ގުޅިފަޅުގެ ބިން ހިއްކުމުގެ ފުރަތަމަ ފިޔަވަހީގެ ހުރިހާ މަސައްކަތް އަންނަ މާރިޗުމަހަށް އެއްކޮށް ނިންމާލެވޭނެކަމަށް މިނިސްޓްރީ އޮފް ނޭޝަނަލް ޕްލޭނިން ހައުސިން އެންޑް އިންފްރާސްޓްރަކްޗަރއިން ވިދާޅުވެއްޖެއެވެ. ގުޅިފަޅުގެ ބިން ހިއްކަނީ މާލެ ވިޔަފާރި ބަނދަރު ބަދަލުކުރުމަށެވެ.
ގުޅިފަޅުން ބިން ހިއްކުމުގެ ފުރަތަމަ ފިޔަވަހީގެ މަސައްކަތް ހަވާލުކޮށްފައިވަނީ ނެދަލޭންޑްސްގެ ބޮސްކާލިސް ވެސްޓްމިންސްޓަރ ކޮންޓްރެކްޓިން ކުންފުންޏާއެވެ. އެ ކުންފުންޏާއި ހަވާލުކޮށްފައިވަނީ 6 މިލިއަން ކިއުބިކް މީޓަރުގެ ސަރަހައްދެއް ހިއްކާ ހިއްކި ބިން ޙިމާޔަތްކުރުމަށްޓަކައި 4 ކިލޯމީޓަރުގެ ތޮއްޓެއް ލުމަށްވަނީ ހަވާލުކޮށްފައެވެ.
ޕްލޭނިން މިނިސްޓްރީން ވިދާޅުވީ މަޝްރޫޢުގެ ދަށުން ބިން ހިއްކާ ސަރަޙައްދަށް ވެލި އެޅުމުގެ މަސައްކަތް ނިންމައި މިހާރު ކުރިއަށްދަނީ ތޮށިލުމުގެ މަސައްކަތްކަމަށެވެ. އަދި އެ މަސައްކަތް އަންނަ މާރިޗުމަސް ނިމެންވާއިރަށް ނިންމާލެވޭނެކަމަށް އެ މިނިސްޓްރީން ވިދާޅުވިއެވެ.
މާލޭ ވިޔަފާރި ބަނދަރު ގުޅިފަޅަށް ބަދަލުކުރުމުގެ މަޝްރުޢޫގެ ޢަމަލީ މަސައްކަތް މިދިޔަ އަހަރު ފެށުމަށް ނިންމިނަމަވެސް ކޯވިޑްގެ ޙަލަތާއި ގުޅިގެން އެ މަސައްކަތަށްވަނީ މަޑުޖެހުމެއް އައިސްފައެވެ. މި މަޝްރޫއަށް ބޭނުންވާ 476 މިލިއަން ރުފިޔާ ވަނީ މިއަހަރަށް ދައުލަތުން ފާސްކުރި ބަޖެޓްގައި ހިމަނާފައެވެ.
ސަރުކާރުގެ ޢަމާޒަކީ ޖާގައިގެ ގޮތުން ތަނަވަސް ޒަމާނީ، ބައިނަލްއަޤްވާމީ ވިޔަފާރި ބަނދަރަކަށް މި ބަނދަރު ހެދުމެވެ. އަދި މާލޭގައި މި ޚިދުމަތް ދިނުމަށް އޮތް ދަތިތަކަށް ހައްލެއް ހޯދައިދިނުމެވެ. މުޅި މި ސަރަޙައްދަށް ބޮޑު ބަދަލެއް އަންނާނެ މި މަޝްރޫޢު ގުޅެނީ މާލޭ ކަނެކްޓިވިޓީ ބްރިޖް މަޝްރޫއުއާއެވެ. ބްރިޖްގެ މަސައްކަތް ނިމޭއިރު، ގުޅިފަޅުވާނީ އިޤްތިޞާދީ މައި ހަބަކަށެވެ.
