ތިލަދުންމަތީ އުތުރުބުރީ ހޯރަފުށި އެއަރޕޯޓް ހުޅުވުމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިހް ވަޑައިގަތުމުން އެރަށުން އެމަނިކުފާނަށް ވަރަށް ހޫނު މަރުޙަބާއެއް ދަންނަވައިފިއެވެ.
ރައިސުލްޖުމްހޫރިއްޔާ ހޯރަފުއްޓަށް ވަޑައިގަތީ މެންދުރު 13:00 ހާއިރުއެވެ. އެމަނިކުފާނަށް މަރުޙަބާ ދެނެންވުމަށް ހޯރަފުއްޓާއި އެސަރަހައްދުގެ ރައްތަކުގެ ގިނަ ޢަދަދެއްގެ ރައްޔިތުން ވަނީ ހޯރަފުށީ އެއަރޕޯޓް ސަރަހައްދަށް ޖަމާވެފައެވެ. އަދި އެރަށު ރައްޔިތުންގެ ފަރާތުން އެމަނިކުފާނަށް މަރުހަބާ ދެންނެވުމަށް ގިނަ ހަރަކާތްތަކެއް ހުށައަޅާފައިވެއެވެ.
ރައީސުލްޖުމްހޫރިއްޔާގެ އަރިހުގައި ޓްރާންސްޕޯޓް މިނިސްޓަރ އައިޝަތު ނަހުލާވެސް މިދަތުރުފުޅުގައި ބައިވެރިވެވަޑައިގަންނަވައެވެ.
ހޯރަފުށި އެއަރޕޯޓް ހުޅުވުމަށް މުޅި ރަށްވަނީ ޒީނަތްތެރިކޮށްފައެވެ. އަދި އެ އެއަރޕޯޓް ހުޅުވުމުގެ ރަސްމިއްޔާތުގައި ބައިވެރިވުމަށް އުތުރުގެ އެކި ރަށްރަށުން މީހުން މިހާރުވެސް ދަނީ ހޯރަފުއްޓަށް ޒިޔާރަތްކުރަމުންނެވެ. ހޯރަފުށީ އެއަރޕޯޓްވެގެން ގޮސްފައިވަނީ، އެންމެ ކުރުމުއްދަތެއްގެ ތެރޭގައި ބިން ހިއްކައިގެން އެއަރޕޯޓް އަޅާ ޓެސްޓް ފްލައިޓް ޖެއްސި އެއަރޕޯޓަށެވެ. ހއ. ހޯރަފުށީ އެއަރޕޯޓްގެ ބިން ހިއްކުމުގެ މަސައްކަތް މުޅިން ނިންމާލާފައިވަނީ ދޮޅުއަހަރުދުވަހުގެ ތެރޭގައެވެ.
198 މިލިއަން ރުފިޔާ ޚަރަދުކޮށްގެން ހއ.ހޯރަފުށީގައި އެއަރޕޯޓެއް ތަރައްޤީކޮށްފައިވާއިރު މި އެއަރޕޯޓްގައި 1200 މީޓަރު ދިގު، 35 މީޓަރު ފުޅާ ރަންވޭއެއް އޮވެއެވެ. އަދި 8635 ސްކުއަރ މީޓަރުގެ އޭޕްރަން އަކާއި ޓެކްސީ ވޭއެއްގެ އިތުރުން ސާވިސް މަގުތަކާއި، 9473 ސްކުއަރ މީޓަރުގެ ޕާކިން އޭރިއާއަކާއި 1718 ސްކުއަރ މީޓަރުގެ ފަޔާ އެކްސެސް މަގެއްވެސް މި މަޝްރޫޢުގެ ދަށުން ވަނީ ތަރައްޤީކޮށްފައެވެ.