މޯލްޑިވްސް މީޑިއާ ކައުންސިލުން އެކުލަވައިލި ދިވެހި މީޑިއާގެ ދަފުތަރު އާންމުކޮށްފިއެވެ.
މި ދަފްތަރަކީ، މޯލްޑިވްސް މީޑިއާ ކައުންސިލުގެ ޤަވާއިދުގެ ދަށުން ދިވެހިރާއްޖޭގައި ރަޖިސްޓްރީކޮށްގެން ނެރޭ ނޫސް މަޖައްލާތަކާއި، ބްރޯޑްކާސްޓުކުރާ ފަރާތްތަކާއި، ވަސީލަތްތަކުގެ ދަފުތަރު އެކުލަވާލައި ބެލެހެއްޓުމަށް މޯލްޑިވްސް މީޑިއާ ކައުންސިލަށް ލާޒިމްކުރާތީ، އެކުލަވާލާފައިވާ ދަފްތަރެކެވެ.
މީޑިއާ ކައުންސިލުން އެކުލަވާލި ދަފުތަރުގައި 219ތަނެއްގެ މަޢުލޫމާތުވަނީ ހިމަނާފައެވެ. މި ދަފްތަރުގައި މީޑިއާގެ ނަމާއި، އެޑްރެހާއި، ރެޖިސްޓްރީ ނަންބަރާއި އަހަރު އަދި މީޑިއާގެ މަސްޢޫލުވެރިޔާއާއި އެޑިޓަރުގެ މަޢުލޫމާތުވަނީ ހިމަނާފައެވެ.
މޯލްޑިވްސް މީޑިއާ ކައުންސިލުން ބުނެފައިވަނީ ދަފްތަރު އެކުލަވާލުމުގެ މައިގަނޑު މަޤުސަދަކީ ރާއްޖޭގައި ރެޖިސްޓްރީކޮށްގެން ހިންގާ ނޫސްމަޖައްލާތަށް ދެނެގަތުންކަމަށެވެ. އަދި ވަކި ނިޒާމެއްގެ ތެރެއިން ރާއްޖޭގެ މީޑިއާތަށް ދަފުތަރުކޮށް ބެލެހެއްޓިފައި ނެތުމުގެ ސަބަބުން މީޑިއާތަކާއި ގުޅޭ މައްސަލަތަކާއި، މަސައްކަތްތައް ކުރިއަށް ގެންދިއުމުގައި ކައުންސިލުން ނިންމަންޖެހޭ ކަންކަން ނިންމުމުގައި ކުރިމަތިވެފައިވާ ދަތިތައް ޙައްލުކުރުންކަމަށެވެ.
ދަފްތަރާއި، ދަފްތަރުގައި ހިމެނޭ މަޢުލޫމާތު މިޑިއާ ކައުންސިލްގެ ވެބްސައިޓުން ބަލާލެވޭނެއެވެ.