ވިޔަފާރިތައް ކުރިއެރުވުމުގެ ގޮތުން އެޗްޑީސީން "އީޖާދީ މަންސަ" ގެ ނަމުގައި މުބާރާތެއް އިފްތިތާހުކޮށްފި
ޒުވާނުންނަށް ވިޔަފާރި ފެށުމާއި ވިޔަފާރިތަކުގައި ކުރިއަށްދިއުމަށް މަގުފަހިކޮށްދިނުމުގެ ގޮތުން ހައުސިން ޑިވެލޮޕްމަންޓް ކޯޕަރޭޝަން، އެޗްޑީސީން "އީޖާދީ މަންސަ" ގެ ނަމުގައި މުބާރާތެއް ފަށައިފިއެވެ.
މި މުބާރާތް ރަސްމީކޮށް އިފްތިތާހްކޮށްދެއްވާފައި ވަނީ އިކޮނޮމިކް މިނިސްޓަރ އަލްއުސްތާދު ފައްޔާޟު އިސްމާއިލްއެވެ.
އީޖާދީ މަންސަ މުބާރާތަކީ ކުދި އަދި މެދުފަންތީގެ ވިޔަފާރިތައް ފަށަން ގަސްތުކުރާ ޒުވާނުންނަށް އެ ޒުވާނުންގެ އައު ހިޔާލުތައް ދައްކުވައިދީ ވާދަވެރި މާހައުލެއްގައި މިހިޔާލުތައް އަސްލަކަށް ހެދުމަށް މަގުފަހިކޮށްދޭ މުބާރާތެއްކަމަށް އެޗްޑީސީން ވިދާޅުވެއެވެ. މި މުބާރާތުގެ އެންމެ މުހިންމު ބޭނުމަކީ ކޯވިޑް19 އިން ލިބުނު ގެއްލުމުން އަރައިގަނެ ޒުވާން ވިޔަފާރިވެރިން އުފައްދައި ކުދި އަދި މެދުފަންތީގެ ވިޔަފާރިތަކަށް އިތުރު ކުރިއެރުންތައް ހޯދައިދިނުމެވެ.
މި މުބާރާތް އިފްތިތާހުކޮށްދެއްވައި ވާހަކަދައްކަވަމުން އިކޮނޮމިކް މިނިސްޓަރ ވިދާޅުވީ ސަރުކާރުގެ ކުންފުނިތަކުގެ ތެރެއިން އެޗްޑީސީއަކީ އެސްއެމްއީތައް ކުރިއެރުވުމަށް ގިނަ މަސައްކަތްތަކެއް ކުރައްވަމުންއަންނަ ކުންފުންޏެއްކަމަށެވެ. އަދި ކުރިއަށްއޮތް ތަނުގައިވެސް ރާއްޖޭގެ އެކި ސަރަހައްދުތަކުގައި ޒުވާން ވިޔަފާރިވެރިން އުފެއްދުމަށް ޙާއްސަ ޕްރޮގުރާމްތަކެއް ކުރިއަށްގެންދިއުމަށް ނިންމާފައިވާކަމަށާއި، މި މުބާރާތަކީ އެކަމުގެ ފެށުމެއްކަމަށެވެ.
"އަޅުގަނޑުމެންގެ ޙާއްސަ ޕްރޮގުރާމްތަކެއް ޙައްސަ ޕޮރޮގުރާމްތަކެއް ބީސީސީއާއި އަދި އެޗްޑީސީއާއި މަޝްވަރާކޮށްގެން ކުރިއަށްގެންދަން މި ގަސްތުކުރަނީ މާލެ ސަރަހައްދުގައާއި އަދިވެސް އިޤްތިސާދީ ހަރަކާތްތައް ރަނގަޅަށް ހިނގާ ދިވެހިރާއްޖޭގެ އެކި ކަންގޮޅުތަކުގައި ޙާއްސަ ޕްރޮގުރާމްތަކެއް ހިންގައިގެން ޒުވާން ވިޔަފާރިވެރިންތަކެއް ހިންގުމުގެ ޕްރޮގުރާމްތަކެއް." މިނިސްޓަރ ފައްޔާޟު ވިދާޅުވިއެވެ.
އީޖާދީ މަންސަ މުބާރާތް ކުރިއަށްދާނީ ޖުމްލަ 5 ދާއިރާއަކަށް ބަހާލައިގެންނެވެ. އެއީ ދުޅަހެޔޮ ނުވަތަ ވެލްނަސްގެ ދާއިރާ، ވައްޓަފާޅި ނުވަތަ ލައިފްސްޓައިލްގެ ދާއިރާ، ޚިދުމަތް ދިނުމުގެ ދާއިރާ، ފަންނު ނުވަތަ އާރޓްގެ ދާއިރާ، އަދި ކާބޯތަކެތީގެ ދާއިރާއެވެ.
މި މުބާރާތުގައި މިވަގުތު ޙިދުމަތްދެމުންއަންނަ ވިޔަފާރިތަކަށާއި، ގޭގަ މަސައްކަތްކުރާ ފަރާތްތަކަށާއި، އޮންލައިން ވިޔަފާރިކުރާ ފަރާތްތަކަށް، ވިޔަފާރި ފައްޓަން ބޭނުންވާ ފަރާތްތަކަށްވެސް ބައިވެރިވެވޭނެކަމަށް އެޗްޑީސީން ބުނެއެވެ. މި މުބާރާތުގައި ބައިވެރިވުމުގެ ޝަރުތުތަކުގެ ތެރޭގައި 18 އަހަރުން މަތީގެ ދިވެއްސަކަށް ވުމާއި، ރާއްޖޭގައި ދިރިއުޅޭ ފަރާތަކަށް ވުން ހިމެނެއެވެ.
މުބާރާތުގައި ބައިވެރިވުމަށްޓަކައި ފުރަތަމަ ބިޒްނަސް ޕްލޭންއެއް ބައިވެރިން ހުށައަޅަން ޖެހެއެވެ. ބިޒްނަސް ޕްލޭން ހުށައަޅަންޖެހޭނީ އެޗްޑީސީން ދީފައިވާ ގައިޑްލައިންތަކާއި، ބިޒްނަސް ޕްލޭން ފޯމެޓާއި އެއްގޮތްވާގޮތަށެވެ. އެއަށްފަހު ޝޯޓްލިސްޓްކުރާ ފަރާތްތަކުން ޕްރެޒެންޓޭޝަންއެއް ދިނުމުން އޭގެތެރެއިން ޖުމްލަ 10 ފަރާތެއް ހޮވުމަށް ވަނީ ނިންމާފައެވެ. ކޮންމެ ކެޓަގަރީއަކުން 1 ވަނަ 2 ވަނަ ހޮވާނެކަމަށް އެޗްޑީސީން ވިދާޅުވެއެވެ. ވަނަ ހޮވޭ ކޮންމެ ފަރާތަކަށް 550 އަކަފޫޓުގެ ކޮމާޝަލް އޭރިއާއެއް ދިނުމަށް ވަނީ ނިންމާފައެވެ. އަދި ވަކި މުއްދަތަކަށް މިތަންތަނުގެ ކުލި ދައްކާކަށް ނުޖެހޭނެއެވެ.