މިފްކޯއިން ވިއްކާ ފަސްމީރު ބްރޭންޑްގެ ވަޅޯމަހުގެ އަގު ހެޔޮކޮށްފިއެވެ.
މޯލްޑިވްސް އިންޑަސްޓްރިއަލް ފިޝަރީޒް ކޮންޕެނީ ލިމިޓެޑް، މިފްކޯއިން ބުނީ ކުރިން އެ ކުންފުނިން 120 ރުފިޔާއަށް ކިލޯއެއް ވިއްކަމުން އައި ވަޅޯމަހުގެ އަގު މިހާރު 105 ރުފިޔާއަށް ހެޔޮ ކޮށްފައިވާކަމަށެވެ.
އައު އަހަރާއި ދިމާކޮށް މިފްކޯގެ އުފެއްދުންތަކުގެ އަގުތައް އެ ކުންފުނިން އަންނަނީ ހެޔޮކުރަމުންނެވެ. އެގޮތުން ދާދިފަހުން ފަސްމީރު ބްރޭންޑްގެ މަސްދަޅުގެ އަގުވެސް ވަނީ ހެޔޮކޮށްފައެވެ. މަސްދަޅަށް މިފްކޯއިން ގެނައި ބަދަލާއިއެކު ކުރިން 640 އަށް ވިއްކާ ތެޔޮ މަސްދަޅު ކޭހެއް މިހާރު ލިބޭނީ 575 ރުފިޔާއަށެވެ. އަދި ކުރިން 13.50 ރުފިޔާއަށް ވިއްކި ތެޔޮ މަސްދަޅެއް މިހާރު ލިބޭނީ 12.25 ރުފިޔާއަށެވެ.
މީގެއިތުރުން ކުރިން 595 ރުފިޔާއަށް ވިއްކި ފެން މަސްދަޅު ކޭހެއް މިހާރު ލިބޭނީ 530 ރުފިޔާއަށެވެ. އަދި ކުރިން ވަކިން 12.50 ރުފިޔާއަށް ވިއްކި ފެން މަސްދަޅެއް މިހާރު ލިބޭނީ 11.25 ރުފިޔާއަށެވެ.
މިފްކޯގެ ފަސްމީރު ބްރޭންޑްގެ ދަށުން ތަފާތު އެކި ބާވަތްތަކުގެ އުފެއްދުންތަކެއް ވަނީ ބާޒާރަށް ނެރެފައެވެ. އަދި މިއީ ކަސްޓަމަރުންގެ މެދުގައި މަޤްބޫލު ބޮޑު ބްރޭންޑެއްވެސްމެއެވެ.