މިނިސްޓްރީ އޮފް ޓޫރިޒަމްއިން ކުރިއަށްގެންދާ އިންޓަރންޝިޕް ޕްރޮގުރާމްގެ ސަބަބުން ޔުނިވަރސިޓީ ކޯސްތައް ފުރިހަމަކުރުމަށް ޖާގަ ހޯދުމަށް މަގުފަހިވެގެންދާނެ ކަމަށް ޓޫރިޒަމް މިނިސްޓަރ ޑރ. ޢަބްދުﷲ މައުސޫމް ވިދާޅުވެއްޖެއެވެ.
ޓޫރިޒަމް މިނިސްޓްރީން ކުރިއަށްގެންދާ އިންޓަރންޝިޕް ޕްރޮގްރާމްގެ ފުރަތަމަ ފިޔަވަހީގައިވާ ގޮތަށް މިނިސްޓްރީގެ ހުރިހާ ޑިޕާރޓްމަންޓެއްގައި 6 ހަފްތާ މަސައްކަތްކުރުމަށްފަހު ބައިވެރިން މިހާރު ވަނީ 'ޖޮބް ރޮޓޭޝަން' މަރުހަލާ ފުރިހަމަކޮށްފައެވެ. އަދި މިނިސްޓްރީން ކުރާ މަސައްކަތްތަކުގެ ތެރެއިން ކޮންމެ ބައިވެރިއަކުވެސް ޝައުޤުވެރިވާ ޑިޕާރޓްމަންޓެއްގައި މިހާރު މަސައްކަތްކުރަމުންދާކަމަށް ޓޫރިޒަމް މިނިސްޓްރީން ވިދާޅުވެއެވެ.
އިންޓަރންޝިޕްގެ ފުރަތަމަ ފިޔަވަހި ބައިވެރިން ނިންމާލާފައިވަނީ މިމަހުގެ 25 ވަނަ ދުވަހުއެވެ. މިނިސްޓަރ އޮފް ޓޫރިޒަމް، ޑރ. ޢަބްދުﷲ މަޢުސޫމް ވަނީ ބައިވެރިންނާ ބައްދަލުކުރައްވާ އެފަރާތްތަކަށް މަރުޙަބާ ދަންނަވައި ޝުކުރު އަދާކުރައްވާފައެވެ. އަދި މި ތަޖުރިބާގެ ސަބަބުން ބައިވެރިނަށް ވަޒީފާގެ ފުރުޞަތު ފަހިވެ، ކޮލެޖް އަދި ޔުނިވަރސިޓީގެ ޕްލޭސްމަންޓް ހޯދުމަށް މަގުފަހިވެގެންދާނޭ ކަމަށް ދެކެވަޑައިގަންނަވާކަމުގައި މިނިސްޓަރ ވިދާޅުވިއެވެ.
ޓޫރިޒަމް މިނިސްޓްރީން މި ޕްރޮގުރާމް ފަށާފައިވަނީ މިދިޔަ މަހުގެ 10 ވަނަ ދުވަހުއެވެ. 22 ބައިވެރިން ދަނީ ޕްރޮގުރާމްގައި ބައިވެރިވެ ތަމްރީން ހޯދަމުންނެވެ.
ޓޫރިޒަމް މިނިސްޓްރީން ކުރިއަށްގެންދާ މި އިންޓަރންޝިޕްގެ މުއްދަތަކީ 6 މަސްދުވަހެވެ. މި ޕްރޮގުރާމްގެ މަޤްޞަދަކީ ފަތުރުވެރިކަމުގެ ދާއިރާއިން ޒުވާނުންނަށް ފުރުޞަތު ހުޅުވާލާ މިދާއިރާއިން ކުރިއަށް ދިއުމަށް މަގުފަހިކޮށްދިނުމެވެ. މި އިންޓަރންޝިޕަކީ އެއްވެސް އުޖޫރައެއް ނުލިބޭގޮތަށް ހުޅުވާލެވުނު ފުރުޞަތެކެވެ. ނަމަވެސް ރަނގަޅަށް ޕަރފޯމްކުރާ ބައިވެރިންނަށް ވަޒީފާ ލިބުމުގެ ފުރުޞަތު އޮންނާނެކަމަށް އެ މިނިސްޓްރީން ވިދާޅުވެއެވެ.