ޖެންޑަރ މިނިސްޓްރީއިން ވިދާޅުވެއެވެ.
ފުވައްމުލަކުގައި ހުޅުވި އަމާން ވެށްޓަކީ މިގޮތަށް ހުޅުވި 3 ވަނަ މަރުކަޒެވެ. މިހާތަނަށް ބ.އޭދަފުށީގައި ޤާއިމުކޮށްފައިވާ މަރުކަޒަށް 17ކުދިން އަދި ށ.ފުނަދޫ މަރުކަޒަށް 16 ކުދިންވަނީ ބަދަލުކޮށްފައެވެ.