އޮޑިޓް ލައިސަންސް ނެތި ދިވެހިރާއްޖޭގައި އެއްވެސް ފަރާތަކުން ޤާނޫނީ އޮޑިޓްކުރުމުގެ ޚިދުމަތް ދިނުމަކީ މަނާކަމެއްކަމުގައި ކަނޑައަޅައިފިއެވެ.
ލައިސަންސް ނެތި އޮޑިޓްކުރުމުގެ ޙިދުމަތް ނުދެވޭނެކަމަށް ކަނޑައަޅައި "ދިވެހިރާއްޖޭގައި ޤާނޫނީ އޮޑިޓްކުރުމާއި އެޝޫރޭންސްގެ ޚިދުމަތް ދިނުމުގެ ގަވާއިދު" މިހާރު ވަނީ ގެޒެޓްކޮށްފައެވެ.
ޤާނޫނީ އޮޑިޓްކުރުމާއި އެޝޫރޭންސްގެ ޚިދުމަތް ދިނުމުގެ ގަވާއިދުގެ މަޤްސަދަކީ ދިވެހިރާއްޖޭގައި ޤާނޫނީ އޮޑިޓްކުރުމުގެ ޚިދުމަތް ދިނުމަށް ބޭނުންވާ ލައިސަންސް ދޫކުރުމާއި ބާޠިލު ކުރުމުގެ މަސައްކަތް އެއް މިންގަނޑެއްގައި ހިފެހެއްޓުމެވެ. އަދި އޮޑިޓް މަސައްކަތުގެ ފަންނު ތަރައްޤީ ކުރުވުމަށް މަގުފަހިކުރުމެވެ. ޤާނޫނީ އޮޑިޓްކުރުމުގެ ލައިސަންސް ދޫކުރުމާއި ބާޠިލު ކުރުމުގައި، ކަނޑައަޅާ ވަކި އުސޫލަކުން ޢަމަލުކުރުމާއި، އޮޑިޓިންގ ދާއިރާ ހަރުދަނާ އުސޫލުތަކެއްގެ މަތިން ކުރިއެރުވުމަށް މަގުފަހިކުރުމަކީވެސް މި ޤަވާއިދުގެ ބޭނުމެކެވެ.
މި ޤަވާއިދުގެ ދަށުން އަމިއްލަ ފަރުދުންނާއި އޮޑިޓް ފާމްތަކަށްވެސް ލައިސަންސް ދޫކުރާނެއެވެ. ދިވެހިރާއްޖޭގައި ޤާނޫނީ އޮޑިޓްކުރުމުގެ ލައިސަންސަށް އެދޭ ކޮންމެ ފަރުދަކީވެސް ޗާޓަރޑް އިންސްޓިޓިއުޓުގެ މެންބަރެއް ކަމުގައިވުމާއި، ދިވެހި ރައްޔިތެއްކަމުގައިވުން ހިމެނެއެވެ.
ރާއްޖެއިން ބޭރުގެ ފަރާތްތަކަށްވެސް ލައިސަންސް ދޫކުރާ ހަލާތްތައް މި ޤަވައިދުގައި ވަނީ ހިމަނާފައެވެ. އޭގެތެރޭގައި ދިވެހިރާއްޖޭގެ ޤާނޫނީ އޮޑިޓްކުރުމުގެ ގަވާއިދުގެ ދަށުން ލައިސަންސް ދޫކޮށްފައިވާ އެހެން ޤައުމެއްގެ ރައްޔިތަކު، މި ގަވާއިދުގެ ދަށުން ލައިސަންސަށް އެދި ހުށަހަޅައިފިނަމަ، އެ ފަރާތަކަށް އޮޑިޓް ލައިސަންސް ދޫކުރާނީ 31 ޑިސެންބަރު 2023 ގެ ނިޔަލަށް އެ ލައިސަންސްގެ މުއްދަތު ހަމަވާގޮތަށެވެ.
މި ޤަވައިދުގެ ދަށުން ލައިސަންސް ދޫކުރާ އޮޑިޓް ފާމްގެ މަސައްކަތްކުރާ ފަންނީ މުވައްޒަފުންގެ ތެރެއިން މަދުވެގެން 50 އިންސައްތައަކީ ދިވެހި ރައްޔިތުން ކަމުގައި ވާންޖެހޭނެކަމަށްވެސް ޤަވާއިދުގައި ބަޔާންކޮށްފައިވެއެވެ.
މި ޤަވާއިދުގެ ދަށުން ފިޔަވަޅު އަޅާނެ ހާލަތްތައްވެސް ވަނީ ކަނޑައަޅާފައެވެ. އެގޮތުން ޤަވާއިދުގެ ދަށުން ހުށައަޅަންޖެހޭ މައުލޫމާތު ހުށަނޭޅުމާއި، ދޮގު މައުލޫމާތުދިނުން ހިމެނެއެވެ. އަދި މަނީ ލޯންޑަރިންގ ނުވަތަ ކޮރަޕްޝަން ނުވަތަ ޓެކުހަށް މަކަރު ހެދުން ނުވަތަ ޓެރަރިޒަމަށް ފައިނޭންސްކުރުން ފަދަ މައްސަލައެއްގައި ބައިވެރިވިކަމަށް ސުލޫކީ ކޮމިޓީގެ ތަޙުޤީޤަށް ސާބިތުވުން ފަދަ ކަންކަންވެސް ހިމެނެއެވެ. މީގެތެރެއިން ކޮންމެ ކަމެއް ސާބިތުވިނަމަވެސް އެކި އަދަދުތަކުން ޖޫރިމަނާކުރާގޮތަށް ޤަވައިދުގައި ވަނީ ހިމަނާފައެވެ