މަސްތުވާތަކެތި އެެތެރެކުރުން ހުއްޓުވުމަށް ފުލުހުން ކުރާ މަސައްކަތުގެ ދަށުން، ކޮންޓްރޯލް ޑެލިވަރީ އޮޕަރޭޝަންގައި ހައްޔަރު 2 މީހަކު ޢުމުރަށް ޖަލަށްލުމަށް ކްރިމިނަލް ކޯޓުން ޙުކުމްކޮށްފިއެވެ.
ކޮންޓްރޯލް ޑެލިވަރީ އޮޕަރޭޝަނަކީ ދުރާލާ ރާވައިގެން މަސްތުވާތަކެތި ގެންނަކަން އެނގިހުރެ، އެތަކެއްޗާއި ހަވާލުވުމަށް އަންނަ މީހާ މެދުވެރިކޮށް، އެކަމުގައި ހިމެނޭ މީހުން ހޯދުމަށް ފުލުހުން ހިންގާ އޮޕަރޭޝަނެވެ. ކޮންޓްރޯލް ޑެލިވަރީ އޮޕަރޭޝަންގައި ހައްޔަރުކޮށް، ޢުމުރަށް ޖަލަށްލުމަށް ޙުކުމްކޮށްފައިވަނީ މއ.ދޭލިޔާގެ، ޢަލީ ޖިބްރީލްއާއި، ސ.މަރަދޫ، ޒިކުރާ، ޢިމްރާން ވަޖުދީގެ މައްޗަށެވެ. އެމީހުންގެ މައްޗަށް އުފުލާފައިވަނީ ޑައިމޯފިން ޓްރެފިކް ކުރުމުގެ ކުށުގެ ދަޢުވާއެވެ.
ޢަލީ ޖިބްރީލްއާއި، ޢިމްރާން ވަޖުދީ ހައްޔަރުކޮށްފައިވަނީ ޕޯސްޓް މެދުވެރިކޮށް ރާއްޖެ އެތެރެކުރި މަސްތުވާތަކެތިތަކެއް އެތެރެކުރި ފަރާތް ހޯދުމަށް ފުލުހުން ހިންގި އޮޕަރޭޝަނެއްގައެވެ. މި އޮޕަރޭޝަނަކީ ޕޯސްޓުން ލިބިފައި އޮތް ސިޓީއުރައެއްގެ ތެރޭގައި މަސްތުވާތަކެތި ހުރިކަމަށް ތުހުމަތުކުރެވިގެން، އެތަކެއްޗާ ޙަވާލުވުމަށްދާ ފަރާތެއް ހޯދުމަށް، ފުލުހުން ހިންގި ކޮންޓްރޯލް ޑެލިވަރީ އޮޕަރޭޝަނެކެވެ.
މިމީހުންގެ ތެރެއިން އިމްރާން ވަޖުދީ ހައްޔަރުކޮށްފައިވަނީ މަސްތުވާތަކެތި ހުރި ސިޓީއުރަ ވެލާނާ ބިލްޑިންގގެ ގުރައުންޑް ފްލޯގައި ހުންނަ ޕިކްޕޯސްޓް ސްޓޭޝަންގެ ލޮކަރަށްލުމަށްފަހު، އެ ސިޓީ އުރަ ނަގަންދާ ފަރާތެއް ހޯދުމަށް ފުލުހުން ފާރައަށް ތިބުމަށްފަހުއެވެ. އެގޮތުން ޢިމްރާން ވަޖުދީ ވެލާނާގޭގައި ހުންނަ ޕިކް ޕޯސްޓަށް ވަދެ، ކޯޑު ޖެހުމަށްފަހު އެ ލޮކަރ ތެރޭގައި އޮތް އެންވެލޮޕް ނަގައިގެން ދާން ފެށުމުން، ފުލުހުން ޢިމްރާން ވަޖްދީ ހުއްޓުވައި، ޢިމްރާން ވަޖްދީ ފުލުހުންގެ ބެލުމުގެދަށަށް ގެންގޮސް، ޢިމްރާން ވަޖުދީއާއި ސުވާލުކުރުމުން، އެ އެންވެލޮޕަކީ މއ.ދޭލިޔާގެ، ޢަލީ ޖިބްރީލްގެ އެއްޗެއްކަމަށް އޭނާ ބުނެފައިވެއެވެ.
