ފަންނުވެރިންގެ ޙައްގުތައް ރައްކާތެރިކުރުމާއިބެހޭ ބިލުގެ ދެލިކޮޕީ އެކުލަވާލުމުގެ މަސައްކަތް ނެޝަނަލް ސެންޓަރ ފޮރ ދި އަރޓްސްއިން ފަށައިފިއެވެ. މި ދެލިކޮޕީ އެކުލަވާލުމާގުޅޭ ޤާނޫނީ މަސައްކަތްތައް ކުރިއަށްގެންދިއުމަށް "އަޒުރު ޗެމްބަރސް" އެލްއެލްޕީ ކިޔާ ކުފުންޏަކާ މިހާރުވަނީ ޙަވާލުކޮށްފައެވެ.
މިފަދަ ބިލެއް އެކުލަވާލުމުގެ އެންމެ ބޮޑު ބޭނުމަކީ ފަންނުވެރިންނަކީ ކޮބައިކަން ކަނޑައެޅުމާއި އެފަދަ ފަރާތްތަކަށް ލިބެންޖެހޭ ޙައްޤުތައް ކަށަވަރުކޮށްދިނުމެވެ. ނެޝަނަލް ސެންޓަރ ފޮރ ދި އަރަޓްސް މިހާރު ހިންގަމުން އަންނަނީ މިނިސްޓްރީ އޮފް އަރޓްސް ކަލްޗަރ އެންޑް ހެރިޓޭޖްގެ ދަށުންނެވެ. ފަންނުވެރިކަން ކުރިއަރުވައި ފަންނުވެރިންނަށް ޙައްގުތައް ރައްކާތެރިކުރުމަށްޓަކައި މިނިސްޓްރީންދަނީ އެކި ގޮތްގޮތުން މަސައްކަތް ކުރަމުންނެވެ.
މި ބިލާއި ގުޅޭގޮތުން ހެރިޓޭޖް މިނިސްޓްރީން ވިދާޅުވީ މިއީ ދިވެހިންގެ ފަންނުވެރިކަން ކުރިއެރުވުމަށް މުހިންމު ބިލެއްކަމަށެވެ. މި ބިލާއިއެކު ކޮޕީރައިޓާއި ދިވެހި ފަންނުވެރިންނަށް އިސްކަންދިނުންފަދަ މުހިންމު ކަންކަމަށް ހެޔޮބަދަލުތަކެއް އަންނާނެކަމަށް ހެރިޓޭޖް މިނިސްޓްރީން ވިދާޅުވެއެވެ.
މި މަސައްކަތް ފަށައިގަނެވުނީތީ އުފާކުރަން. މިއީ ދިވެހި ފަންނާނުންގެ ޙައްޤުތައް ރައްކާތެރިކޮށް، ފަންނުތައް ކުރިއެރުވުމަށް އެޅުނު މުހިންމު ފިޔަވަޅެއް.މި ބިލު ފަރުމާ ކުރުމުގެ އެކި މަރުހަލާތަކުގައި ފަންނާނުންގެ ޚިޔާލުތައް ވަރަށް މުހިންމު. @MoACHmv https://t.co/sFhWaAyKOi
— Yumna Maumoon (@yumna_maumoon) January 3, 2021
މިއީ ފަންނާނުންނާ ބެހޭ މިފަދަ ބިލެއް ރާއްޖޭގައި އެކުލަވާލާ ފުރަތަމަ ފަހަރެވެ. މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް، ޔުމްނާ މައުމޫނު ވިދާޅުވީ މިފަދަ މަސައްކަތެއް ފަށައިގަނެވުނީތީ އުފާކުރައްވާކަމަށެވެ. މިމަސައްކަތް ވެގެންދާނީ ފަންނާނުންގެ ޙައްޤުތައް ރައްކާތެރިކޮށް، ފަންނުތައް ކުރިއެރުވުމަށް އެޅޭ މުހިންމު ފިޔަވަޅަކަށްކަމަށްވެސް މިނިސްޓަރ ވިދާޅުވިއެވެ. އަދި މިފަދަ މަސައްކަތްތެއް ކުރާއިރު ދާއިރާގެ ފަންނާނުންގެ ޚިޔާލު ވަރަށް މުހިންމުކަމަށް މިނިސްޓަރ ވިދާޅުވިއެވެ.
ބިލު ޑްރާފްޓްކުރުމުގެ މަސައްކަތް ބަޔަކާ ޙަވާލުކޮށްފައިވަނީ އޭޕްރިލް މަހުގެ 28ގެ ނިޔަލަށް ނިންމުމަށެވެ. ހެރިޓޭޖް މިނިސްޓްރީން ވިދާޅުވީ ތައްޔާރުކުރާ ޑްރާފްޓަށް މިނިސްޓްރީއާއި ފަންނާނުންގެ ޚިޔާލުވެސް ހުށަހަޅާނެކަމަށެވެ. ބިލުގެ ޑްރާފްޓްގެ މަސައްކަތް ނިންމައި އެޓަރނީ ޖެނެރަލްގެ އޮފީހަށް ހުށަހަޅާނީ، ކަމާގުޅޭ ފަރާތްތަކުގެ ޚިޔާލާއެކުކަމަށްވެސް މިނިސްޓްރީން ވިދާޅުވެއެވެ.