އަމާނާ ތަކާފުލްގެ ފައިދާގެ %7.5 ހިއްސާދާރުންނަށް ބެހުމަށް ނިންމައިފިއެވެ.
އަމާނާތަކާފުލްގެ ޑިރެކްޓަރުންގެ ބޯޑުން ވަނީ 2020 ވަނައަހަރުގެ ފުރަތަމަ އިންޓެރިމް ފައިދާ ބެހުމަށް ނިންމާފައެވެ. މިގޮތަށް ނިންމާފައިވަނީ މިމަހުގެ 16 ވަނަ ދުވަހު ބޭއްވި އެ ކުންފުނީގެ ޑިރެކްޓަރުންގެ ބޯޑުގެ ބައްދަލުވުމުގައެވެ. މި ބައްދަލުވުމުގައި ފައިދާބެހުމަށް ކަނޑައެޅުމުގެ އިތުރުން މިހިނގާ 2020 ވަނައަހަރުގެ މިހާތަނަށް ކަންކަން ހިނގާފައިވާ ގޮތުގެ ރިޕޯޓުތައް ދިރާސާކުރުމާއި އަދި 2021 ވަނައަހަރަށް ކަނޑައަޅާފައިވާ ބަޖެޓް ދިރާސާކޮށް ފާސްކުރުންވެސް ވަނީ ކުރިއަށްގެންގޮސްފައެވެ.
މި އަހަރުގެ އޮކްޓޯބަރގެ ނިޔަލަށް އަމާނާތަކާފުލްއަށް ލިބިފައިވާ ސާފު ފައިދާ ވަނީ އޭގެކުރީ އަހަރާއި އަޅާބަލާއިރު %43 އިތުރުވެފައިކަމަށް އެ ކުންފުނިން ބުނެއެވެ. އެހެންކަމުން ކުންފުނީގެ ވިޔަފާރީގެ ނަތީޖާއަށް ބަލާ ޑިރެކްޓަރުންގެ ބޯޑުން ނިންމާފައިވަނީ %7.5 ފައިދާގެ ގޮތުގައި ހިއްސާދާރުންނަށް ބެހުމަށެވެ. އަދި 30 ނޮވެމްބަރ 2020 ގެ ނިޔަލަށް ކުންފުނީގެ ހިއްސާ ގަނެފައިވާ ފަރާތްތަކަށް ހިއްސާގެ ފައިދާ ބަހާނެއެވެ.
އެ ކުންފުނީގެ ހިއްސާދާރުންގެ ތެރެއިން ވަޒަންވެރިކަން ބަދަލުވެފައިވާ ފަރާތްތަކުން މިމަހުގެ 30 ވަނަ ދުވަހުގެ ކުރިން އެކަން އެންގުމަށްވެސް އަމާނާތަކާފުލްއިން ވަނީ އަންގާފައެވެ. ސަބަބަކީ 1 ޖެނުއަރީ 2020 ގައި ޢަމަލުކުރަން ފަށާފައިވާ "ޢާމްދަނީ އިން ޓެކްސް ނެގުމުގެ ޤާނޫނު" ގައި ބަޔާންކޮށްފައިވާ ފަދައިން "ދިވެހިރާއްޖޭގައި ވަޒަންވެރިވެފައިނުވާ ފަރާތްތަކަށް" ހިއްސާގެ ފައިދާ ބަހާއިރު ވިތުހޯލްޑިންގ ޓެކްސްގެ ގޮތުގައި ފައިދާގެ %10 އުނިކުރުމަށް ޑިވިޑެންޑް ދޭފަރާތަށް ލާޒިމުކުރާތީއެވެ. އަދި، ހިއްސާދާރުގެ ވަޒަންވެރި ހާލަތު ޔަޤީންކުރެވެން ނެތް ހާލަތެއްގައި އެ ހިއްސާދާރަކީ ދިވެހިރާއްޖޭގައި ވަޒަންވެރިވެފައިނުވާ ފަރާތެއްކަމުގައި ބަލައި، ހިއްސާދާރުގެ ޑިވިޑެންޑުގެ %10 އުނިކުރުމަށް ހިއްސާގެފައިދާ ބަހަން ކުންފުންޏަށް ލާޒިމުވެސް ވަނީ ކޮށްފައެވެ.
އަމާނާ ތަކާފުލް މޯލްޑިވްސްއަކީ ދިވެހިރާއްޖޭގައި ހަމައެކަނި ފުލީފްލެޖު އިސްލާމީ އިންޝުއަރަންސް ޚިދުމަތްދޭ ކުންފުންޏެވެ.