ބްރިޖް މަޝްރޫޢު ކުރިއަށްގެންދިއުމަށް މިއަހަރުގެ ބަޖެޓުގައ 469 މިލިއަން ރުފިޔާވަނީ ކަނޑައަޅާފައެވެ. މި ދެ މަޝްރޫޢުގެ މަސައްކަތް ކުރިއަށްގެންދިއުމަށް ހަމަޖެހިފައިވަނީ އެކުއެކީގައެވެ. އަދި މި ޕްރޮޖެކްޓްތަކާއި ގުޅޭ ދިރާސާތައް ހެދުމާއި ކުރެހުންތައް ތަޔާރުކުރުމުގެ މަސައްކަތް ފަށާފައިވާކަން ސަރުކާރުންވަނީ ހާމަކުރައްވާފައެވެ.
މި ޓްރާންސްޝިޕްމަންޓް ބަނދަރުގެ މަސައްކަތް ނިމުމުން ބަނދަރު ހިންގުމުގެ މަސައްކަތް ހަވާލުކުރާނީ، މިހާރުވެސް މާލޭ ވިޔަފާރި ބަނދަރު ހިންގަމުން އަންނަ މޯލްޑިވްސް ޕޯޓްސް ލިމިޓެޑާކަމަށް ސަރުކާރުންވަނީ ހާމަކުރައްވާފައެވެ. މި ބަނދަރާއި އެކު މާލޭ ވިޔަފާރި ބަނދަރުގައި މުދާ ބާލަން ބޯޓު ފަހަރުތައް ތޮއްޖެހޭ ޖެހުމަށް ލުއިަތަކެއް އަންނާނެއެވެ.
މާލޭ ވިޔަފާރި ބަނދަރު ގުޅިފަޅަށް ބަދަލުކުރުމުގެ މަޝްރޫޢުއަކީ މިފަދަ މައްސަލަތަކަށްވެސް ހައްލެއް ގެންނާނެ މަޝްރޫއެކެވެ. އޭގެ ސަބަބުން މާލޭ އުތުރު ފަރާތު ފަޅުން ބޮޑު ބައެއް ހުސްވާނެއެވެ. އެސަރަޙައްދު އޮޑިވެރިންނާއި ދަތުރުވެރިންނަށް ބޭނުންކުރަން ދިނުމުގެ ފުރުޞަތު ބޮޑެވެ. އަނެއްކޮޅުން ގުޅިފަޅަށް ވިޔަފާރި ބަނދަރު ބަދަލުކުރުމުން މާލޭ ފަޅަށް މުދާ ބަލާ އަންނަ އޮޑިދޯނި ފަހަރުތައް އެއްކޮށް މަދުވާނެއެވެ. އެއީ މުދާ ބާލަން ސީދާ ގުޅިފަޅަށް އޮޑި ދޯނިފަހަރުތައް ދާންޖެހޭނެތީއެވެ. އަދި ގުޅިފަޅުން ވިޔަފާރިވެރިންނަށް ގުދަންކުރުމުގެ ފުރުޞަތު އޮތުމުން، މުދާ ބަލާ އައިސް މާލެ ފަޅުގައި އޮންނަންޖެހޭ އެއްވެސް އުޅަނދެއް ނޯންނާނެއެވެ. މިހާރު އޮތް ބަނދަރަށްވުރެ ދެ ގުނަ ބޮޑު ބަނދަރަކަށްވުމުން މުދާ އަވަހަށް ބާލާ، ކްލިއަރކުރެވޭނެއެވެ. އަދި މާލެއަށް ގުދަން ނުކޮށް، ގުޅިފަޅުން ރާއްޖޭގެ އެކި ސަރަޙައްދުތަކަށް މުދާ ފޮނުވޭނެކަމަށްވެސް ކަމާބެހޭ ފަރާތްތަކުން ބުނެއެވެ.