ދަރުމައަށް އެދިގެން މަސައްކަތްކުރާ "ދަރުމަވެރިންްގެ ދުވަސް" ބައިނަލްއަޤްވާމީގޮތުން ފާހަގަކުރަން ނިންމީ، އެކުވެރި ދަޢުލަތްތަކުގެ ޖަމިއްޔާ އދ.ގެ އިސްނެގުމުގެ ދަށުން 17 ޑިސެމްބަރު 1985 ގައެވެ. އޭގެފަހުން ކޮންމެ އަހަރެއްގެވެސް ޑިސެމްބަރުމަހުގެ 5 ވަނަ ދުވަސް ފާހަގަކުރަނީ ބައިނަލްއަޤްވާމީ ދަރުމަވެރިންގެ ދުވަހުގެ ގޮތުގައެވެ.
ވޮލެންޓިއަރުން ނުވަތަ ދަރުމަވެރިންނަކީ މާލީ މަންފާއެއް ނެތި، އެހީތެރިކަން ފޯރުކޮށްދިނުމުގައި މަސައްކަތްކުރާ މީހުންނެވެ. އެކިއެކި ކާރިސާތަކުގައާއި ޙާދިސާތަކުގައި އާއްމު ރައްޔިތުންނަށް ދިމާވި އެތައް ގޮންޖެހުންތަކެއްގައި، ދަރުމަވެރިންގެ މިންނެތް ބުރަ މަސައްކަތްތައް އަޅުގަނޑުމެންނަށް ވަނީ ފެނިގެން ގޮސްފައެވެ. އާބާދީ ކުޑަ މި ދިވެހިރާއްޖެއިންވެސް މި ރީތި މިސާލު އެތައް ގޮތަކުން ދަނީ ފެންނަމުންނެވެ.
2004 ވަނަ އަހަރުގެ ސުނާމީ ކާރިސާއާއި، މާލެއަށް ދިމާވި ފެނުގެ ކާރިސާއާއި، 2019 ވަނަ އަހަރުގެ ހެންވޭރު ބޮޑު އަލިފާނުގެ ޙާދިސާއެވެ. އެކި ގޮތްގޮތުން އެހީވުމަށް ހިންގަމުން އަންނަ ދާއިމީ އެންޖީއޯތަކުގައިވެސް އެތައް ދަރުމަވެރިންނެތް މެދު ނުކެނޑި އަންނަނީ މަސައްކަތްކުރަމުންނެވެ.
ކޯވިޑް 19 ފެތުރެން ފެށުމުން އަޅުގަނޑުމެންނަށް ފެނިގެންދިޔައީ އެތައް ދަރުމަވެރިންނެއް ކުރީ ސަފަށް ނިކުމެ، އެކި ގޮތްތަކުން އެހީވުމަށް ދިއްކޮށްލި އަތްތަކެވެ. ދިވެހިރާއްޖެއަށް ބަލާއިރުވެސް މި މަންޒަރު ދަނީ ފެންނަމުންނެވެ. ފުރަތަމަ ގޮވާލުމާއިއެކު ސިއްޙީ އެތައް އެހީތެރިންނެއް ކުރީ ސަފަށް ނިކުތީ، ޖެހިލުންކުޑަ ބަތަލުންތަކެއްގެ ގޮތުގައެވެ. ނެޝަނަލް އެމަޖެންސީ އޮޕަރޭޝަން ސެންޓަރުގައި އިދާރީ މަސައްކަތްތަކާއި، ކޯލް ސެންޓަރާއި، އަދި ސާމްޕަލް ނެގުންފަދަ މަސައްކަތްތަކުގައި ޢަމަލީ މައިދާނަށް ނުކުމެ ޚިދުމަތްކުރަން ފެށިއެވެ. އަދި މިހާރުވެސް ދަނީ ކުރަމުންނެވެ.
މީގެއިތުރުން ޙާލުގައިޖެހުނު އާއިލާތަކަށް ބޯހިޔާވަހިކަން ފޯރުކޮށްދިނުމާއި، އަންނައުނާއި ކާބޯތަކެތި ފޯރުކޮށްދިނުމުގެ މަސައްކަތުގައި އެތައް ދަރުމަވެރިންނެއް ނިދި ނަގާލައި، އާއިލާތަކާއި ދުރުގައި ތިބެގެން ދިޔައީ މަސައްކަތްކުރަމުންނެވެ. ދިވެހިންގެ އިތުރުން ބިދޭސީންގެ އިންސާނީ ޙައްޤުތައް ކަށަވަރުކުރުމުގައިވެސް މިފަދަ ޖަމިއްޔާތަކުން ފޯރުކޮށްދިން އެހީތަކަކީ ނަމޫނާ މަސައްކަތެކެވެ.
ރާއްޖޭގައި ދަރުމައަށް އެދިގެން މަސައްކަތްކުރާ އެންމެ ބޮޑު ޖަމާޢަތަކީ "ދިވެހި ރެޑް ކްރެސެންޓް"އެވެ. ސުނާމީއަށްފަހު ޤާނޫނެއްގެ ދަށުން އުފެއްދި މި ޖަމިއްޔާއަކީ އެކި ހާދިސާތަކުގައި އިންސާނީ އެހީ ފޯރުކޮށްދިނުމަށް އުފެއްދި ޖަމިއްޔާއެކެވެ. ޖަމިއްޔާގައި 2000 އަށްވުރެ ގިނަ ދަރުމަވެރިން މަސައްކަތްކުރާއިރު، ރާއްޖޭގެ އެކި ސަރަޙައްދުތަކުގައި ޖަމިއްޔާގެ 10 ގޮތްޕާއި، 20 ޔުނިޓް ހިމެނެއެވެ. ކުއްލި ޙާލަތްތަކާއި ކާރިސާތަކުގައި ޢަމަލު ކުރާނެ ގޮތުގެ ތަމްރީންތައްވެސް ޖަމިއްޔާއިން ދަނީ ދެމުންނެވެ.
ދިވެހި ރެޑް ކްރެސެންޓްގެ އިތުރުން ރާއްޖޭގައި އެކި ކަހަލަ ބަލިތައް ތަޙައްމަލުކުރާ މީހުންނަށް އެހީވާ ވޮލަންޓިއަރ ސަޕޯޓް ގްރޫޕްތަކާއި، ނިކަމެތި އާއިލާތަކަށް އެހީވުމުގައި މެދުނުކެނޑި މަސައްކަތްކުރާ މިފަދަ އެތައް ޖަމިއްޔާތަކާއި މީހުންނެއް މިއަދު މުޖުތަމަޢުގައި އެބަތިއްބެވެ.
ރާއްޖޭގެ އިތުރަށް ރާއްޖެއިން ބޭރުގެ އިސްލާމީ ޤައުމުތަކާއި، ދިވެހި އެކުވެރި ޤައުމުތަކަށް ދިމާވި އެކި ކާރިސާތަކުގައި ދިވެހި މުޅި މުޖުތަމަޢު، ދަރުމަވެރިންގެ ގޮތުގައި ވަނީ އެހީތެރިކަން ދީފައެވެ.
އެހެންކަމުން ބައިނަލްއަޤްވާމީ ދަރުމަވެރިންގެ ދުވަހެއް ފާހަގަކުރުމުގެ ބޭނުނަކީ، ހިލޭ ސާބަހަށް މަސައްކަތްކުރާ މިފަދަ ދަރުމަވެރިންގެ މަސައްކަތް ބަލައިގަނެ ހިތްވަރުދިނުމެވެ.