މޯލްޑިވިއަންގެ ފްލައިޓްތައް ކެންސަލްވީކަމަށްބުނެ ސޯޝަލް މީޑިއާގައި ދައުރުވަމުންދަނީ ދޮގު މައުލޫމާތެއްކަމަށް މޯލްޑިވިއަނުން ބުނެފިއެވެ.
ރާއްޖޭގެ ޤައުމީ އެއަރލައިން މޯލްޑިވިއަނުން ބުނީ އެ ކުންފުނީގެ އެއްވެސް ފްލައިޓެއް ކެންސަލްކޮށްފައިނުވާނެކަމަށާއި، ސޯޝަލް މީޑިއާގައި ދައުރުވަމުންދާ ޕޯސްޓުގައިވަނީ ރަނގަޅު މައުލޫމާތެއް ނޫންކަމަށެވެ. ފްލައިޓްތަކަށް އެއްވެސް ބަދަލެއް އަތުވެއްޖެނަމަ މޯލްޑިވިއަންގެ ޓީމުން އެކަން އަންގަމުންދާނެކަމަށްވެސް މޯލްޑިވިއަނުން ވަނީ ބުނެފައެވެ.
ސޯޝަލް މީޑިއާގައި ދައުރުވެފައިވާ ޕޯސްޓެއްގައި ބުނެފައިވަނީ ވީއައިއޭގެ ކްލަސްޓަރއަކާއި ގުޅިގެން މޯލްޑިވިއަންގެ ހުރިހާ ފްލައިޓެއް ކެންސަލްވެފައިވާކަމަށެވެ. މޯލްޑިވިއަނުން ބުނީ އެ ކުންފުނީގެ ޓްވިޓަރ އެކައުންޓާއި ވައިބަރ އެކައުންޓަކީ ވެރިފައިޑް އެކައުންޓްތަކެއްކަމަށެވެ. އެހެންކަމުން އެންމެ ފަހުގެ މައުލޫމާތުތައް ހޯދުމަށް އެއެކައުންޓްތައް ބެލުމަށް ކަސްޓަމަރުންގެ ކިބައިން މޯލްޑިވިއަނުންވަނީ އެދިފައެވެ.
މޯލްޑިވިއަނުން އަންނަނީ މާލެ އާއިއެކު ރާއްޖޭގެ 15 ސަރަހައްދަކަށް ދަތުރުތައް ކުރަމުންނެވެ. އަދި މިމަހުގެ 26 ގައި ހޯރަފުށި އެއަރޕޯޓަށް ދަތުރުތައް ފެށުމުން މިއަދަދު 16 އަށް އިތުރުވެގެންދާނެއެވެ.