ސަރުކާރުގެ ލިޔެކިޔުންތަކުން އެނގޭ ގޮތުގައި އަތިރީމާފަންނުގޭ ޓްރޭޑިން އެކައުންޓް، އޭ.ޓީ.އޭ ނުވަތަ މިހާރުގެ ނަމުންނަމަ އެސްޓީއޯގެ ވިޔަފާރި ފެށުނީ 1964 ވަނަ އަހަރުގެތެރޭގައެވެ. އަތިރީ މާފަންނުގޭ ތެރެއިން މުދާތަކެއް އަތްގާޑިއަލަކަށް ލައިގެން ގެންގޮސް އޭރުގެ ފަރީދީ ސިނަމާ، މިހާރުގެ ޒުވާނުންގެ މަރުކަޒުގެ ތެރެއަށް ގެންދިޔަ ހިސާބަކީ އެސްޓީއޯގެ ފެށުމެކެވެ. އަދި މިއީ ދިވެހިރާއްޖޭގެ މުޅި އިޤްތިޞާދު ބަދަލުކޮށް، އިންޤިލާބީ ބަދަލެއް ދިވެހިރާއްޖޭގެ އިޤްތިޞާދަށް ގެނުވި ވިޔަފާރީގެ ފެށުމެވެ.
އޭޓީއޭގެ ނަން ސްޓޭޓް ޓްރޭޑިންގ އޮގަނައިޒޭޝަން، އެސްޓީއޯއަށް ބަދަލުކުރީ 9 ޖޫން 1976 ގައެވެ. އޭރު އޭޓީއޭގެ ނަމުގައި އެސްޓީއޯ ހިންގަމުން އަންނަތާ 12 އަހަރު ވެއްޖެއެވެ. އެހެންކަމުން އެސްޓީއޯއަށް 56 އަހަރު މިހާރު ވަނީ ވެފައެވެ. އެސްޓީއޯއަށް ބައި ޤަރުނަށްވުރެ ގިނަ ދުވަސްވެފައިވާއިރު، އެސްޓީއޯ ވެފައިވަނީ ދިވެހިރާއްޖޭގެ އިޤްތިޞާދަށް އިންޤިލާބެއް ގެނުވައި ކާބޯތަކެއްޗާއި ޒަރޫރީ ތަކެތި ރައްޔިތުންނަށް ލިއްބައިދިނުމުގެ ޔަޤީންކަން ކަށަވަރުކޮށްދޭ ކުންފުންޏެއްގެ ގޮތުގައެވެ.
މިފަހުން މުޅި ދުނިޔެއަށް ކުރިމަތިވި އެންމެ ބޮޑު ސިއްހީ ކާރިސާ "ކޯވިޑް19" ގެ ތެރޭގައިވެސް އެސްޓީއޯއިން ވަނީ މުހިންމު ދައުރެއް އަދާކޮށްފައެވެ. ކާބޯތަކެއްޗާއި ސިއްހީ ސާމާނު އެންމެ އަވަސްކަމާއިއެކު ހުސްނުވެ ރައްޔިތުންނަށް ލިބޭނެކަމުގެ ޔަޤީންކަން ކަށަވަރުކުރުމަށް އެސްޓީއޯއިން ވަނީ ގިނަ މަސައްކަތްތަކެއް ކޮށްފައެވެ. ކޯވިޑް19ގެ ސަބަބުން މުޅި ރާއްޖެ ލޮކްޑައުންކޮށް މާލެއާއި އަތޮޅުތަކުގެ ދަތުރުފަތުރު ހުއްޓިފައިވީއިރުވެސް އެސްޓީއޯއިން ވަނީ އަތޮޅުތެރޭގެ ރަށްރަށަށް ކާބޯތަކެތި ހުސްނުވެ ލިބޭނެ އިންތިޒާމް ހަމަޖައްސަދީފައެވެ. މި މަސައްކަތް ކުރުމަށް އެސްޓީއޯގެ މުވައްޒަފުން ވަނީ ބުރަ މަސައްކަތްތަކެއް ކޮށްފައެވެ.
