ދަނޑުވެރިކަމާއި ގުޅުންހުރި މަސައްކަތްތައް ކުރުމަށް އެގްރިކަލްޗަރ މިނިސްޓްރީން ދޫކުރާ 6 ފަޅުރަށް ބިޑް ކުރުމުގެ މުއްދަތު އިތުރުކޮށްފިއެވެ.
އެގްރިކަލްޗަރ މިނިސްޓްރީން ކުރިން ބިޑް ހުށައަޅަންޖެހޭ ތާރީޚެއްގެ ގޮތުގައި ކަނޑައަޅާފައިވަނީ 20 ޑިސެންބަރު 2020 ވަނަ ދުވަހުގެ 13:00 އެވެ. ނަމަވެސް ބިޑް ކުރުމުގެ އެންމެ ފަހު ތާރީޚެއްގެ ގޮތުގައި މިހާރު ކަނޑައަޅާފައިވަނީ 27 ޑިސެންބަރ އެވެ.
ދަނޑުވެރިކަން ކުރުމަށް މިނިސްޓްރީން ދޫކުރާ 6 ފަޅުރަށަކީ، ހއ. މަޑުލު، ށ. ކަކާއެރިޔަދޫ، ށ. ނެޔޮ، ނ. ތޮޅެންދޫ، ބ. މާއްޑޫ އަދި ގދ. އޮއިނިގިއްލާއެވެ. މި ފަޅުރަށްތައް ކުއްޔަށް ދޫކުރުމުގައި އެ މިނިސްޓްރީގެ މަޤްޞަދަކީ ދިވެހިރާއްޖޭގައި ކާބޯތަކެތި އުފެއްދޭ މިންވަރު އިތުރުކޮށް، ރާއްޖެއަށް އެތެރެކުރަންޖެހޭ ކާބޯތަކެތީގެ މިންވަރު މަދުކޮށް، ކާނާގެ ޔަޤީންކަން ކަށަވަރުކޮށް ދިނުންކަމަށް އެގްރިކަލްޗަރ މިނިސްޓްރީން ވިދާޅުވެއެވެ. އަދި މިކަމުގެ ސަބަބުން ޕޯލްޓްރީ ނުވަތަ ދިރޭ ކުކުޅާއި ބަކަރި ގެންގުޅުމާއި ރާއްޖެއަށް ބޭނުންވާ އެކި ބާވަތްތަކުގެ ގަސްގަހާގެހި ރާއްޖޭގައި އުފައްދައިގެން އާމްދަނީ ހޯދުމުގެ ފުރުޞަތުތައް އިތުރުވެގެންދާނޭކަމަށްވެސް މިނިސްޓްރީން ވިދާޅުވެއެވެ.
އެގްރިކަލްޗަރ މިނިސްޓްރީން ވިދާޅުވީ، ދަނޑުވެރިކަމުގެ މަސައްކަތުން ލިބޭ ނަފާ އިތުރުކުރުމަށް ކުރަންޖެހޭ ޚަރަދު ކުޑަކުރުމަށް ބާރުއެޅުމުގެ ގޮތުން މިރަށްތަކަށް ދެއްކުމަށް ހަމަޖެހިފައިވާ އަހަރީ ފީއަކީ އަހަރަކަށް އަކަފޫޓަކަށް 10 ލާރިކަމަށެވެ. އަދި މި ރަށްރަށުގެ ބިމުގެ ސަރަޙައްދުން ގިނަވެގެން 30 އިންސައްތައިގައި މިނިސްޓްރީން ކަނޑައަޅާ ކާނާގެ ބާވަތްތައް އުފައްދަން ޖެހޭނެއެވެ.