ކަނޑައެޅިފައިވާ ތާރީޚުގެ ކުރިން ގުރައިދޫ ބިންހިއްކުމުގެ މަސައްކަތް ނިންމާލެވޭނެކަމަށް މަސައްކަތުގެ ކޮންޓްރެކްޓަރ އެމްޓީސީސީން ވިދާޅުވެއްޖެއެވެ.
މި މަސައްކަތް ނިންމާލެވޭނެކަމަށް ކުރިން ލަފާކޮށްފައިވަނީ އޮގަސްޓްމަހު ނަމަވެސް، އެމްޓީސީން މިހާރު ވިދާޅުވަނީ މި މަސައްކަތް އަންނަ އެޕްރިލްމަހު ނިންމާނެކަމަށެވެ.
ގުރައިދޫ ބިން ހިއްކުމުގެ މަޝްރޫޢުގެދަށުން 15 ހެކްޓަރުގެ ބިން، އެރަށުގެ ހުޅަނދު ފަރާތުން ދަނީ ހިއްކަމުންނެވެ. މި މަޝްރޫޢުއަކީ ގުރައިދުއަށް ދިމާވެފަޢިވާ ބޯހިޔާވަހިކަމުގެ މައްސަލައާއި، އަދި ރަށުން އިތުރު އިޤްތިޞާދީ ފުރުޞަތުތައް އިތުރުކުރުމަށް ކުރިއަށްގެންދާ މަސައްކަތްކެކެވެ.
މަޝްރޫޢުގެ މަސައްކަތުގައި ބިންހިއްކުމާއި، ހިއްކި ސަރަޙައްދު ޙިމާޔަތްކުރުމުގެ މަސައްކަތްވެސް ހިމެނެއެވެ. މި ހުރިހާ މަސައްކަތެއްވެސް އެކު އެކީގައި ކުރިއަށްދާކަމަށް އެމްޓީސީސީން މަޢުލޫމާތުދެއެވެ. ބިން ހިއްކުމުގެ ބޮޑު ބައެއްގެ މަސައްކަތް ނިމިފައިވާއިރު މިހާރުވަނީ، ހިއްކި ބިން ޙިމާޔަތްކުރުމަށްޓަކައި ރިވެޓްމަންޓް ޖެހުމުގެ މަސައްކަތް ފަށާފައެވެ. އެގޮތުން 1200 މިޓަރުގެ ސަރަޙައްދުގައި ބޮޑުހިލައިގެ ރިވެޓްމަންޓް ޖެހުމުގެ މަސައްކަތްދަނީ ކުރަމުންނެވެ.
މިމަސައްކަތާއިއެކު އެރަށު ބަނދަރު ހިއްކުމުގެ މަސައްކަތްވެސް ކުރިއަށްދެއެވެ. އެގޮތުން 644،000 ކިއުބިކް މީޓަރުގެ ސަރަޙައްދެއް ވަނީ ފުންކޮށްފައެވެ.
ކ.ގުރައިދޫ ބިންހިއްކުމުގެ މުޅި މަޝްރޫޢުގެ 61 އިންސައްތަ މަސައްކަތް މުޅިންވަނީ ނިމިފައެވެ. މުޅި ޕްރޮޖެކްޓްގެ މަސައްކަތް އޭޕްރިލްމަހުގެ 17 ވަނަ ދުވަހަށް ނިންމާނެކަމަށް މަސައްކަތުގެ ކޮންޓްރެކްޓަރ އެމްޓީސީސީން މަޢުލޫމާތުދެއެވެ. ކުރިން މި މަސައްކަތް ނިންމުމަށް ތާވަލްކުރީ މިއަހަރުގެ އޮގަސްޓަމަހުގެ 27 ވަނަ ދުވަހަށެވެ.
ބިމުގެ ޖާގައިގެ ދަތިކަމުގެ ސަބަބުން ގުރައިދުއިން ބޯހިޔާވަހިކަމަށް ގޯތި ދޫނުކުރާތާ 17އަހަރު ވަނީ ވެފައެވެ. ހިއްކި ބިމުން ގޯތި ދިނުމަށް ކަނޑައަޅާފައިވަނި 4.75 ހެކްޓަރުގެ ސަރަޙައްދެވެ. ނަމަވެސް ގޯތި ބޭނުންވާ ގިނަ އާއިލާތަކެއް ރަށުގައި ތިބުމާއިއެކު، ގޯތި ދިނުމަށް ކަނޑައަޅާ ބިން އިތުރުކުރުމަށް ކަމާއިގުޅޭ ފަރާތްތަކާއިއެކު މަޝްވަރާކުރަމުންދާކަމަށް އެރަށު ކައުންސިލުން ވިދާޅުވެއެވެ.
ގުރައިދޫ ބިން ހިއްކުމުގެ މަސައްކަތް އެމްޓީސީއާއި ހަވާލުކޮށްފައިވަނީ 2019 ވަނަ އަހަރު ނަމަވެސް، ޢަމަލީ މަސައްކަތް ފަށާފައިވަނީ މިދިޔަ އަހަރުގެ އޮގަސްޓްމަހުގެ 23 ވަނަ ދުވަހުއެވެ. މި ޕްރޮޖެކްޓަކީ 85.9 މިލިއަން ރުފިޔާގެ މަޝްރޫޢުއެކެވެ.
ގުރައިދޫގެ އިތުރުން، މާލެ އަތޮޅުގައި މާފުށީ ބިން ހިއްކުމުގެ މަޝްރޫޢުވެސް ދަނީ ކުރިއަށްގެންދަމުންނެވެ. މި މަޝްރޫޢުތަކާއިއެކު ވިޔަފާރީގެ އިތުރު ފުރުޞަތުތައް ފަހިވެ، ރަށަށް ވަންނަ އާމްދަނީ އިތުރުކުރުމަކީ ސަރުކާރުގެ މުހިންމު ޢަމާޒެކެވެ.