އިނގިރޭސިވިލާތުން ލުއިދިން ޤައުމުތަކުގެ ތެރޭގައި ރާއްޖެ ހިމެނިއްޖެއެވެ.
އިނގިރޭސިވިލާތުން ދަތުރުކުރުން ރައްކާތެރި ޤައުމުތައް ނުވަތަ "ޓްރެވެލް ކޮރިޑޯ"ގެ ތެރެއަށް މިހާރު ރާއްޖެ ވަނީ އިތުރުކޮށްފައެވެ. އެހެންކަމުން އަންނަ އާދިއްތަ ދުވަހުން ފެށިގެން އިނގިރޭސިވިލާތުން ރާއްޖެ އަންނަ ފަތުރުވެރިން އަނބުރާ ޤައުމަށް ދިއުމަށްފަހު 14 ދުވަހުގެ ކަރަންޓީނުގެ މުއްދަތު ހަމަކުރާކަށް ނުޖެހޭނެއެވެ.
ރާއްޖޭގެ އިތުރުން އަންނަ އާދިއްތަ ދުވަހުން ފެށިގެން އިތުރު 3 ޤައުމެއްވެސް ވަނީ އިނގިރޭސިވިލާތުން ލުއިދީފައެވެ. އެއީ ކެރަރީސް، ޑެންމާކް އަދި މިކޮނޮސްއެވެ.
އިނގިރޭސިވިލާތުން ޤައުމުތަކަށް ލުއިދެނީ ކޯވިޑް19 ގެ ހާލަތަށް ބެލުމަށްފަހުގައެވެ. އެގޮތުން އެ ޤައުމެއްގައި ކޮވިޑް-19 ފެތުރެމުން އަންނަ މިންވަރާއި ބަލި ކޮންޓްރޯލް ކުރުމަށް އަޅާފައިވާ ފިޔަވަޅުތަކަށް ބަލައެވެ. އެ ޤައުމުން ރާއްޖެއަށް ލުއިދީފައިމިވަނީ ރާއްޖޭގައި ކޯވިޑް19 ފެތުރުން ވަރަށް ބޮޑަށް މަދުވެފައިވަނިކޮށެވެ.
ކޯވިޑް19 ގެ ފަހުން އަލުން ބޯޑަރު ހުޅުވާލުމާއިއެކު ރާއްޖެއަށް އިނގިރޭސިވިލާތުން ގިނަ އަދަދެއްގެ ފަތުރުވެރިން ވަނީ އައިސްފައެވެ. މިމަހުގެ މިހާތަނަށްވެސް އިނގިރޭސިވިލާތުން 525 ފަތުރުވެރިން ވަނީ ރާއްޖެ އައިސްފައެވެ. އިނގިރޭސިވިލާތުން ރާއްޖެއަށް ލުއިދީފައިވާއިރު އަދި ކުރިއަށްއޮތީ ރާއްޖޭގެ ފަތުރުވެރިކަމުގެ ހައި ސީޒަންކަމުން ކުރިއަށްއޮތް ދުވަސްތަކުގައި އެޤައުމުން ރާއްޖެއަށް އަންނަ ފަތުރުވެރިންގެ އަދަދު އިތުރުވާނެކަމަށް ބެލެވެއެވެ.