ރަޝިޔާގެ "އަޒުރު އެއަރ"އިން މިމަހުގެ 28 ވަނަ ދުވަހު ރާއްޖެއަށް ދަތުރުތައް ފަށަން ނިންމައިފިއެވެ.
އަޒުރު އެއަރގެ ދަތުރުތައް ރާއްޖެއަށް ކުރާނީ ރަޝިއާގެ މޮސްކޯއިން ވެލާނާ އިންޓަނޭޝަނަލް އެއަރޕޯޓަށެވެ. އަޒުރު އެއަރއިން ރާއްޖެއަށް ފަށާ މި ދަތުރުތައް ކުރާނީ ފިނި މޫސުމުގައިކަމަށް އެ އެއަރލައިނުން ބުނެއެވެ. ޝެޑިއުލް ދަތުރުތައް ރާއްޖެއަށް ފަށާއިރު ހަފްތާއަކު 1 ދަތުރު އެ އެއަރލައިނުން ރާއްޖެއަށް ބޭއްވުމަށް ވަނީ ނިންމާފައެވެ. މި ދަތުރު ކުރާނީ ހަފްތާގެ ހޮނިހިރު ދުވަހުއެވެ.
މިދިޔަ އަހަރުގެ ފިނި މޫސުމާއި ދިމާކޮށްވެސް އަޒުރު އެއަރއިން ވަނީ ޗާޓަރ ފްލައިޓްތަކެއްވެސް ރާއްޖެއަށް ބާއްވާފައެވެ. ކޯވިޑް-19 އަށްފަހު ރާއްޖޭގެ ބޯޑަރު އަލުން ހުޅުވާލުމާއިއެކު އެންމެ ގިނަ ފަތުރުވެރިން ރާއްޖެ އަންނަ އެއް ޤައުމަކީ ރަޝިއާއެވެ.
ރަޝިއާގެ އޭރޯފްލޮޓުން ވަނީ ރާއްޖޭގެ ބޯޑަރު ހުޅުވާލުމާއެކު އަލުން ރާއްޖެއަށް ދަތުރުތައް ފަށާފައެވެ. އަދި މިހާރު އެ އެއަރލައިނުން ވަނީ ރާއްޖެއަށް ކުރާ ދަތުރުތައް އިތުރުވެސްކޮށްފައެވެ. އަދި ރަޝިއާގެ ރޮސިޔާ އެއަރލައިނުންވެސްވަނީ މިމަހުގެ ތެރޭގައި ރާއްޖެއަށް ޝެޑިއުލް ދަތުރުތައް ފެށުމަށް ހަމަޖައްސާފައެވެ.
މޯލްޑިވްސް އިމިގްރޭޝަނުން އާންމުކޮށްފައިވާ ތަފާސް ހިސާބުތައް ދައްކާގޮތުންވެސް ރާއްޖޭގެ ބޯޑަރު ހުޅުވާލިފަހުން މިމަހުގެ 11 ވަނަ ދުވަހުގެ ނިޔަލަށް އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިއާއިންނެވެ. އެއީ ޖުމްލަ 11،240 ފަތުރުވެރިންނެވެ.