ރާއްޖޭގެ މަސްވެރިން ބާނާ މަސް އެއްވެސް ދައްޗެއްނެތި ސްރީ ލަންކާއަށް އެތެރެކުރެވޭނެކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ސާލިޙް ވިދާޅުވެއްޖެއެވެ.
ހޯރަފުށީ އެއަރޕޯޓް ހުޅުވުމުގެ ރަސްމިއްޔާތުގައި ވާހަކަފުޅުދައްކަވަމުން ރައީސް ވިދާޅުވީ، ރާއްޖޭގެ ހިކިކަނޑުމަހާއި ލޮނު މަސް ސިލޯނަށް އެތެރެކުރުމަށް ހުރަސްތަކެއް ހުރިކަމުގެ ވާހަކަ ފެތުރިފައިވާކަމަށެވެ. މިއީ މިވަގުތު މަސްވެރިންނަށް ދިމާވެފައިވާ އެންމެބޮޑު އެއް ކަންބޮޑުވުންކަން ފާހަގަކުރައްވައި ރައީސް ވިދާޅުވީ، މިކަމަށް ހައްލު ހޯދުމުގެ މަސައްކަތް ފޮރިން މިނިސްޓްރީން ފަށްޓަވާފައިވާކަމަށެވެ. އަދި އެޤައުމުގެ ފިނޭންސް މިނިސްޓްރީން ރާއްޖޭގެ ހިކިކަނޑުމަހާއި ލޮނުމަސް ލަންކާއަށް އެތެރެކުރުން މަނާކުރާ އެއްވެސް ޕޮލިސީއެއް އަދި ސިލޯނުގެ ސަރުކާރުގައި ނެތްކަމުގެ ޔަޤީންކަން ދެއްވާފައިވާކަމަށް ރައީސުލްޖުމްހޫރިއްޔާ ވިދާޅުވިއެވެ.
"ފޮރިން މިނިސްޓަރަށް ސިލޯނުގެ ކަސްޓަމްސްއިން ފޮނުވާފައޮތް ސިޓީއެއް އެބައޮތް އަޅުގަނޑަށް ލިބިފައި. އެސިޓީގައި އޮތީ ސިލޯނުގެ ފިނޭންސް މިނިސްޓްރީއާ ޙަވާލާދެއްވައި ރާއްޖޭގެ ހިކިކަނޑުމަހާއި ލޮނުމަސް އެތެރެކުރުން މަނާކުރާ އެއްވެސް ޕޮލިސީއެއް އަދި ސިލޯނުގެ ސަރުކާރުގައި ނެތް ވާހަކަ. އެހެންކަމުން ދައްޗެއް ނެތި ރާއްޖޭގެ މަސްވެރިންގެ މަސް ސިލޯނަށް އެތެރެކުރެވޭނެކަމުގެ ޔަޤީންކަން ފޮރިން މިނިސްޓަރ މިހާރު ވަނީ އަޅުގަނޑުމެންނަށް ދެއްވާފައި." ރައީސް ވިދާޅުވިއެވެ.
މިކަމާއި ގުޅޭގޮތުން ފޮރިން މިނިސްޓަރ އަބްދުﷲ ޝާހިދު ކުރެއްވި ޓްވިޓެއްގައިވަނީ ރާއްޖޭގެ ކަނޑުމަސް އަދި ކަނޑުމަހުގެ އުފެއްދުންތައް ލަންކާއަށް އެތެރެކުރުމުގެ އެއްވެސް ހުރަހެއް ނެތްކަން ސްރީލަންކާގެ ކަމާގުޅޭ ފަރާތްތަކުން ކަށަވަރުކޮށްދެއްވާފައިވާތީ އެފަރާތްތަކަށް ޝުކުރު އަދާކުރައްވާފައެވެ.
ލަންކާގެ އާ ސަރުކާރާއިއެކު، ގައުމުގެ މަސްވެރިންނަށް ފުރުސަތު ފަހިކޮށްދިނުމަށް، އެހެން ޤައުމުތަކުން އެ ޤައުމަށް އެތެރެކުރާ މަހުގެ ބާވަތްތަކުން ނަގާ ޓެކްސްވަނީ ބޮޑުކޮށްފައެވެ. އާ ޓެކުހުގެ ރޭޓުތަކުގައިވާގޮތުން ރާއްޖެއިން އެޤައުމަށް އެތެރެކުރާ މަހުގެ ބާވަތްތަކުން ޓެކްސްގެ ގޮތުގައި ކިލޯއަކަށް 62.49 ރުފިޔާ ނެގުމަށް އެޤައުމުން ވަނީ ނިންމާފައެވެ.
ރާއްޖެއިން އެތެރެކުރާ ވަޅޯމަހާއި ހިކިމަހަކީ ލަންކާގައި މަގުބޫލު ބާވަތްތަކެކެވެ. މިދިޔަ އަހަރުވެސް އެ ޤައުމަށް 5000 ޓަނުގެ މަސް ރާއްޖެއިން އެކްސްޕޯޓްކޮށްފައިވާކަމަށް ފިޝަރީޒް މިނިސްޓްރީއިން ހާމަކުރައްވައެވެ.