ކޮންޓްރެކްޓް ފާމިންގެ މަސައްކަތަށް ގިނަ ދަނޑުވެރިންތަކެއް ވަނީ ޝައުޤުވެރިކަން ފާޅުކޮށްފައި- އެގްރޯ ނެޓް
އެގްރޯ ނޭޝަނަލް ކޯޕަރޭޝަންއިން ކުރިއަށްގެންދާ "ކޮންޓްރެކްޓް ފާމިން"ގެ މަސައްކަތަށް ގިނަ ދަނޑުވެރިންތަކެއް މިހާރުވެސް ޝައުގުވެރިކަން ފާޅުކޮށްފައިވާކަމަށް އެ ކޯރޕަރޭޝަނުން ވިދާޅުވެއްޖެއެވެ.
ޕީއެސްއެމް ނިއުސްގެ ރާއްޖެ މިއަދު ޕްރޮގުރާމްގައި ވާހަކަދައްކަވަމުން އެގްރޯ ނޭޝަނަލް ކޯޕަރޭޝަންގެ މެނޭޖިންގ ޑިރެކްޓަރ ހާރޫން ރަޝީދު ވިދާޅުވީ، މިހާރު ކުރިއަށްދަނީ "ކޮންޓްރެކްޓް ފާމިން" މަސައްކަތް ކުރުމަށް ބޭނުންވާ ސަރވޭ ހެދުމުގެ މަސައްކަތްކަމަށެވެ. އެގޮތުން 43 ރަށެއްގައި މި ސަރވޭ ހަދާއިރު މިހާރު ސަރވޭ ނުނިމިއޮތީ ހުވަދޫއާއި އައްޑޫ އަދި ފުވައްމުލަކު ސިޓީގައި އެކަނިކަމަށް އޭނާ ވިދާޅުވިއެވެ.
ހާރޫން ވިދާޅުވީ ސަރވޭ ނިމުމަށްފަހު އެންމެ ފުރަތަމަ "ކޮންޓްރެކްޓް ފާމިން"ގެ މަސައްކަތް ފަށާނީ އަންނަ މަހު ލ. އަތޮޅުގައިކަމަށެވެ. އެގޮތުން ލ. އަތޮޅުގެ 400 އެއްހާ ރައްޔިތުން މިހާރުވެސް މި މަސައްކަތްކުރަން ޝައުގުވެރިކަން ފާޅުކޮށްފައިވާކަމަށް ހާރޫން ވިދާޅުވިއެވެ.
މި މަސައްކަތް ފަށައިގަތުމުން އިތުރު ރަށްރަށުގެ ދަނޑުވެރިންވެސް މިކަމަށް ޝައުގުވެރިވާނެކަމަށާއި ފުރަތަމަ ފިޔަވަހީގައި 43 ރަށެއްގައި މި މަސައްކަތް ފެށިނަމަވެސް 2 ވަނަ ފިޔަވަހީގައި މުޅި ރާއްޖޭގެ ރަށްރަށުން މިކަން ކުރަން ބޭނުންވާ ފަރާތްތަކަށް އެ ފުރުސަތު ހުޅުވާލާނެކަމަށް އޭނާ ވިދާޅުވިއެވެ.
"އަޅުގަނޑުމެން މިދިން މައުލޫމާތުގެ އަލީގައި ލ އަތޮޅުގައި އެކަނިވެސް 400 އެއްހައި ރައްޔިތުން މި މަސައްކަތް ކުރުމަށް ޝައުގުވެރިކަން ފާޅުކޮށްފައި އެބައޮތް. ރާއްޖޭގެ އެހެން ސަރަހައްދުތަކުގައިވެސް ގިނަ ދަނޑުވެރިންތަކެއް މަސައްކަތްކުރުމަށް ޝައުގުވެރިކަން ފާޅުކޮށްފައި އޮތީ. އަޅުގަނޑުމެން ގަބޫލުކުރަނީ މި މަސައްކަތް ފަށައިގަތީމަ މީގަހުރި ފައިދާތައް އެނގުނީމަ ގިނަބަޔަކު އަޅުގަނޑުމެންނާއިއެއްކޮށް މަސައްކަތްކުރަން އަންނާނެ. ފުރަތަމަ ފިޔަވަހީގައި މަސައްކަތްކުރަން ވިސްނާފަ މިއޮތީ 43 ރަށުގައި. އެހެންނަމަވެސް 2 ވަނަ ފިޔަވަހީގައި މުޅި ރާއްޖޭގައި މި މަސައްކަތް ކުރަން ބޭނުންވާ ފަރާތްތަކަށް މި ފުރުސަތު ދޭނަން." ހާރޫން ވިދާޅުވިއެވެ.
ކޮންޓްރެކްޓް ފާމިންގެ ފުރަތަމަ ފިޔަވަހީގައި ރާއްޖޭ 5 ޒޯނަކަށް ބަހާލައިގެން 43 ރަށެއްގައި 17 ބާވަތެއް ހެއްދުމަށް ވަނީ ހަމަޖެހިފައެވެ. ހައްދާތަކެތި ދަނޑުވެރިންގެ މެދުގައި ބަހާލައި ކޮންމެ ދަނޑުވެރިއަކަށްވެސް މަދުވެގެން 2 ބާވަތް ހެއްދުމަށް ދޭނެއެވެ.
އެގްރޯ ނެޝަނަލް ކޯރޕަރޭޝަންގެ ފަރާތުން ކުރިއަށްގެންދާ "ކޮންޓްރެކްޓް ފާމިން"ގެ ދަށުން އެއްބަސްވުންތައް ޤާއިމްކޮށް ދަނޑުވެރިންނަށް ބޭނުންވާ ފަންނީ އަދި މާލީ އެހީތެރިކަން ފޯރުކޮށްދީ އެފަރާތްތަކުން ހައްދާ ތަކެތި ދާއިމީކޮށް އެ ކުންފުނިން ގަންނާނެއެވެ. މީގެ ސަބަބުން ދަނޑުވެރިންނަށް އެމީހުންގެ އުފެއްދުންތައް މާކެޓްކުރެވޭނެކަމުގެ ފުރިހަމަ ޔަޤީންކަން ލިބިގެންދާނެއެވެ. އަދި ދިވެހި ދަނޑުވެރިންގެ އުފެއްދުންތަކަށް ހަމަ އަގު ލިބިގެންދާނެއެވެ.
ދަނޑުވެރިކަމުގެ ސިނާއަތު ފުޅާކުރުމަށްޓަކައި އެގްރޯނެޓްއަށް ސަރުކާރުން ދީފައިވާ 3 ފަޅުރަށުގައިވެސް ކުރިއަށްގެންދާނީ ފާމިންގެ މަސައްކަތްކަމަށް އެ ކޯޕަރޭޝަނުން ބުނެއެވެ. އެގްރޯ ނޭޝަނަލް ކޯޕަރޭޝަންގެ މަސައްކަތްތައް ފަށާފައިވަނީ މިއަހަރުގެ އެޕްރީލްމަހުގެ ތެރޭގައެވެ.