މިހާތަނަށް 2675 މަސްވެރިއަކަށް "މަސްވެރިޔާ ކާޑު" ދޫކޮށްފައިވާކަމަށް މިނިސްޓްރީ އޮފް ފިޝާރީޒް މެރިން ރިސޯސަސް އެންޑް އެގްރިކަލްޗަރއިން ވިދާޅުވެއްޖެއެވެ.
މަސްވެރިޔާ އެކައުންޓް ތައާރަފްކޮށް ދިވެހި ހުރިހައި މަސްވެރިން ބޭންކިންގ ނިޒާމްގެ ތެރެއަށް ވެއްދުމަކީ މިސަރުކާރުގެ ވައުދެކެވެ. މަސްވެރިޔާ ކާޑާއި ޑިޖިޓަލް ވޮލެޓަކީ މަސްވެރިން ވިއްކާ މަހަށް ވަގުތުން ފައިސާލިބޭ ވަސީލަތެކެވެ. މަސްވެރިޔާ ކާޑާއި ޑިޖިޓަލް ވޮލެޓް ތަޢާރަފްކޮށްފައިވަނީ 2019ވަނަ އަހަރުގެ ފެބްރުއަރީމަހުގެ ތެރޭގައި ކޫއްޑޫގައި ބޭއްވި ޚާއްސަ ރަސްމިއްޔާތެއްގައި ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙެވެ.
ފިޝަރީޒް މިނިސްޓްރީން ވިދާޅުވީ، މިހާތަނަށް 2675 މަސްވެރިއަކަށް މަސްވެރިޔާ ކާޑު އަދި 60 އޮޑިވެރިއަކަށް އޮޑިވެރިޔާ ކާޑު ދޫކޮށްފައިވާކަމަށެވެ. ލޮކްޑައުންގެ ތެރޭގައި މަސްވެރިންނާއި ހަމައަށް ފައިސާ ގެންދިއުމުގައި ދިމާވި ދަތިތަކަށް ހައްލެއް ލިބިގެންދިޔައީވެސް މަސްވެރިޔާ ކާޑުގެ ސަބަބުންކަމަށް މިފްކޯއިން ވަނީ މީގެކުރިން ބުނެފައެވެ.
މި ކާޑު ތައާރަފްކޮށްފައިވަނީ މިނިސްޓްރީ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ އާއި ބޭންކް އޮފް މޯލްޑިވްސް ގުޅިގެންނެވެ. މަސްވެރިޔާ ކާޑާއި ޑިޖިޓަލް ވޮލެޓާއެކު މަސްވެރިންނަށް ޑިޖިޓަލް ވޮލެޓަކާއި ލިންކުކޮށްފައިވާ ޚާއްސަ ކާޑެއް ބޭނުންކޮށްގެން ފަސޭހަކަމާއެކު ބޭންކިންގ މުއާމަލާތްތައް ހިންގެއެވެ. މަސްވެރިޔާ ކާޑަކީ ދޯނީގެ ކެޔޮޅުންނާއި ފަޅުވެރިންނަށް ފައިސާ ލިބިގަތުމަށާއި ކުރަންޖެހޭ ޚަރަދުތައްކުރުމަށް ބޭނުންކުރެވޭގޮތަށް ފަރުމާކުރެވިފައިވާ ކާޑެކެވެ.
މަސްވެރިންގެ އަތުން މަސް ގަންނަ ކުންފުނިތަކަށް މި ޑިޖިޓަލް ވޮލެޓާއެކު ހިމެނޭ އޮންލައިން ޕޯޓަލް މެދުވެރިކޮށް މަސްދޯނިތަކަށް ފައިސާ ދެއްކޭނެއެވެ. އެއާއެކު މިފަދަ ކުންފުނިތަކަށް ބޭނުންވާ ނަގުދު ފައިސާގެ މިންވަރު ދަށްކުރެވިގެންދާނެއެވެ. މަސްދޯނިތަކަށް ބޭނުންވާ ތެޔޮ އަދި އައިސް ގަތުމުގެ އިތުރުން ފަޅުވެރިންނަށް ލިބެންޖެހޭ ފައިސާވެސް ފަޅުވެރިންގެ މަސްވެރިޔާ ކާޑަށް ފޮނުވާލެވޭނެއެވެ.
ބީއެމްއެލްގެ ކޮންމެ ބުރާންޗަކުންވެސް މި ކާޑަށް އެދެވޭނެއެވެ. އަދި މާސްޓަރ ކާޑު ބޭނުންކުރެވޭ ޤައުމުތަކުގައިވެސް މަސްވެރިޔާ ކާޑު ބޭނުންކުރެވޭނެއެވެ. މި ކާޑަށް އެޕްލައިކުރާއިރު ބޭންކް އޮފް މޯލްޑިވްސްގެ އެކައުންޓެއް ހުންނާކަށްވެސް ނުޖެހޭނެއެވެ.