ހުޅުމާލެ ފޭސް 1ގެ އަނދިރި މަގުތަކާއި ސަރަޙައްދުތައް އަލިކުރުމުގެ މަސައްކަތް އެޗްޑީސީން ފަށައިފިއެވެ.
ހައުސިންގް ޑިވެލޮޕްމަންޓް ކޯޕަރޭޝަން އެޗްޑީސީން ވިދާޅުވީ މައްސަލަ ޖެހިފައިވާ މަގު ބައްތިތަކާއި އަނދިރިމަގުތަކުގެ ގޮތުގައި ހުޅުމާލެ ފޭސް 1ގެ 14 ސަރަޙައްދެއް ފާހަގަވެފައިވާކަމަށެވެ.
މަގުތައް އަލިކޮށް ރައްކާތެރިކަން އިތުރު މާޙައުލެއް ހޯދައިދިނުމަށް ކުރަމުންދާ މަސައްކަތުގެތެރެއިން އެޗްޑީސީން ވަނީ ސްޓްރީޓް ލައިޓް މާސްޓަރ ޕްލޭނެއް އެކުލަވާލައި މަސައްކަތް ފަށާފައެވެ. މި ޕްރޮޖެކްޓްގެ ދަށުން ހުޅުމާލޭގެ 14 ސަރަޙައްދެއްގަައި 1330 ލައިޓް ހަރުކުރާނެއެވެ.
އެޗްޑީސީން ވިދާޅުވީ ހުޅުމާލޭގެ ބައެއް ސަރަޙައްދުތައް އަނދިރިވުމުގެ ސަބަބުން ހުޅުމާލޭގައި ދިރިއުޅޭ ރައްޔިތުންނާއި އެކި ބޭނުންތަކުގައި ހުޅުމާލެއަށް ޒިޔާރަތްކުރާ ފަރާތްތަކުގެ ޝަކުވާއާއި ކަންބޮޑުވުން ފާޅުކުރާކަމަށެވެ. ހުޅުމާލޭގައި މަގު ބައްތިޖެހުމުގެ މަސައްކަތް ކުރިއަށްގެންދަނީ އެޗްޑީސީއާއި ގުއަންގެޒޯ މެކޭނިކަލް އެންޑް އިލެކްޓްރިކް ކޯ ލިމިޓެޑް ގުޅިގެންނެވެ.
ލައިޓްޖެހުމާއި، ހަލާކުވެފައިވާ ބައްތިތައް ބަދަލުކުރުމުގެ މަސައްކަތް ހުޅުމާލެ ޒޯން 1،2،3 ސަރަހައްދުގައި މިހާރު ފަށައިގެން ކުރިއަށްގެންދެއެވެ. މި މަސައްކަތް ނިންމާލެވޭނެކަމަށް އެޗްޑީސީން ލަފާކުރަނީ 2021 ވަނަ އަހަރުގެ ޖޫންމަހަށެވެ.
ސްޓްރީޓް ލައިޓް މާސްޓަރ ޕްލޭންގެ ދަށުން މަގުތައް އަލިކުރަނީ ވަކި ޚާއްސަ މިންގަނޑުތަކަކަށެވެ.
އެޗްޑީސީން ވިދާޅުވީ ހުޅުމާލޭގެ ބައެއް ސަރަޙައްދުތަކުގައި ބޯކޮށް ގަސް ހެދިފައިވުމުގެ ސަބަބުންވެސް، ލައިޓްތަކުން ބޭނުންވާ މިންވަރަށް އަލި ނުލިބޭކަމަށެވެ. އެހެންކަމުން އަލަށް ހެދި ޕްލޭންގެ ދަށުން، އެފަދަ ސަރަޙައްދުތަކުގައި ހުރި ގަސް ނަގާ، އީޕީއޭގެ ޤަވައިދުތަކާއި އެއްގޮތަށް އެހެން ސަރަޙައްދުތަކަށް ބަދަލުކުރުމަށް ނިންމާފައިވާކަމަށެވެ. މި މަސައްކަތް ކުރިއަށްގެންދާނީ ގަސްތަކަށް ވީހާވެސް ގެއްލުން ނުވާނެގޮތަށެވެ. މަގުތައް އަލިކުރުމުގެ ޕްރޮޖެކްޓާއި ގުޅިގެން ނަގާ ގަސްތައް ހުޅުމާލޭ ފޭސް 2 ބީޗް ސަރަޙައްދާ، ހުޅުމާލެ ސެންޓްރަލް ޕާކުގައި ޖެހުމަށްވަނީ ހަމަޖެހިފައެވެ.
ހުޅުމާލެއަކީ ދިރިއުޅުމަށް ރައްކާތެރި ތަނަކަށް ހެދުމުގެ ގޮތުން އަހަރުގެ ކުރީކޮޅުވަނީ، ހުޅުމާލޭގެ އެކި ސަރަޙައްދުތަކުގައި ސީސީޓީވީ ކެމެރާ ހަރުކުރުމުގެ މަސައްކަތްވެސް ކުރިއަށްގެންގޮސްފައެވެ. އެޗްޑީސީއާއި ފުލުހުން ގުޅިގެން ކުރިއަށްގެންދިޔަ މަސައްކަތުގައި 48 ކެމެރާ ހުޅުމާލޭގެ އެކި ސަރަޙައްދުތަކުގައި ވަނީ ހަރުކޮށްފައެވެ.