ވިލިމާލޭ ކުޑަކުދިންގެ ހިޔާއާއި ހުޅުމާލޭ ފިޔަވަތީގައި ދިރިއުޅޭ 16ކުދިން، ށ.ފުނަދޫ "އަމާން ވެއްޓަށް" ބަދަލުކޮށްފިއެވެ. ދަޢުލަތުގެ ބެލުމުގެދަށަށް ނަގާ ކުދިން އަތޮޅުތަކުގައި ހަދާފައިވާ މަރުކަޒުތަކަށް ބަދަލުކުރަން ފަށާފައިވަނީ އިޖުތިމާޢީ އަދި އާއިލީ ގުޅުމުގެ ތެރެއިން ބޮޑުވުމުގެ ފުރުޞަތު އެކުދިންނަށް ފަހިކޮށްދިނުމަށެވެ. އަދި މާލޭ ސަރަޙައްދުގައި ތޮއްޖެހިފައިވާ މަރުކަޒުތަކުގައި އެކުދިން ގެންގުޅުމުގެ ބަދަލުގައި، އެހެން ކުދިންނެކޭ އެއްގޮތަށް މުޖުތަމަޢުގެތެރޭގައި ބޮޑުވުމުގެ ފުރުޞަތު ފަހިކޮށްދިނުމަށެވެ.
މި ކުދިން ގޮވައިގެން ށ.ފުނަދުއަށް ވަޑައިގެންނެވީ ރައީސުލްޖުމްހޫރިއްޔާގެ އޮފީހުގެ ސްޕެޝަލް އެޑްވައިޒަރ އޮން ސޯޝަލް ޕޮލިސީ ޑރ.މުޞްތަފާ ލުތުފީއާއި މިނިސްޓަރ އޮފް ސްޓޭޓް ފޮރ ޖެންޑަރ ފެމިލީ އެންޑް ސޯޝަލް ސަރވިސެސް ޢާއިޝަތު ރަޝީދެވެ.
ސަރުކާރުގެ ސިޔާސަތަކީ ކޮންމެ ކުއްޖަކުވެސް ޢާއިލީ މާޙާއުލުގެ ތެރެއިން ލޯތްބާއި އަޅާލުމާއިއެކު ބޮޑުވުމުގެ ފުރުޞަތު ފަހިކޮށްދިނުމެވެ. ކުޑަކުދިންގެ ހިޔާއާއި ފިޔަވަތީގައި ގިނަ ޢަދަދެއްގެ ކުދިން ދިރިއުޅެމުންދާއިރު، މި ދެމަރުކަޒުގައި ކުދިން ގެންގުޅެނީ ދެ ޢުމުރުފުރައަކަށް ބަހާލައިގެންނެވެ. މިކަމުގެ ސަބަބުން އެއް ޢާއިލާއަކަށް ނިސްބަތްވާ ބައެއް ކުދިން ދެ މަރުކަޒެއްގައި ދިރިއުޅެންޖެހޭ ޙާލަތު އާދެއެވެ.
ޖެންޑަރ މިނިސްޓްރީން ވިދާޅުވީ އަތޮޅުތަކަށް ކުދިން ބަދަލުކުރާއިރު، އެކުދިން ދިރިއުޅެމުންދާނީ ދަޢުލަތުގެ ބެލުމުގެދަށުގައި ތިބި، އެ ޢާއިލާއެއްގެ އެހެން ކުދިންނާވެސް އެކުގައި ކަމަށެވެ. އަދި މިކުދިން ރަށުގެ އެހެން އާއިލާތަކާވެސް ގުޅުވައިދޭނެކަމަށް އެމިނިސްޓްރީން ވިދާޅުވިއެވެ.
ރަށްރަށުގައި ހަދާ މަރުކަޒުތަކުގައި ކުދިން ބައިތިއްބާނީ ވަކި ޢަދަދަކަށެވެ. އަދި މި ތަންތަނުން އެކުދިންނަށް ބޭނުންވާ ފުރިހަމަ އަޅާލުމާއި ތަރުބިއްޔަތާއި ދިރިއުޅުމުގެ ހުނަރުތައް ދަސްކޮށްދިނުމުގެ ޕްރޮގްރާމްތައްވެސް ހިންގާނެއެވެ.
މި 16 ކުދިން ށ.ފުނަދުއަށް ގެންގޮސްފައިވަނީ ޓްރާންސް މޯލްޑިވިއަން އެއަރވޭސްގެ ސީޕްލޭނެއްގައެވެ. ކޯޕަރޭޓް ސޯޝަލް ރެސްޕޮންސިބިލިޓީގެދަށުން މި މަސައްކަތުގައި ޓީއެމްއޭއާއި ސަންފްރަންޓް ލިވިންގެ ބޮޑު އެހީތެރިކަމެއް ލިބެމުންދާކަމަށް ޖެންޑަރ މިނިސްޓްރީއިން ފާހަގަކުރައްވައެވެ.
މިދިޔަ ޑިސެމްބަރުމަހުވަނީ ބ.އޭދަފުށިގައި ހުންނަ އަމާން ވެއްޓަށްވެސް 17 ކުއްޖަކު ބަދަލުކޮށްފައެވެ. މީގެ އިތުރަށް އިތުރު 3 ރަށެއްގައި އަންނަނީ "އަމާން ވެށި" ތަރައްޤީކުރަމުންނެވެ.