ރާއްޖޭގެ ޤައުމީ އެއަރލައިން މޯލްޑިވިއަންގެ އެހީތެރިކަމާއިއެކު އިންޑިއާގައި ސީޕްލޭންގެ ޙިދުމަތް މިއަދު ފަށައިފިއެވެ. އިންޑިއާގައި ސީޕްލޭންގެ ޙިދުމަތް ފަށްޓަވައިދެއްވީ އެ ގައުމުގެ ބޮޑުވަޒީރު ނަރެންދުރަ މޯދީއެވެ.
އިންޑިއާގައި ސީޕްލޭން ޙިދުމަތް ފެށުމުގެ ގޮތުން ބޭއްވި ޚާއްސަ ރަސްމިއްޔާތުގައި އެޤައުމުގެ ބޮޑުވަޒީރު ނަރެންދުރަ މޯދީ މިދަތުރުތައް އިފްތިތާހުކޮށްދެއްވިއިރު، އެމަނިކުފާނަށް ދަތުރާ ގުޅޭގޮތުން އިރުޝާދު ދެއްވީ މޯލްޑިވިއަންގެ ކެބިން ކުރޫ އިންސްޓްރަކްޓަރ ހުސައިން ފަޒީލްއެވެ. އަދި މި ޙިދުމަތް ފެށުމަށް ބޭނުންކުރާ މޯލްޑިވިއަންގެ ސީޕްލޭން އޮޕަރޭޓްވެސް ކުރަނީ ދިވެހި ކެޕްޓަނުންނާއި ދިވެހި ކްރޫއިންނެވެ.
އިންޑިއާގެ ސްޕައިސް ޖެޓް ކުންފުނިން އެޤައުމުގައި ސީޕްލޭންގެ ޙިދުމަތް ފެށުމަށް ޤައުމީ އެއަރލައިން މޯލްޑިވިއަންގެ ބޯޓެއް ޗާރޓަރކޮށްން އެޤައުމަށް ގެންގޮސްފައިވަނީ މިމަހުގެ 25 ވަނަ ދުވަހުއެވެ. މޯލްޑިވިއަން ހިންގާ އައިލެންޑް އޭވިއޭޝަން ޕްރައިވެޓް ލިމިޓެޑުގެ މެނޭޖިން ޑީރެކްޓަރ މުޙައްމަދު ރިޒްވީ ވިދާޅުވީ، އިންޑިއާގެ ސީޕްލޭން ޙިދުމަތް ފެށުމަށް މޯލްޑިވިއަންގެ ސީޕްލޭންއެއް ޗާޓަރކޮށްގެން ގެންދިއުމަކީ އެއްގައުމު އަނެއްގައުމަށް ކުރާ އިހްތިރާމް ރަމްޒުކޮށްދޭކަމެއްކަމަށެވެ.
ރިޒްވީ ވިދާޅުވީ، އިންޑިޔާއިން ބޭނުން ނަމަ ދުނިޔޭގެ ކޮންމެ ގައުމަކުންވެސް ސީޕްލޭން ޗާރޓަރ ކުރެވޭނެކަމަށާއި، ސީޕްލޭންގެ ހިދުމަތް ދެމުންގެންދާ އެތައްގައުމެއް އެބައޮތްކަމަށެވެ. ނަމަވެސް އަވަށްޓެރި އިންޑިޔާއިން ދިވެހިރާއްޖޭގެ ޤައުމީ އެއަރލައިން އިހްތިޔާރުކުރިކަމީ ދިވެހިންނަށް ލިބިގެން ދިޔަ ފަހުރަކާއި ޝަރަފެއްކަމަށް އޭނާ ވިދާޅުވިއެވެ.
