ދިވެހި ކަނޑުމަސް އިމްޕޯޓް ކުރުން ހުއްޓާލިކަން ލަންކާއިން އަންގާފައެއް ނުވޭ - ފޮރިން މިނިސްޓްރީ
ދިވެހި ކަނޑުމަހުގެ ބާވަތްތައް ސްރީ ލަންކާއަށް އެތެރެކުރުން މަނާކުރިކަމުގެ ރަސްމީ އެއްވެސް މަޢުލޫމާތެއް ލަންކާ ސަރުކާރުން ދިވެހި ސަރުކާރާ މިހާތަނަށް ޙިއްސާކޮށްފައިނުވާކަމަށް ފޮރިން މިނިސްޓްރީއިން ވިދާޅުވެއްޖެއެވެ.
ދިވެހި ކަނޑުމަހުގެ ބާވަތްތައް ލަންކާއަށް އެކްސްޕޯޓްކުރުން މަނާކޮށްފައިވާކަމަށް މީޑިއާގައި ފެތުރެމުންދާ ވާހަކައާ ގުޅިގެން ފޮރިން މިނިސްޓްރީން ވިދާޅުވީ މިފަދަ އެއްވެސް މަޢުލޫމާތުއް މިހާތަނަށް ސަރުކާރާއި ޙިއްސާކޮށްފައި ނުވާކަމަށެވެ. މިކަމާގުޅޭ އިތުރު މަޢުލޫމާތު ސްރީލަންކާގެ ކަމާބެހޭ ފަރާތްތައް މެދުވެރިކޮށް ހޯދުމަށް މަސައްކަތް ކުރަމުންދާކަމަށްވެސް ފޮރިން މިނިސްޓްރީންވަނީ ވިދާޅުވެފައެވެ.
ދިވެހިރާއްޖޭގެ ކަނޑުމަހުގެ ބާވަތްތައް އެއްވެސް ހުރައްހެއް ނެތި ސްރީ ލަންކާއަށް އެތެރެކުރެވޭނެކަމުގެ ޔަގީންކަށް، މިދިޔަ މަހު ލަންކާ ސަރުކާރުންވަނީ ދިވެހި ސަރުކާރަށް ދީފައެވެ. މިދިޔަމަހުވަނީ މިކަމާއި ގުޅޭ މަޝްވަރާތަކެއް ދެ ޤައުމުގެ ދެމެދުގައި ކުރިއަށްގެންގޮސްފައެވެ. ބައެއް ޤައުމުތަކުން ލަންކާއަށް މަސް އެކްސްޕޯޓްކުރުން ހިފަހައްޓާފައިވީނަމަވެސް، ރާއްޖެއިން އެ ޤައުމަށް މަސް އެކްސްޕޯޓް ކުރެވޭނެކަމުގެ ޔަގީންކަން އެ ބައްދަލުވުންތަކުގައި ދީފައިވާކަމަށް ފޮރިން މިނިސްޓްރީއިން މީގެކުރިން ވިދާޅުވެފައިވެއެވެ.
ނަމަވެސް ލަންކާގެ އާ ސަރުކާރާއިއެކު، ގައުމުގެ މަސްވެރިންނަށް ފުރުސަތު ފަހިކޮށްދިނުމަށް، އެހެން ޤައުމުތަކުން އެ ޤައުމަށް އެތެރެކުރާ މަހުގެ ބާވަތްތަކުން ނަގާ ޓެކްސްވަނީ ބޮޑުކޮށްފައެވެ. އާ ޓެކުހުގެ ރޭޓުތަކުގައިވާގޮތުން ރާއްޖެއިން އެޤައުމަށް އެތެރެކުރާ މަހުގެ ބާވަތްތަކުން ޓެކްސްގެ ގޮތުގައި ކިލޯއަކަށް 62.49 ރުފިޔާ ނެގުމަށް އެޤައުމުން ވަނީ ނިންމާފައެވެ.
ރާއްޖެއިން އެތެރެކުރާ ވަޅޯމަހާއި ހިކިމަހަކީ ލަންކާގައި މަގުބޫލު ބާވަތްތަކެކެވެ. މިދިޔަ އަހަރުވެސް އެ ޤައުމަށް 5000ޓަނުގެ މަސް ރާއްޖެއިން އެކްސްޕޯޓްކޮށްފައިވާކަމަށް ފިޝަރީޒް މިނިސްޓްރީއިން ހާމަކުރެއެވެ.