އޭރޯފްލޮޓް އަދި އެމިރޭޓްސްއިން ރާއްޖެއަށްކުރާ ދަތުރުތައް މިމަހު އިތުރުކުރަން ނިންމައިފިއެވެ.
މޯލްޑިވްސް އެއަރޕޯޓްސް ކޮންޕެނީ ލިމިޓެޑް، އެމްއޭސީއެލްއިން ވިދާޅުވީ، އޭރޯފްލޮޓުން މިމަހުގެ 26 ވަނަ ދުވަހު ރާއްޖެއަށް ކުރާ ދަތުރުތައް 4 ފްލައިޓަށް އިތުރުކުރާނެކަމަށެވެ. އެ އެއަރލައިނުން މިހާރު ރާއްޖެއަށް ދަތުރުކުރަނީ ހަފްތާގެ 2 ދުވަހުއެވެ. އެއީ ހުކުރު އަދި އާދިއްތަ ދުވަހެވެ. އެ އެއަރލައިނުން ރާއްޖެއަށް ކުރާ ދަތުރުތައް އިތުރުކުރުމާއިއެކު ހުކުރުދުވަހާއި އާދިއްތަދުވަހުގެ އިތުރުން ހޯމަ އަދި ހޮނިހިރުގައިވެސް ދަތުރުތައް ކުރާނެއެވެ.
އޭރޯފްލޮޓުން ރަޝިޔާއާއި ރާއްޖެއާއި ދެމެދު ދަތުރުތައް ފަށާފައިވަނީ މިދިޔަ ސެޕްޓެމްބަރ މަހުގެ 11 ވަނަ ދުވަހުއެވެ. މި ދަތުރުތައް ކުރަނީ ރަޝިޔާގެ ޝެރެމެޓޭވޯ އެއާޕޯޓުން ވެލާނާ އިންޓާނޭޝަނަލް އެއާޕޯޓަށެވެ.
އެމްއޭސީއެލްއިން ވިދާޅުވީ، އޭރޯފްލޮޓްގެ އިތުރުން އެމިރޭޓްސްއިންވެސް މިމަހުގެ ތެރޭގައި ރާއްޖެއަށް ކުރާ ދަތުރުތައް އިތުރުކުރާނެކަމަށެވެ. އެމިރޭޓްސްއިން މިހާރު އަންނަނީ ހަފްތާއަކު 7 ދަތުރު ރާއްޖެއަށް ކުރަމުންނެވެ. ނަމަވެސް މިމަހުގެ 25 ވަނަ ދުވަހުން ފެށިގެން އެ އެއަރލައިނުން ރާއްޖެއަށް ހަފްތާއަކު 10 ފްލައިޓް އޮޕަރޭޓްކުރާނެއެވެ. މިހާރު ކޮންމެ ދުވަހަކު ކުރާ ދަތުރުގެ އިތުރުން މިމަހުގެ 25 ވަނަ ދުވަހުން ފެށިގެން ހަފްތާގެ ހޯމަ، ބުދަ އަދި އާދިއްތަ ދުވަހު އިތުރު ފްލައިޓެއް ރާއްޖެއަށް އެޅުމަށް އެމިރޭޓްސްއިން ވަނީ ނިންމާފައެވެ.
ކޯވިޑް19 އަށްފަހު އެމިރޭޓްސްއިން ރާއްޖެއަށް އަލުން ދަތުރުތައް ފަށާފައިވަނީ ޖުލައި މަހުގެ 16 ވަނަ ދުވަހުއެވެ. އެމިރޭޓްސްއިން ރާއްޖެއަށް ދަތުރުތައް ބާއްވަނީ ދުބާއީއާއި ރާއްޖެއާ ދެމެދުއެވެ.
މިހާރުވެސް ބައިނަލްއަޤްވާމީ 12 އެއަރލައިންއަކުން ދަނީ ރާއްޖެއަށް ދަތުރުތައް ބާއްވަމުންނެވެ. އަދި އިތުރު އެއަރލައިންތަކުން ދަތުރުކުރުމަށް މިހާރު ވަނީ ޝެޑިއުލްކޮށްފައެވެ.