އެތަކެއްޗާ ޙަވާލުވާން އަންނަ ފަރާތެއް ހޯދުމަށް ފުލުހުން ހިންގި ކޮންޓްރޯލް ޑެލިވަރީ އޮޕްރޭޝަންގައި، ޢިމްރާން ވަޖްދީ ދިރިއުޅޭ އެޕާރޓްމަންޓުގައި ފުލުހުން ފާރައަށް ތިއްބައި، ޢަލީ ޖިބްރީލް އެގެއަށް ގޮސް، އީ.އެމް.އެސް ޕާރުސަލް ސިޓީއުރަ ނަގައި، އެ ޕާރުސަލް ސިޓީއުރަ ޢަލީ ޖިބްރީލްގެ އަތުން ވަނީ ކަނޑާފައެވެ. އޭގެތެރޭގައި އޮތް ސިޓީއުރަ ނެގުމަށް އުޅުނު ވަގުތު، ޢަލީ ޖިބްރީލް ފުލުހުންގެ ބެލުމުގެ ދަށަށް ގެންގޮސް، ޢަލީ ޖިބްރީލްގެ ހަށިގަނޑު ބަލައި ފާސްކުރިއިރު، އޭނާގެ އަތުން ފެނުނު ތަޅުދަނޑި ފައްޗެއްގައި އޮތް ތަޅުދަނޑިއަކުން، އެ އެޕާރޓްމަންޓުގައި ހުރި ކޮޓަރިއެއް ހުޅުވައި، ކޯޓު އަމުރެއްގެ ދަށުން އެ އެޕާރޓްމަންޓު ބަލައި ފާސްކުރިއިރު، އެ ކޮޓަރީގައި ހުރި އަލަމާރިއެއްގެ ތެރޭގައި ހުރި ތިޖޫރީއެއްގެ ތެރެއިން ފެނުނު ދެ ރަބަރު ޕެކެޓުން ޑައިމޯފިން ވަނީ ފެނިފައެވެ. އަދި އެ އަލަމާރިން ނެގި މާސްކުތަކަކުން ނެގި ޑީ.އެން.އޭ ޢިމްރާން ވަޖުދީއާއި ޢަލީ ޖިބްރީލްގެ ޑީ.އެން.އޭއާ ވަނީ ދިމާވެފައެވެ. އަދި އެ ދަޢުވާ ސާބިތުކުރުމަށް ދައުލަތުން ހުށަހެޅި ހެއްކާއި ޤަރީނާއިން، ޑައިމޯފިން ޓްރެފިކް ކުރުމުގެ ކުށުން ޢިމްރާން ވަޖްދީއާއި، ޢަލީ ޖިބްރީލްގެ މައްޗަށް ކުށް ސާބިތުވާކަމަށް ސާބިތުވާކަމަށް ކްރިމިނަލް ކޯޓުން ކުރި ޙުކުމުގައި ބުނެފައިވެއެވެ.
ކްރިމިނަލް ކޯޓްގެ ޤާޒީ ޙަސަން ސަޢީދު ކުރެއްވި ޙުކުމުގައި ޢިމްރާން ވަޖުދީއާއި ޢަލީ ޖިބްރީލް ޢުމުރަށް ޖަލަށްލުމާއެކު އެއްލައްކަ ރުފިޔާއިން ޖޫރިމަނާކޮށް އެފައިސާ މިއަހަރުގެ ޖެނުއަރީ ފުރަތަމަ ދުވަހުން ފެށިގެން އެއް މަސްދުވަހުގެ ތެރޭގައި މީރާއަށް ދެއްކުމަށް އެ ދެމީހުންގެ މައްޗަށް ވަނީ ޢަމަުރުކޮށްފައެވެ.