ޤައުމީ ފެންވަރުގައި ޒުވާން ދަރުމަވެރިން އުފެއްދުމުގެ ޕްރޮގްރާމެއް ފެށުމަށް ޔޫތް މިނިސްޓްރީން ތައްޔާރުވާން ފަށައިފިއެވެ. މިނިސްޓްރީ އޮފް ޔޫތް ސްޕޯޓްސް އެންޑް ކޮމިއުނިޓީ އެމްޕަވަމަންޓުން ފެށުމަށް ތައްޔާރުވަމުންދާ މި ޕްރިގްރާމަކީ، ސަރުކާރުގެ ސްޓްރެޓީޖިކް އެކްޝަން ޕްލޭންގައި ހިމެނޭ ޒުވާނުން ބާރުވެރިކުރުވައި އިސްނެގުމުގެ ރޫހު އާލާކުރުމަށް ކުރިއަށްގެންދިއުމަށް ނިންމާފައިވާ ޕްރޮގްރާމެކެވެ.
"ނެޝަނަލް ޔޫތް ވޮލަންޓިއަރ ޕްރޮގްރާމް"ގެ ނަމުގައި ކުރިއަށްގެންދިއުމަށް ނިންމާފައިވާ މި ޕްރޮގްރާމްގެ މަޤުސަދަކީ ޤައުމީ ފެންވަރުގައި ޒުވާން ދަރުމަވެރިން އުފެއްދުންކަމަށް ޔޫތް މިނިސްޓްރީއިން ވިދާޅުވެއެވެ. އަދި ޒުވާނުންގެ މެދުގައި މުޖުތަމަޢުއަށް ޚިދުމަތްކުރުމުގެ ރޫހު އާލާކޮށް، ޒުވާނުންގެ މެދުގައި ދަރުމަވެރިކަން ފުޅާކުރުންވެސް ޕްރޮގްރާމްގެ މަޤުޞަދުގެތެރޭގައި ހިމެނެއެވެ.
އަދި މުޖުތަމަޢުގެ ލާބައާއި މަންފާއަށް ޖަމިއްޔާތަކުން ކުރާ މަސައްކަތުގައި، ޖަމިއްޔާތައް މެދުވެރިކޮށް ޒުވާނުން ބާރުވެރިކުމުގެ މަސައްކަތް ކުރިއަށްގެންދާނެއެވެ.
ޔޫތް މިނިސްޓްރީން ކުރިއަށްގެންދާ މިޕްރޮގްރާމްގައި ބައިވެރިވުމުގެ ފުރުޞަތު މިހާރުވަނީ ހުޅުވާލާފައެވެ. "ނެޝަނަލް ޔޫތް ވޮލަންޓިއަރ ޕްރޮގްރާމް" ޚާއްސަކުރަނީ 16އަހަރާއި 35އަހަރާއި ދެމެދުގެ އުމުރުފުރާގެ މީހުންނަށެވެ. ޕްރޮގްރާމްގައި ޒުވާން ވަކިވަކި ފަރުދުންނާއި، ޒުވާނުންގެ ތަރައްޤީއަށް މަސައްކަތްކުރާ ކްލަބް ޖަމިއްޔާތަކަށް ބައިވެރިވެވޭނެއެވެ.
އެގޮތުން މިހާރުވަނީ މި ޕްރޮގްރާމްގައި ބައިވެރިވުމަށް ރެޖިސްޓްރީވުމަށް ހުޅުވާލާފައެވެ. ބައިވެރިވާން އެދޭ ފަރާތްތަކުން އޮންލައިންކޮށް އަދި ފޯމް ހުށައެޅައިގެންވެސް ބައިވެރިވެވޭނެއެވެ.
ރާއްޖޭގައި މިހާރުވެސް ދަރުމައަށް އެދިގެން މަސައްކަތްކުރާ ގިނަ ޖަމިއްޔާތަކާއި ގްރީޕްތައް އުޅެއެވެ. މިގެތެރޭގައި ކާރިސާތަކުގައި އެހީވާ ގްރޫޕްތަކާއި، ސިއްޙީ ކަންކަމާއި އަދި އިޖްތިމާއީ ކަންކަމުގައި އެހީވާ ވޮލްނަޓިއަރ ގްރޫޕްތައް މަސައްކަތްކުރެއެވެ. އަދި މިފަދަ ޙާލަތްތަކުގައި އަމިއްލައަށް ނުކުމެ ދަރުމައަށް މަސައްކަތްކުރާ މީހުންވެސް މަދެއްނޫނެވެ. ކޯވިޑް19ގެ ޙާލަތުގައި މިގޮތަށް ދަރުމައަށް އެދިގެން އެހީއަށް ނުކުތް ގިނަ މީހުންތަކެއްވަނީ ފާހަގަވެގެންގޮސްފައެވެ.