ސަފާރީތަކުގެ ފަތުރުވެރިން މާލެ ނައިސް ރާއްޖޭގެ 9 ރަށަކުން ޕީސީއާރު ޓެސްޓް ހެދޭނެ އިންތިޒާމް ނޭޝަނަލް ބޯޓިން އެސޯސިއޭޝަން އޮފް މޯލްޑިވްސްއިން ހަމަޖައްސައިފިއެވެ.
ބޯޓިން އެސޯސިއޭޝަނުން ބުނީ އެ އެސޯސިއޭޝަނުން އަބަދުވެސް މަސައްކަތްކުރަނީ ބޯޓިން ސިނާއަތުގެ ކުރިއެރުމަށްކަމަށެވެ. އެގޮތުން ސަފާރީތަކަށް އައިސް އަނބުރާ ޤައުމަށްދާ ފަތުރުވެރިން ކޯވިޑް-19 އަށް ޓެސްޓު ހެދުމަށް މާލެ ނައިސް ރާއްޖޭގެ 9 ރަށަކުން އެކަން ކުރެވޭނެ އިންތިޒާމް މިހާރު ހަމަޖައްސަދީފައިވާކަމަށެވެ. ސަފާރީތަކުގެ ފަތުރުވެރިންނަށް ޕީސީއާރު ޓެސްޓް ހެދުމުގެ އިންތިޒާމް ހަމަޖެހިފައިވާ ރަށްތަކުގެ ތެރޭގައި ހިމެނެނީ ކ.ތުލުސްދޫ، ކ.ހިންމަފުށި، ކ.ދިއްފުށި، ކ.ގުޅި، ކ.ގުރައިދޫ، ކ.މާފުށި، އދ.ދަނގެތި، އދ.ދިގުރަށް އަދި އއ.އުކުޅަހެވެ.
މި ރަށްރަށުން ޕީސީއާރު ޓެސްޓް ހެދޭނެ އިންތިޒާމް ހަމަޖައްސާފައިވަނީ ކަމާގުޅުންހުރި ފަރާތްތަކާއެކު މަޝްވަރާ ކުރުމަށްފަހުކަމަށް ބޯޓިން އެސޯސިއޭޝަނުން ބުނެއެވެ. މިރަށްރަށުން ފަތުރުވެރިއަކަށް ޕީސީއާރު ޓެސްޓް ހަދައިދެނީ 75 ޑޮލަރަށެވެ. ސަފާރީ އުޅަނދުފަހަރުގައި ޗުއްޓީ ހޭދަކުރުމަށްފަހު، ފުރާ ފަތުރުވެރިންގެ ޕީ.ސީ.އާރް ޓެސްޓު ހެދުމުގެ އިންތިޒާމް ކުރިން ހަމަޖެހިފައިއޮތީ ހުޅުމާލެއާއި މާލޭގައި އެކަންޏެވެ.
ރާއްޖޭގެ ބޯޑަރު އަލުން ހުޅުވާލުމާއިއެކު މިހާތަނަށް 122 ސަފާރީއަކަށް ޓޫރިޒަމް މިނިސްޓްރީން ވަނީ އަލުން އޮޕަރޭޓްކުރުމުގެ ހުއްދަ ދީފައެވެ. މިއީ މުޅި ޖުމްލަ 2300 އެނދެވެ.