ރާއްޖޭގެ ޤައުމީ އެއަރލައިން މޯލްޑިވިއަންގެ އެހީތެރިކަމާއިއެކު އިންޑިއާގައި މިއަދު ސީޕްލޭންގެ ޙިދުމަތް ދޭންފެށުމާއިއެކު މިއީ ފަހުރުވެރި ކަމެއްގެ ގޮތުގައި ދިވެހިން ސިފަކޮށްފިއެވެ.
މޯލްޑިވިއަންގެ ސީޕްލޭން ކެޕްޓަންއާއި ކްރޫއިންގެ އެހީތެރިކަމާއިއެކު އިންޑިއާގައި ސީޕްލޭން ޙިދުމަތް ރަސްމީކޮށް ފައްޓަވައިދެއްވީ އެޤައުމުގެ ބޮޑުވަޒީރު ނަރަންދުރަ މޯދީއެވެ.
އިންޑިއާގައި ސީޕްލޭން ޙިދުމަތް ދިނުމަށް އެޤައުމުން މޯލްޑިވިއަން އިޙްތިޔާރުކޮށް މި ޝަރަފު ދިވެހިންނަށް ލިބުމާއިއެކު ބައެއް ދިވެހިން ވަނީ އެމީހުންގެ ޝުއޫރުތައް ޓްވިޓަރ މެދުވެރިކޮށް ހިއްސާކޮށްފައެވެ.
ނޭޝަނަލް ބޯޓިންގ އެސޯސިއޭޝަން އޮފް މޯލްޑިވްސްގެ ނައިބުރައީސް އަދި ހައިރައިޒްގެ ޗެއަރމަން އިސްމާއިލް ހަމީދު ކުރެއްވި ޓްވިޓެއްގައި ވިދާޅުވީ، ދިވެހިރާއްޖޭގެ އެހީތެރިކަމާއިއެކު އިންޑިއާގައި ސީޕްލޭން ޙިދުމަތް ފެށުމަކީ ދިވެހިންނަށް ލިބުނު ފަހުރެއްކަމަށެވެ. ކުޑަ ޖަޒީރާ ޤައުމެއްގެ ގޮތުގައި ރާއްޖެ އޮވެ، ރާއްޖޭގެ ސީޕްލޭން އޮޕަރޭޓްކުރާ ޕައިލެޓުންނަކީ މިކަމުގައި ތަޖުރިބާހުރި ބައެއްގެ ގޮތުގައި އޭނާ ވަނީ ފާހަގަކޮށްފައެވެ. އަދި އަވަށްޓެރި އިންޑިއާގައި ސީޕްލޭން ޙިދުމަތް ފެއްޓުމަށް މޯލްޑިވިއަންގެ އެހީތެރިކަން އެޤައުމަށް ފޯރުކޮށްދިނުމަކީ އުފާވެރިކަން ލިބޭކަމެއްކަމަށް އޭނާ ވަނީ ވިދާޅުވެފައެވެ.
މޯލްޑިވިއަން ހިންގާ އައިލެންޑް އޭވިއޭޝަންގެ މެނޭޖިންގ ޑިރެކްޓަރ މުހައްމަދު ރިޒްވީ ވިދާޅުވީ، އިންޑިއާގެ ސީޕްލޭން ޙިދުމަތް ފެށުމުގެ ގޮތުން މޯލްޑިވިއަންގެ ސީޕްލޭންއެއް މެދުވެރިކޮށް މި ޙިދުމަތް ފެށުމަކީ މޯލްޑިވިއަންއަށް ލިބޭ ޝަރަފެއްކަމަށެވެ.
މޯލްޑިވިއަންގެ ސީޕްލޭން ގޯއާގައި ޖައްސާ މަންޒަރުގެ ވީޑިއޯއެއް ހިއްސާކުރަމުން އިންމަގެ ނަމުގައި ޓްވިޓްކޮށްފައިވާ މީހަކު ބުނެފައިވަނީ މިއީ މޯލްޑިވިއަންއަށް ތާރީހީ ދުވަހެއްކަމަށެވެ. ގިނަ އަދަދެއްގެ ދިވެހިން ވަނީ މޯލްޑިވިއަންއަށް މަރުހަބާކިޔައި މިއީ ދިވެހިންނަށް ވަރަށް ފަހުރުވެރި ދުވަހެއްގެ ގޮތުގައި ސިފަކޮށްފައެވެ.
އިންޑިއާގައި ސީޕްލޭންގެ ޙިދުމަތްދޭން ފަށާފައިވަނީ އެޤައުމުގެ ސްޕައިސްޖެޓް ކުންފުނިންނެވެ. ސީޕްލޭން އޮޕަރޭޝަންގައި އެ އެއަރލައިނުން ބޭނުންކުރާނީ އެއްފަހަރާ 14 ފަސިންޖަރުން އެރުވޭ ބޯޓުތަކެކެވެ.
ސްޕައިސްޖެޓުން އިންޑިއާގައި ސީޕްލޭން ޚިދުމަތްދޭން ފަށާފައިވާއިރު ދުވާލަކު 8 ދަތުރު ކުރުމަށް ވަނީ ތާވަލްކޮށްފައެވެ. އަދި ކުރިއަށް އޮތްތަނުގައި ޑިމާންޑަށް ބެލުމަށްފަހުގައި ދަތުރުތައް އިތުރުކުރާނެކަމަށް އެ އެއަރލައިނުން ބުނެއެވެ. މި ދަތުރުތައް ކުރާނީ އިންޑިއާގެ އަޙްމަދުއާބާދުން ގުޖުރާތުގައި އޮންނަ އަވަށެއްކަމަށްވާ ކެވަޑިއާއަށެވެ. އެއްގަމު މަގުން ދާނަމަ 4 ގަޑިއިރު ހޭދަވާ މި ދަތުރަށް ސީޕްލޭންގައިނަމަ ހޭދަވާނީ ގަޑިއިރެއްކަމަށް އިންޑިއާގެ ނޫސްތަކުން ވަނީ ބުނެފައެވެ.
ސްޕައިސްޖެޓުންކުރާ ސީޕްލޭން ދަތުރުތަކުގެ އަގު އުޅެނީ ބޮލަކަށް 4800 އިންޑިއާ ރުޕީސްގައިކަމަށް މައުލޫމާތު ލިބެއެވެ. ސީޕްލޭންގެ ޙިދުމަތް ރަސްމީކޮށް ފަށާނީ މާދަމާއެވެ. ނަމަވެސް އިއްޔެ ވަނީ ބުކިން ހެއްދުމުގެ ފުރުސަތު ހުޅުވާލާފައެވެ. ފުރަތަމަ 7 ކަސްޓަމަރުންނަށް 1500 ރުޕީސްގެ ޑިސްކައުންޓެއް ލިބޭނެކަމަށްވެސް އެގައުމުގެ ނޫސްތަކުން ބުނެއެވެ. މިއީ އެ ސަރަހައްދަށް އަންނަ ފަތުރުވެރިންގެ އަދަދު އިތުރުވެގެންދާނެ ކަމެއްގެ ގޮތުގައި އިންޑިއާގެ ނޫސްތަކުން ވަނީ ރިޕޯޓްކޮށްފައެވެ. އަދި މިއީ ގުޖުރާތުގައި ދިރިއުޅޭ ރައްޔިތުންވެސް ތަޖުރިބާކޮށްލަން ބޭނުންވާކަމެއްކަމަށް ވަނީ ބުނެފައެވެ.