ސްޓޭޓް ޓްރޭޑިންގ އޯގަނައިޒޭޝަން، އެސްޓީއޯގެ ތެޔޮ ޓާމިނަލްގެ މާސްޓާ ޕްލޭން ހަދާނެ ފަރާތެއް ހޯދުމަށް އެކުންފުނިން އިއުލާންކޮށްފިއެވެ.
އެސްޓީއޯ މިހާރު ވަނީ ތެޔޮ ޓާމިނަލްގެ މާސްޓާ ޕްލޭން ހެދުމަށް ޝައުގުވެރިވާ ފަރާތްތަކުން އީ.އޯ.އައި ހުށަހެޅުމަށް ހުޅުވާލާފައެވެ. މިކަމަށް އެދި ހުށައެޅުމުގެ ފުރުސަތު ކުންފުނިތަކާއި، ޕާޓްނަރޝިޕްތަކާއި، ޖޮއިންޓް ވެންޗަރތަކަށް އެސްޓީއޯއިން ވަނީ ހުށައަޅާފައެވެ.
އެސްޓީއޯއިން ތެޔޮ ޓާމިނަލް އަޅަނީ ކ. ފުނަދޫގައެވެ. ތެޔޮ ޓާމިނަލް އަޅާނީ ފުނަދޫގެ 4.8 ހެކްޓަރުގެ ސަރަހައްދެއްގައެވެ. އެސްޓީއޯ އިން ވަނީ މި މަސައްކަތް ކުރުމަށް ޝައުގުވެރިވާ ފަރާތްތަކުން ތެޔޮ ޓާމިނަލް އަޅާ ސަރަހައްދަށް ދިއުމުގެ ފުރުސަތާއި އެ ސަރަހައްދު ދިރާސާ ކުރުމުގެ ފުރުސަތުވެސް ހުޅުވާލައިފައެވެ.
އެސްޓީއޯ އިން ބުނީ އީއައިއޯ ހުށަހެޅުމުގެ އެންމެ ފަހު ގަޑިއަކީ މިމަހުގެ 26 ވަނަ ދުވަހުގެ ހަވީރު 16:00 ކަމަށެވެ. މިކަމާއިގުޅޭ އެއްވެސް މައުލޫމާތެއް ސާފުކުރަން ބޭނުންވާނަމަ މިމަހުގެ 14 ވަނަ ދުވަހުގެ ކުރިން މައުލޫމާތު ސާފުކުރުމަށް އެސްޓީއޯއިން ވަނީ އެދިފައެވެ.