ކޯވިޑާ ގުޅިގެން މެދުގަނޑާލާފައި އޮތުމަށްފަހު މިމަހުގެ 13 ވަނަ ދުވަހުން ފެށިގެން އުތީމު ގަނޑުވަރަށް ޒިޔާރަތްކުރުމުގެ ފުރުސަތު ހުޅުވާލުމަށް ނިންމައިފިއެވެ.
ސަޤާފީ ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވީ ގަނޑުވަރު ހުޅުވާފައި ހުންނާނީ ހުކުރު ދުވަސް ފިޔަވައި ކޮންމެ ދުވަހެއްގެ ހެނދުނު 8:30 އިން ފެށިގެން މެންދުރު 13:30 އަށް ކަމަށެވެ.
ތަރިކަ ރައްކާތެރިކުރާ ޤައުމީ މަރުކަޒުން ވަނީ ގަނޑުވަރަށް ޒިޔާރަތްކުރާ މެހުމާނުން ޢަމަލުކުރަންޖެހޭ އުސޫލެއް ކަނޑައަޅާފައެވެ.
އަމަލުކުރަންޖެހޭ ޢުސޫލު:
- ގަނޑުވަރަށް ޒިޔާރަތްކުރަން ބޭނުންވާ ދުވަހުގެ އެއްދުވަސްކުރިން ނަން ނޯޓުކުރަންޖެހޭނެ. ދުވާލެއްގެ މައްޗަށް ދޫކުރާނީ ގިނަވެގެން 50 އެޕޮއިންޓްމަންޓް. އަދި އިތުރު ފުރުސަތު ދެވޭނީ ވަގުތު އޮތްވަރަކަށް ބަލައި މަރުކަޒުން ނިންމާ ގޮތެއްގެ މަތިން.
- ގަނޑުވަރު ހުޅުވާލިނަމަވެސް މި ޙާލަތުގައި ގަނޑުވަރަށް ޒިޔާރަތްކުރުމުގެ ފުރުސަތު ލިބެނޭ ދިވެހިންނާއި، ރާއްޖޭގައި ވަޒަންވެރިވެގެން އުޅޭ ބިދޭސީންނާއި، ވާކް ޕަރމިޓް އޮތް ބިދޭސީންނަށް.
- ފުރަބަންދު ކޮށްފައިވާ އެއްވެސް ތާކުން އަންނަ މީހަކަށް ގަނޑުވަރަށް ވަނުމުގެ ފުރުޞަތެއް ނުލިބޭނެ.
- ގަނޑުވަރު ބެލުމަށްފަހު ގަނޑުވަރު ތެރޭގައި މަޑުކުރެވޭނީ އިތުރު 5 މިނެޓުގެ ވަގުތަކަށް.
- މި ޙާލަތުގައި ގަނޑުވަރަށް ޒިޔާރަތްކުރާ ފަރާތްތަކަށް ގަނޑުވަރުގެ ވަޅުތަކުން ފެން ބޭނުންކުރުމުގެ ފުރުޞަތެއް ނުލިބޭނެ.
ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވީ ގަނޑުވަރަށް ވަންނައިރު، ރައްކާތެރިކަމުގެ ގޮތުން ހަދާފައިވާ ގައިޑްލައިންތަކަށް ފުރިހަމައަށް ޢަމަލުކުރަންޖެހޭކަމަށެވެ. އަދި ގައިޑްލައިންތަކާއި ޚިލާފުވާނަމަ ގަނޑުވަރަށް ވަނުމުގެ ފުރުޞަތު ނުދީ ފޮނުވާލުމުގެ އިޚުތިޔާރު ބޮޑުތަކުރުފާނު ހަނދާނީ މަރުކަޒަށް ލިބިގެންވާކަމަށް އެމަރުކަޒުން ވިދާޅުވެއެވެ.
ތަރިކަ ރައްކާތެރިކުރާ ޤައުމީ މަރުކަޒުން ވިދާޅުވީ އުތީމު ގަނޑުވަރަށް ޒިޔާރަތްކުރަން ބޭނުންވާ މީހުން މަރުކަޒުގެ ނަންބަރު 3340255 އަށް ގުޅައިގެން ނަންނޯޓްކުރެވޭނެކަމަށެވެ.
ކޯވިޑް19އާއި ގުޅިގެން އުތީމު ގަނޑުވަރަށް ޒިޔާރަތްކުރުމަށް އޮތް ފުރުސަތު ބަންދުކުރީ މިއަހަރުގެ މާޗުމަހުގެ 9 ވަނަ ދުވަހުއެވެ.