ސިނަމާލެ ބްރިޖުން ވީއައިޕީ ދަތުރުކުރާ ވަގުތު ފިޔަވައި، އެހެން ވަގުތުތަކުގައި ބްރިޖްގެ އެއް ލޭނުން ދެކޮޅަށް ދަތުރުކުރެވޭނެކަމަށް ފުލުހުން ވިދާޅުވެއްޖެއެވެ.
މިއަދު 12:30ން ފެށިގެން 18:00އާއި ހަމައަށް މާލޭގެ 4 ސަރަހައްދެެން ބަންދުކުރުމަށް ނިންމާފައި ވަނީ، އެމެރިކާގެ ސެކްރެޓަރީ އޮފް ސްޓޭޓް މައިކް ޕޮމްޕެއޯ ރާއްޖެއަށް ކުރައްވާ ދަތުރުފުޅުގެ ސަލާމަތީ ކަންކަން ބެލެހެއްޓުމަށްޓަކައެވެ.
މިވަގުތުތަކުގައި ބަންދުކުރުމަށް ހަމަޖެހިފައިވަނީ ވެލާނާ އިންޓަރނޭޝަނަލް އެެއަރޕޯޓަށް ދަތުރުކުރާ މަގާއި، ބްރިޖާއި ބޮޑުތަކުރުފާނު މަގުން ބަޔަކާއި ގްރީން ޒޯން ސަރަޙައްދެވެ. ނަމަވެސް މި ސަރަޙައްދުތަކުގެ ތެރެއިން ބުރިޖުގައި ވީއަޕީ ދަތުރުކުރާ ގަޑިތައް ފިޔަވައި އެހެން ގަޑިތަކުގައި، އާއްމު ދަތުރުފަތުރަށް ބްރިޖުގެ އެއް ލޭނު ބޭނުންކުރެވޭނެކަމަށް ފުލުހުން ވިދާޅުވެއެވެ.
މައިކް ޕޮމްޕެޔޯގެ ދަތުރުފުޅާއި ގުޅިގެން ބަންދުކުރާ ސަރަޙައްދުތަކުގައި ހަރަކާތްތެރިވެ އުޅެވޭނީ ހުއްދަ އޮތް މީހުންނަށް އެކަންޏެެކެވެ. ނޫސްވެރިންނަށްވެސް އިވެންޓް ކަވަރކުރުމަށް އެ ސަރަޙައްދުގައި ހަރަކާތްތެރިވެވޭނީ އިވެންޓަށް ދޫކޮށްފައިވާ ފާސް ބޭނުންކޮށްގެން، ދީފައިވާ އިރުޝާދާ އެއްގޮތަށެވެ.
މައިކް ޕޮމްޕެއޯ ރާއްޖެ ވަޑައިގަތުމަށް ހަމަޖެހިފައިވަނީ މިއަދު މެންދުރުފަހުގެ ވަގުތެއް ގައެވެ.