ފާއިތުވި އަހަރު ރާއްޖޭގައި ޕާސްޕޯޓް ހެއްދި މިންވަރު 5 ގުނަ ދަށަށް ހިނގައްޖެއެވެ. ޕާސްޕޯޓް ހެއްދުން މަދުވެފައިވަނީ ކޯވިޑް-19ގެ ޙާލާތާ ގުޅިގެން ރާއްޖޭގެ ބޯޑަރު ބަންދުކުރުމާއި ދަތުރުފަތުރުކުރުން މަދުވުމާ ގުޅިގެންނެވެ.
ކޯވިޑް-19ގެ ޙާލަތާއި ގުޅިގެން މިދިޔައަހަރު ދުނިޔޭގެ ގިނަ ޤައުމުތަކެއް ފުރަބަންދުކޮށް ޤައުމުތަކުގެ ބޯޑަރުތައް ބަންދުކުރިއެވެ. ކޯވިޑް-19ގެ ސަބަބުން ވިޔަފާރީގެ ގޮތުން އެންމެ ބޮޑު ހީނަރުކަމެއްއައި ދާއިރާތަކުގެ ތެރޭގައި ދަތުރުފަތުރުގެ ދާއިރާ ހިމެނެއެވެ.
ކޯވިޑް-19ގެ ފުރަބަންދާއި ގުޅިގެން ރާއްޖޭގެ ބޯޑަރުވެސް ދެމަހަށްވުރެ ދިގު މުއްދަތަކަށް ބަންދުކުރިއެވެ. އަދި ބޯޑަރު ހުޅުވާލުމަށްފަހުވެސް، ބައެއް އެއަރލައިންތަކުން ދަތުރުފަށާފައި ނުވާތީ ދަތުރުފަތުރުގެ ނިޒާމު އޮތީ ވަރަށް ބޮޑަށް ހީނަރުވެފައެވެ. 2020ވަނަ އަހަރު ޕާސްޕޯޓް ހެއްދި މީހުންގެ އަދަދަށް ބަލާއިރު ރާއްޖެއިން ބޭރަށް މީހުން ދަތުރުކުރި މިންވަރު ދަންވިކަން ފާހަގަ ކުރެވެއެވެ.
މޯލްޑިވްސް އިމިގްރޭޝަންގެ ތަފާސްހިސާމުތަކަށް ބަލާއިއެކު 2019ވަނަ އަހަރު 74864 ޕާސްޕޯޓްވަނީ ހައްދާފައެވެ. ނަމަވެސް 2020ވަނަ އަހަރު ހައްދާފައިވަނީ ޖުމްލަ 13662 ޕާސްޕޯޓެވެ. މިއީ 2019ވަނަ އަހަރަށް ވުރެ 5 ގުނަ ދަށް ޢަދަދެކެވެ.
2020ގައި އެވަރެޖްކޮށް ދުވާލެއްގެ މައްޗަށް 37 ޕާސްޕޯޓް ހައްދާފައިވާއިރު، 2019ވަނަ އަހަރު އެވަރެޖްކޮށް ދުވާލަކު 283 ޕާސްޕޯޓްވަނީ ހައްދާފައެވެ.
Annual Statistics 2020 - Passport Service.
— Maldives Immigration (@ImmigrationMV) January 10, 2021
.
.
.#MIstatistics2020 #dhivehipassportservice pic.twitter.com/KRBqsgAA1H
އެންމެ ގިނަ ޕާސްޕޯޓް އަބަދުވެސް ހައްދަނީ މާލޭގައި ހުންނަ އިމިގްރޭޝަންގެ ހެޑް އޮފީސް މެދުވެރިކޮށެވެ. މާލޭ ހެޑް އޮފީސް މެދުވެރިކޮށް 2019ވަނަ އަހަރު 51955 ޕާސްޕޯޓް ހެއްދިނަމަވެސް މިދިޔަ އަހަރު ހައްދާފައިވަނީ 9836 ޕާސްޕޯޓެވެ.
ކުއްލި ޙާލަތުގައި ނުވަތަ އިމަރޖެންސީކޮށް މިދިޔަ އަހަރު ޕާސްޕޯޓް ހައްދާފައިވަނީ 94 މީހުންނެނެވެ. 2019ވަނަ އަހަރު ކުއްލި ޙާލަތުގައި ނުވަތަ އިމަރޖެންސީކޮށް 269 ޕާސްޕޯޓް ވަނީ އިމިގްރޭޝަނުން ދޫކޮށްފައެވެ. 2020ވަނަ އަހަރު 39 ޕާސްޕޯޓް ކާޑު ހައްދާފައިވެއެވެ. އަދި ތަރޑް ޕަރޓީ އެޕްލިކޭޝަންގެ ގޮތުގައި 2932މީހުން ޕާސްޕޯޓް ހެއްދުމަށް ހުށައަޅާފައިވެއެވެ.
މިދިޔަ އަހަރު އަތޮޅުތަކުގައި ހުރި އިމިގްރޭޝަންގެ ސްޓޭޝަންތަކުން ޕާސްޕޯޓް ހައްދާފައިވަނީ ސ.ހިތަދޫން 339މީހުން، ފުވައްމުލަކުން 127މީހުން، ހދ.ކުޅުދުއްފުށިން 218މީހުން އަދި ހއ.ދިއްދޫން 116މީހުން ޕާސްޕޯޓް ހައްދާފައިވެއެވެ. އެއީ ޖުމްލަ 800ޕާސްޕޯޓްއެވެ. 2019ވަނަ އަހަރު އަތޮޅުތަކުން 15408ޕާސްޕޯޓް ހައްދާފައިވެއެވެ.
ޕާސްޕޯޓް ހައްދާ ދުވަސްވަރަށް ބަލާއިރު އާ އަހަރާއި، ސްކޫލް ޗުއްޓީތަކުގައި ޕާސްޕޯޓް ހައްދާ މިންވަރު އިތުރުވެރެވެ. 2020ވަނަ އަހަރު އެންމެ ގިނަ ޕާސްޕޯޓް ހައްދާފައިވަނީ ޖެނުއަރީމަހުއެވެ. ނަމަވެސް އޭޕްރިލް މަހުން ފެށިގެން ޕާސްޕޯޓް ހައްދާ މިންވަރު ވަރަށް ވަނީ ބޮޑަށް ދަށަށް ގޮސްފައެވެ.