ރަޝިޔާގެ "އަޒުރު އެއަރ"އިން އަންނަމަހުގެ 1 ވަނަ ދުވަހު ރާއްޖެއަށް ޝެޑިއުލް ދަތުރުތައް ފަށަން ނިންމައިފިއެވެ.
މޯލްޑިވްސް އެއަރޕޯޓްސް ކޮމްޕެނީ ލިމިޓެޑް އެމްއޭސީއެލްއިން ވިދާޅުވީ، އަޒުރު އެއަރގެ ދަތުރުތައް ރާއްޖެއަށް ކުރާނީ ރަޝިއާގެ މޮސްކޯއިން ވެލާނާ އިންޓަނޭޝަނަލް އެއަރޕޯޓަށްކަމަށެވެ. އަޒުރު އެއަރގެ ޝެޑިއުލް ދަތުރުތައް ރާއްޖެއަށް ފަށާއިރު ހަފްތާއަކު 2 ދަތުރު އެ އެއަރލައިނުން ރާއްޖެއަށް ބޭއްވުމަށް ވަނީ ނިންމާފައެވެ. އަޒުރު އެއަރއަކީ ކޯވިޑް19 އަށްފަހު ރާއްޖެއަށް އަލުން ދަތުރުފަށާ ރަޝިޔާގެ 3 ވަނަ އެއަރލައިނެވެ.
މިދިޔަ އަހަރުގެ ފިނި މޫސުމާއި ދިމާކޮށްވެސް އަޒުރު އެއަރއިން ވަނީ ޗާޓަރ ފްލައިޓްތަކެއްވެސް ރާއްޖެއަށް ބާއްވާފައެވެ. ކޯވިޑް19 އަށްފަހު ރާއްޖޭގެ ބޯޑަރު އަލުން ހުޅުވާލުމާއިއެކު އެންމެ ގިނަ ފަތުރުވެރިން ރާއްޖެ އަންނަ އެއް ޤައުމަކީ ރަޝިއާއެވެ. އެމްއޭސީއެލްއިން ވިދާޅުވީ، އަޒުރު އެއަރލައިން ރާއްޖެއަށް ދަތުރުތައް ފެށުމާއިއެކު ރަޝިއާއިން ހަފްތާއަކު 6 ފްލައިޓް އަންނާނެކަމަށެވެ.
ރަޝިޔާގެ ނޯޑުވިންޑު އެއަރލައިންވެސް ދަނީ މިމަހުގެ 27 ވަނަ ދުވަހު ރާއްޖެއަށް ދަތުރުތައް ފެށުމަށް ތައްޔާރުވަމުންނެވެ. ނޯޑްވިންޑުން ހަފްތާއަކު 2 ފްލައިޓް ރާއްޖެއަށް ކުރާނެއެވެ.
ރަޝިއާގެ އޭރޯފްލޮޓުން މިހާރުވެސްދަނީ ޝެރެމެޓޯވް އެއާޕޯޓުން ވެލާނާ އިންޓާނޭޝަނަލް އެއާޕޯޓަށް ހަފްތާއަކު ދެ ދަތުރު ކުރަމުންނެވެ. އެއަރލައިންގެ ދަތުރުތައް ރާއްޖެއަށް ފަށާފައިވަނީ ސެޕްޓެމްބަރުމަހުގެ ތެރޭގައެވެ.
މޯލްޑިވްސް އިމިގްރޭޝަނުން އާންމުކޮށްފައިވާ ތަފާސް ހިސާބުތައް ދައްކާގޮތުންވެސް މިމަހުގެ 1 އިން 15 ވަނަ ދުވަހާއި ހަމައަށް އެންމެ ގިނަ ފަތުރުވެރިން ރާއްޖެ އައިސްފައިވަނީ ރަޝިއާއިންނެވެ. އެއީ ޖުމްލަ 2308 ފަތުރުވެރިންނެވެ.