ހއ.އުތީމު ބޮޑުތަކުރުފާނު ހަނދާނީ މަރުކަޒީ ތަރައްޤީކުރުމުގެ މަސައްކަތް ފަށައިފިއެވެ. ދެ ފިޔަވައްސަކަށް ބަހާލައިގެން ކުރިއަށްގެންދާ މަސައްކަތުގައި، މިހާރު ކުރިއަށްދަނީ އެކަމަޑޭޝަން ބްލޮކް ތަރައްޤީކުރުމުގެ މަސައްކަތެވެ.
ހއ.އުތީމު ބޮޑުތަކުރުފާނު ހަނދާނީ މަރުކަޒު ތަރައްޤީކުރުމުގެ މަސައްކަތަކީ، އެތަނުން އިތުރު މަންފާ ހޯދުމާއި، އުތީމު ގަނޑުވަރަށް ޒިޔާރަތްކުރާ މީހުންނަށް ލުއިފަސޭހަކޮށްދިނުމަށް ކުރިއަށްގެންދާ މަސައްކަތެކެވެ.
މި މަސައްކަތް ކުރިއަށްގެންދަނީ ދެ ފިޔަވައްސަކަށް ބަހާލައިގެންނެވެ. ފުރަތަމަ ފިޔަވަހީގައި ހަނދާނީ މަރުކަޒުގައި ކުރިން ބޭނުންކުރި އެކަމަޑޭޝަން ބްލޮކް ޒަމާނީ ފެންވަރަށް އަލުން މަރާމާތުކުރުމުގެ މަސައްކަތްވަނީ ފަށާފައެވެ. މި މަސައްކަތުގައި ހިމެނެނީ، 4ކޮޓަރިއައި، 5 ފާޚާނާ އާއި ލިވިން އޭރިއާއެއް ހެދުމުގެ މަސައްކަތެވެ.
މި އެކަމަޑޭޝަން ބްލޮކަކީ ގަނޑުވަރަށް ޒިޔާރަތްކުރާ މީހުން މަޑުކޮށްލުމަށާއި، އަދި ރަށަށް ޒިޔާރަތްކުރާ މީހުން ދިގުމުއްދަތަށް މަޑުކުރެވޭނެ މަގު ފަހިކޮށްދިނުމަށް ހަދާ ތަނެކެވެ. އަދި މިފަދަ ތަންތަނުން ރަށަށް އާމްދަނީ ހޯދޭނެ މަގު ފަހިކޮށްދިނުމަކީވެސް ސަރުކާރުގެ އެއް ޢަމާޒެކެވެ.
ޕީއެސްއެމްއާ ވާހަކަދައްކަވަމުން ބޮޑުތަކުރުފާނު ހަނދާނީ މަރުކަޒުގެ އެސިސްޓެންޓް ޑިރެކްޓަރ ޢަލީ ސިފާމް ވިދާޅުވީ، މަރުކަޒުގެ އެކަމަޑޭޝަން އޭރިއާ ތަރައްޤީކުރުމުގެ މަސައްކަތް މިދިޔަ ޑިސެމްބަރުމަހު ފަށައިގެން ކުރިއަށްދާކަމަށެވެ. މި މަސައްކަތުގެދަށުން މިވަގުތު ކުރިއަށްދަނީ އިމާރާތުގައި ކުރަންޖެހޭ ކޮންސްޓްރަކްޝަން މަސައްކަތްތަކެވެ. މި މަސައްކަތްކުރަނީ ވައިއެލް ސަޕްލައިކިޔާ ކުންފުންޏަކާއި ހަވާލުކޮށްގެންނެވެ. މުޅި މަސައްކަތުގެ %40 މިހާރުވަނީ ނިމިފައެވެ.
"މިފަދަ މަސައްކަތެއް މުހިންމުވަނީ، މިއީ އަހަރަކު އެތައް ބަޔަކު ޒިޔާރަތްކުރާ ރަށަކަށްވާތީ. އަހަރަކު 6000 އެއްހާ މީހުން ގަނޑުވަރު ބަލާލަން އެކަނިވެސް ޒިޔާރަތްކުރޭ. މެހުމާނުންނަށް ރަށުގައި ގިނަވަގުތު ހޭދަކުރެވޭނެ. ބޭނުމަކީ އާއްމުން ބޭނުންވާފަދަ ހިތްހަމަޖެހޭ ފެންވަރުގެ ޚިދުމަތެއް ދިނުން." އަލީ ސިފާމް ވިދާޅުވިއެވެ.
ފުރަތަމަ ފިޔަވަހީގެ މަސައްކަތް އަންނަ މަރޗް މަހުގެ ނިޔަލަށް ނިންމުމަށްވަނީ ހަމަޖެހިފައެވެ. މިމަސައްކަތަށް 976000 ރުފިޔާ ހޭދަވެއެވެ.
މި ޕްރޮޖެކްޓްގެ މަސައްކަތް ކުރިއަށްގެންދަނީ ދެ ފިޔަވައްސަކަށް ބަހާލައިގެންނެވެ. ދެވަނަ ފިޔަވަހީގައިވަނީ މުހިންމު ބޮޑެތި މަސައްކަތްތަކެއް ހިމަނާފައެވެ. އެގޮތުން މަރުކަޒުގައި ސައިޓް މިއުޒިއަމްއެއް ހެދުމާއި، ލައިބްރަރީ، މިއުޒިއަމް ސްޓޯރ، ސްވެނިއަރ ޝޮޕް، ކެފޭ ހެދުން ހިމެނެއެވެ. މީގެ އިތުރުން އާއްމު ފާޚާނައާއި ފީޑިންގ ރޫމް ހެދުންވެސް ހިމެނެއެވެ. ޢަމާޒަކީ މިމަސައްކަތްތައްވެސް ލަސްނުވެ ފެށުންކަމަށް އަލީ ސިފާމް ވިދާޅުވިއެވެ.
މި ޕްރޮޖެކްޓްގެ މަސައްކަތަކީ މިނިސްޓްރީ އޮފް އަރޓްސް ކަލްޗަރ އެންޑް ހެރިޓޭޖުން ޚާއްސަ އިސްކަމެއް ދީގެން ކުރިއަށްގެންދާ މަސައްކަތެކެވެ.