މިއަހަރުގެ ތެރޭގައި ރާއްޖެ އިޝްތިހާރުކުރުމަށް 412 ޙަރަކާތެއް ކުރިއަށްގެންދެވިފައިވާކަމަށް މޯލްޑިވްސް މާކެޓިންގ އެންޑް ޕަބްލިކް ރިލޭޝަން ކޯޕަރޭޝަން، އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު މުޙައްމަދު ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަދައްކަވަމުން އެމްއެމްޕީއާރުސީގެ މެނޭޖިންގ ޑިރެކްޓަރ ޠައްޔިބު ވިދާޅުވީ، މިއަހަރުގެ ތެރޭގައި ރާއްޖެ އިޝްތިހާރުކުރުމަށް ގިނަ މަސައްކަތްތަކެއް ކުރެވިފައިވާ ކަމަށެވެ. އޭގެތެރޭގައި ޓްރެވެލް އެޖެންޓުން ތަމްރީން ކުރުމަށް އޮންލައިންކޮށް ކުރިއަށް ގެންދިޔަ ހަރަކާތް އޭނާ ފާހަގަކުރެއްވިއެވެ. ޓްރެވެލް އެޖެންޓުންނަށް ރާއްޖޭގައި ހުރި ޕްރޮޑަކްޓްތައް ބުނެދީ، ރާއްޖޭގައި ތަޖުރިބާކުރެވިދާނެ ކަންކަންވެސް މި ޓްރެއިނިންތަކުގެ ތެރޭގައި ބުނެދީފައިވާކަމަށް ޠައްޔިބު ވިދާޅުވިއެވެ.
މީގެއިތުރުން ރާއްޖެ އިޝްތިހާރުކުރުމަށް ދުނިޔޭގެ އެންމެ ބޮޑެތި އެއަރލައިންތަކާއި ގުޅިގެންވެސް މިހާރު މަސައްކަތްތަކެއް ފަށާފައިވާކަމަށް ޓައްޔިބު ވިދާޅުވިއެވެ. އޭގެތެރޭގައި ޤަތަރު އެއަރވޭސް، ސިންގަޕޯރ އެއަރލައިން، އަދި އިއްތިހާދު އެއަރލައިން އާއިއެކު ކެންޕެއިންތަކެއް ފަށާފައިވާކަން އޭނާ ފާހަގަކުރެއްވިއެވެ.
"412 ހަރަކާތް ކުރިއަށްގެންދެވިއްޖެ މިއަހަރު. އެއީ 22 ގްލޯބަލް މާކެޓްގައި. ކޯވިޑްގެ ކަންތަކުގެ ތެރޭގައި 314 ހަރަކާތް މިގެންދެވުނީ." ޠައްޔިބު ވިދާޅުވިއެވެ.
ވޯލްޑް ޓްރެވެލް އެވޯޑްސްގެ "ލީޑިންގ ޑެސްޓިނޭޝަން" ގެ އެވޯޑް ފުރަތަމަ ފަހަރަށް ރާއްޖެއަށް ލިބުމާއި ގުޅިގެން ޠައްޔިބު ވިދާޅުވީ، މި އެވޯޑް ލިބުނީ ރާއްޖޭގެ ފަތުރުވެރިކަމުގެ ސިނާއަތުގައި ޙަރަކާތްތެރިވާ އެންމެންގެ ބުރަ މަސައްކަތުންކަމަށެވެ. ރާއްޖެ އިޝްތިހާރު ކުރާއިރު ކޮންމެ ފަރާތަކަށްވެސް މި އެވޯޑް ބޭނުންކޮށްގެން އެބައެއްގެ ފެސިލިޓީތައް އިޝްތިހާރުކުރެވޭނެކަމަށެވެ.
"މާކެޓިންގ ހަރަކާތްތަކުގައި ބޭނުންކުރުމަށް މި އެވޯޑް މިއީ ވަރަށް މުހިންމު އެއްޗެއް. މީގަ ކޮންމެހެން އަޅުގަނޑުމެން އެކަންޏެއްނޫން. މި އިންޑަސްޓްރީގެ ކޮންމެ ބޭފުޅަކުވެސް ބޭނުންކުރަންވީ. އެބޭފުޅުންގެ މާކެޓިންގެ ކޮންމެ އެއްޗެއްގައި ވޯލްޑް ޓްރެވެލް އެވޯޑްސްގެ ލޯގޯ ޖައްސަވާފައި، ވޯލްޑްސް ލީޑިންގ ޑެސްޓިނޭޝަން ޖަހާލާފައި ބެއިންދީމަ އެއީ އަޅުގަނޑުމެންނަށް ލިބޭ ވަރަށް ބޮޑު ބަރުދަނެއް" ޠައްޔިބު ވިދާޅުވިއެވެ.
ފަތުރުވެރިކަމުގެ ދާއިރާއިން މުޅި ދުނިޔޭގެ އެންމެ ޝަރަފްވެރި އެވޯޑްކަމަށްވާ "ވޯލްޑް ލީޑިންގ ޑެސްޓިނޭޝަން" އެވޯޑް ރާއްޖެއަށް ލިބުނުކަން އިއުލާން ކޮށްފައި ވަނީ މިމަހުގެ 27 ވަނަ ދުވަހު ވާޗުއަލްކޮށް ބޭއްވި ވޯލްޑް ޓްރެވަލް އެވޯޑްސް 2020ގެ ގްރޭންޑް ފިނާލޭ ހަފްލާގައެވެ. 2020 ވަނަ އަހަރުގެ ވޯލްޑް ލީޑިންގ ޑެސްޓިނޭޝަންގެ އެވޯޑް ރާއްޖެއަށް ލިބިފައިވާއިރު މިއީ މި އެވޯޑް ރާއްޖޭގެ ފަތުރުވެރިކަމުގެ ދިގު ތާރީހުގައި ލިބުނު ފުރަތަމަ ފަހަރެވެ. މި އެވޯޑް ރާއްޖެއަށް ލިބިފައިވަނީ ދުނިޔޭގެ 22 މަންޒިލަކާއި ވާދަކޮށްގެންނެވެ.