ކޯވިޑް19ގެ ހާލަތުގައި ރައްޔިތުންނަށް ފަސޭހަކޮށްދިނުމުގެ ގޮތުން ބޭސް ސިޓީއާއިއެކު ގޭގެއަށް ބޭސްވެސް އެސްޓީއޯއިން ވަނީ ޑެލިވަރ ކޮށްދީފައެވެ. ދިގުމުއްދަތަށް ބޭސްކުރާ މީހުންގެ ތެރެއިން ރާއްޖެއިން ބޭރުން ބޭސް ގެންނަން ޖެހޭ މީހުންނަށް އެސްޓީއޯއިން ބޭސް ގެނެސްވެސްދިނެވެ. މީގެއިތުރުން މާލެ ލޮކްޑައުންގައި އޮތް އިރު ގޭގައި ތިބެގެން އެސްޓީއޯއިން ވިޔަފާރިކުރުމުގެ މަގުވެސް ފަހިކޮށްދިނެވެ. މީގެއިތުރުން 4 އަތޮޅެއްގެ އަތޮޅު ހޮސްޕިޓަލަށް ބޭނުންވާ ސިއްހީ ސާމާނުވެސް އެސްޓީއޯއިން ވަނީ ދާދިފަހުން ފޯރުކޮށްދީފައެވެ.
އެސްޓީއޯގެ ވިޔަފާރިފުޅާކޮށް ގިނަ ވިޔަފާރިތަކަކަށްވެސް އެ ކުންފުނިން މިހާރު ވަނީ ވަދެފައެވެ. އެގޮތުން ޝިޕިންގ، ސިއްހީ ސާމާނު، ފިއުލް، ގޭތެރެއަށް ބޭނުންވާ ސާމާނު، ކާބޯތަކެތިވެސް އެސްޓީއޯއިން އަންނަނީ އާންމުންނަށް ވިއްކަމުންނެވެ. މީގެއިތުރުން ޑިޖިޓަލް ބޭންކިންގ ދާއިރާއަށް ވަނުމަށްވެސް އެސްޓީއޯއިން މިހާރު ވަނީ މާކެޓް ސަރވޭއެއް ކުރަން ފަށާފައެވެ.
ވިޔަފާރި ފުޅާކުރުމަށް އެސްޓީއޯއިން ކުރަމުންދާ މަސައްކަތުގެ ތެރެއިން އެންމެ ފަހުން އެ ކުންފުނިން ވަދެފައިވަނީ ޝިޕިންގެ ދާއިރާއަށެވެ. ދިވެހި ވިޔަފާރިވެރިންނަށް ފަސޭހަކަމާއިއެކު އަގުހެޔޮކޮށް މުދާ ލިބޭނެ މަގު ފަހިކޮށްދިނުމުގެ ގޮތުން އެސްޓީއޯއިން މިހާރު އަންނަނީ އައްޑޫއަށް ޝިޕިންގެ ޙިދުމަތް ފަށާފައެވެ. އަދި މިމަހުގެ 22 ވަނަ ދުވަހު ތިނަދޫއަށްވެސް މި ހިދުމަތް ފެށުމަށް އެ ކުންފުނިން އަންނަނީ ތައްޔާރުވަމުންނެވެ.
ނިމިދިޔަ 2019 ވަނަ އަހަރަކީ އެސްޓީއޯގެ ތާރީޚުގައިވެސް މާލީގޮތުން އެންމެ ކާމިޔާބު އެއްއަހަރެވެ. މިދިޔަ އަހަރު އެ ކުންފުންޏަށް ސާފު ފައިދާގެ ގޮތުގައި 303 މިލިއަން ރުފިޔާ ވަނީ ލިބިފައެވެ. 2018 ވަނަ އަހަރު އެކުންފުންޏަށް ސާފު ފައިދާގެ ގޮތުގައި ލިބުނީ 14 މިލިއަން ރުފިޔާއެވެ.
މިއަހަރުގެ ތިންވަނަ ކުއާޓަރުގައި އެސްޓީއޯއަށް 1.5 ބިލިއަން ރުފިޔާގެ އާމްދަނީއެއް ލިބިފައެވެ. މިއީ ދެވަނަ ކުއާޓަރުގައި ލިބުނު އާމްދަނީއަށްވުރެ އިތުރު އަދަދެކެވެ. ދެވަނަ ކުއާޓަރުގައި އެސްޓީއޯއަށް ލިބިފައިވަނީ 1.29 މިލިއަން ރުފިޔާގެ އާމްދަނީއެކެވެ. އަދި ޓެކްސްއަށް ކެނޑުމުގެ ކުރިން ލިބިފައިވާ ސާފު ފައިދާގެ އަދަދަކީ 119 މިލިއަން ރުފިޔާއެވެ.