"މިފުރުސަތުގެ ސަބަބުން ދެގައުމުގެ ދެމެދުގައި އިތުބާރާއި ޔަޤީންކަން އެތައްތަނަކުން އިތުރުވެ ވިޔަފާރިގެ ދާއިރާއިން ބޮޑެތިކުރިއެރުން ތަކެއް ލިބިގެން ދާނެ. އަދި ސްޕައިސްޖެޓްފަދަ ކުންފުންޏެއްގެ އިތުބާރާއި ޔަޤީންކަން ލިބުމަކީ ވައިގެ އުދުހުންތަށް އެހެން ހަރުފަތަކަށް ގެންދިއުމަށް ކުރާ މަސައްކަތަށް އިތުރުފަހިކަމެއް ލިބިގެންދާނެކަމެއް، މިފުރުސަތުގެ ބޭނުންވީހާވެސް އެދެވޭ ގޮތެއްގައި އަޅުގަނޑުމެން ހިފާނަން" ރިޒްވީ ވިދާޅުވިއެވެ.
އިންޑިޔާގައި ސީޕްލޭން ފެށުމަށް ޓެކްނިކަލް ސަޕޯޓް އެގައުމުން ބޭނުންވާނަމަ އެކަން ފޯރުކޮށްދޭނެކަމަށާއި އެފަދަ މަޝްވަރާތަކެއް މިހާރުވެސް ކުރިއަށްދާކަމަށް ރިޒްވީ ވިދާޅުވިއެވެ.
ރާއްޖޭގެ ސީޕްލޭންއެއް ޗާޓަރުކޮށްގެން އިންޑިއާއަށް ގެންދިޔުމާއިއެކު ރާއްޖެއާއި އިންޑިޔާއާއި އޮންނަ ޒަމާންވީ ގުޅުން ބަދަހިވުމުގެ އިތުރަށް ދިވެހިރާއްޖޭގެ ކަނޑުތަކުން ދިވެހިންހޯދާ ތަޖުރިބާއަކީ ބޮޑެތި ގައުމުތަކުން އިޙްތިރާމުކުރާ އަދި ބަލައިގަންނަ ކަމެއްކަން އެނގި އެކަމާ ފަހުރުވެރިވާކަމަށް ރިޒްވީ ވިދާޅުވުއެވެ.
އިންޑިއާގައި ސީޕްލޭންގެ ޙިދުމަތް ފެއްޓުމުގެ ގޮތުން މޯލްޑިވިއަނުން ޗާޓަރ ކޮށްގެން ގެންދިޔަ ސީޕްލޭން ގޯއާ އަދި ކޮޗިންގައި ޓްރާންސިޓް ކުރުމަށްފަހު ދިޔައީ އަޙްމަދު އާބާދަށްށެވެ. އިންޑިއާގައި ސީޕްލޭން ޙިދުމަތް ފަށާފައިމިވަނީ އެގައުމުގެ އެއްބައިވަންތަކަމުގެ ދުވަހާއި ގުޅުވައިގެންނެވެ. ސީޕްލޭން އޮޕަރޭޝަންގައި އެ އެއަރލައިނުން ބޭނުންކުރާނީ އެއްފަހަރާ 14 ފަސިންޖަރުން އެރުވޭ ބޯޓުތަކެކެވެ.
ސްޕައިސްޖެޓުން އިންޑިއާގައި ސީޕްލޭން ޚިދުމަތްދޭންފަށާފައިވާއިރު ދުވާލަކު 8 ދަތުރު ކުރުމަށް ވަނީ ތާވަލްކޮށްފައެވެ. މި ދަތުރުތައް ކުރާނީ އިންޑިއާގެ އަޙްމަދުއާބާދުން ގުޖުރާތުގައި އޮންނަ އަވަށެއްކަމަށްވާ ކެވަޑިއާއަށެވެ. ސްޕައިސްޖެޓުންކުރާ ސީޕްލޭން ދަތުރުތަކުގެ އަގު އުޅެނީ ބޮލަކަށް 4800 އިންޑިއާ ރުޕީސްގައިކަމަށް މައުލޫމާތުލިބެއެވެ.