ޔޫރަޕްގެ ވިޔަފާރިތަކަށް ރާއްޖެއިން ފަހި ފުރުސަތުތައް ހުޅުވާލުމާއި ބެހޭގޮތުން މަޝްވަރާކޮށްފި
ޔޫރަޕްގެ ވިޔަފާރިތަކަށް ރާއްޖެއިން ފަހި ފުރުސަތުތައް ހުޅުވާލުމާއި ބެހޭގޮތުން ދިވެހިރާއްޖެއާއި ޔޫރަޕިއަން ޔޫނިއަންއާއި ދެމެދު މަޝްވަރާކޮށްފިއެވެ. މިމަޝްވަރާތައް ކުރިއަށްގެންގޮސްފައިވަނީ ދިވެހިރާއްޖެއާއި ޔޫރަޕިއަން ޔޫނިއަންއާ ދެމެދު ބާއްވާ ޕޮލިސީ ޑައިލޮގްގެ ފަސްވަނަ ބުރުގެ ތެރެއިންނެވެ.
ޕޮލިސީ ޑައިލޮގްގެ ފަސްވަނަ ބުރުގެ މި ބައްދަލުވުމުގައި ވިޔަފާރީގެ ދާއިރާއިން ޔޫރަޕިއަން ޔޫނިއަންއާއެކު އޮންނަ ގުޅުން އިތުރުކޮށް، ޔޫރަޕްގެ ވިޔަފާރިތަކަށް ރާއްޖެއިން ފަހި ފުރުސަތުތައް ހުޅުވާލުމަށް މަޝްވަރާކުރައްވާފައިވާ ކަމަށް ފޮރިން މިނިސްޓްރީން ވިދާޅުވިއެވެ. އަދި ބިޒްނަސް ރައުންޑް ޓޭބަލް އިނީޝިއޭޓިވްގެ ތެރެއިން މިކަމާގުޅޭ މަޝްވަރާތައް ކުރިއަށް ގެންދިޔުމަށް އެއްބަސްވެފައިވާ ކަމަށްވެސް އެމިނިސްޓްރީން ވިދާޅުވެއެވެ.
މިބައްދަލުވުމުގައި ދިވެހި ކަނޑުމަހުގެ ބާވަތްތައް ޔޫރަޕިއަން ޔޫނިއަންއަށް އެތެރެކުރުމަށް ޑިއުޓީ މައާފްކުރުމާ ގުޅޭ ގޮތުން މަޝްވަރާކުރައްވާފައިވާ ކަމަށާއި، އަދި ދިވެހި ކަނޑުމަހުގެ ބާވަތްތައް ޔޫރަޕަށް އެތެރެކުރުމަށް ހުރި ފުރުސަތުތަކާ ބެހޭ ގޮތުން އިތުރަށް މަޝްވަރާކުރުމުގެ ޝައުޤުވެރިކަން އީޔޫގެ ސަފީރުން ފާޅުކުރައްވާފައިވާ ކަމަށްވެސް ފޮރިން މިނިސްޓްރީން ވިދާޅުވެއެވެ. އަދި ރާއްޖޭގެ ކަނޑުގެ ސަރަހައްދުގައި ޤަވާޢިދާ ޚިލާފަށް މަސްވެރިކަން ކުރުން ހުއްޓުވުމަށް ދިވެހި ސަރުކާރުން އަޅާފައިވާ ފިޔަވަޅުތަކަށް ޔޫރަޕިއަން ޔޫނިއަންއިން މަރުޙަބާކިޔައި، އެދާއިރާއިން އިތުރަށް ގުޅިގެން މަސައްކަތްކުރުމުގެ މުހިއްމުކަންވެސް އީޔޫ ސަފީރުންވަނީ މިބައްދަލުވުމުގައި ފާހަގަކުރައްވާފައެވެ.
މީގެ އިތުރުންވެސް ޑިމޮކްރަސީއާއި، ހިންގުމުގެ ދާއިރާއާއި، ޝަރުޢީ ދާއިރާ އިތުރަށް ހަރުދަނާ ކުރުމާއި، އިންސާނީ ޙައްޤުތައް ހިމާޔަތްކޮށް ކުރިއެރުވުމާއި، ނުރައްކަލަށް ހުށަހެޅޭ ފަރާތްތަކަށް ރައްކާތެރިކަން ދިނުމާއި، ސަލާމަތީ ދާއިރާއިން ގުޅުން ބަދަހި ކުރުމާ ގުޅޭގޮތުންނާއި، ތިމާވެއްޓާއި މޫސުމީ ބަދަލުތަކާ ގުޅޭގޮތުން މިބައްދަލުވުމުގައި މަޝްވަރާކުރައްވާފައިވެއެވެ. އަދި ކޯވިޑް-19ގެ ސަބަބުން ލިބިފައިވާ ގެއްލުންތަކުން އަރައިގަތުމަށް ދެމެހެއްޓެނިވި އިޤްތިޞާދީ އިޖްތިމާޢީ ތަރައްޤީ ކަށަވަރުކުރުމަށް ހެދިފައިވާ ޕްލޭންތަކާ ބެހޭގޮތުންވެސް މިބައްދަލުވުމުގައި އީޔޫ ސަފީރުންނަށްވަނީ މަޢުލޫމާތު އަރުއްވާފައެވެ. އަދި ކޯވިޑާއި ގުޅިގެން ޔޫރަޕިއަން ޔޫނިއަންއިން ފޯރުކޮށްދީފައިވާ އެހީތަކަށް ދިވެހި ސަރުކާރުންވަނީ ޝުކުރު އަދާކުރައްވާފައެވެ.
ދިވެހިރާއްޖެއާއި ޔޫރަޕިއަން ޔޫނިއަންއާ ދެމެދު އޮންނަ ގުޅުން ފާއިތުވެދިޔަ ދެއަހަރުތެރޭގައި ބަދަހިވެ، ދެފަރާތް ގުޅިގެންވަނީ ގިނަ މަސައްކަތްތަކެއް ކުރައްވާފައެވެ.
މޯލްޑިވްސް-އީޔޫ ޕޮލިސީ ޑައިލޮގަކީ ތަފާތު އެކި ދާއިރާތަކުން ދިވެހިރާއްޖެއާއި ޔޫރަޕިއަން ޔޫނިއަންއާ ދެމެދު ގުޅުން ބަދަހިކުރުމުގެ ގޮތުން އަހަރަކު އެއް ފަހަރު ބާއްވާ މަޝްވަރާ ބައްދަލުވުމެކެވެ. ކޯވިޑް-19ގެ ބަލިމަޑުކަމުގެ ސަބަބުން މިއަހަރުގެ ޑައިލޮގް ބާއްވާފައިވަނީ ވަރޗުއަލް ކޮށެވެ. މިއަހަރުގެ ބައްދަލުވުމުގައި ރާއްޖޭގެ ވަފްދުގައި އިސްކޮށް ހުންނެވީ ފޮރިން މިނިސްޓަރ ޢަބްދުﷲ ޝާހިދެވެ.