ގެސްޓްހައުސްތައް ހުޅުވާލި ފުރަތަމަ 6 ދުވަހުގެ ތެރޭގައި މާފުއްޓަށް 102 ފަތުރުވެރިން އައިސްފައިވާކަމަށް އެރަށު ކައުންސިލްގެ ރައީސް ވިދާޅުވެއްޖެއެވެ.
ކޯވިޑް19 ގެ ސަބަބުން ރާއްޖޭގެ ގެސްޓްހައުސްތައް ބަންދުކޮށްފައިވަނީ މިދިޔަ މާރޗް މަހުގެ 17 ވަނަ ދުވަހުއެވެ. އަދި އަލުން މި ސިނާއަތް ފަތުރުވެރިންނަށް ހުޅުވާލާފައިވަނީ މިމަހުގެ 15 ވަނަ ދުވަހުއެވެ. ގެސްޓްހައުސް ސިނާއަތް ހުޅުވާލުމާއިއެކު އެންމެ ފުރަތަމަ ފަތުރުވެރިންގެ ބަޔަކު އައިސްފައިވަނީވެސް މާފުއްޓަށެވެ. މާފުއްޓަކީ ލޯކަލް ޓޫރިޒަމްގައި މިއަދު ރާއްޖޭގައި އެންމެ ކުރިއަރާފައިވާ އެއްރަށެވެ.
ޕީއެސްއެމް ނިއުސްއަށް މައުލޫމާތުދެއްވަމުން މާފުށީ ކައުންސިލްގެ ރައީސް އުސްމާން ރަޝީދު ވިދާޅުވީ، މިމަހުގެ 15 ވަަނަ ދުވަހު މާފުށި އަލުން ލޯކަލް ޓޫރިޒަމަށް ހުޅުވާލި ފުރަތަމަ 6 ދުވަސްތެރޭގައި 102 ފަތުރުވެރިން ޒިޔާރަތްކޮށްފައިވާކަމަށެވެ. އެރަށުގައި މިވަގުތު ހުޅުވައިގެން ޙިދުމަތްދެމުންދަނީ 6 ގެސްޓްހައުސްއަކުންނެވެ. އަދި ކުރިއަށްއޮތް ހަފްތާގެ ތެރޭގައި އިތުރު 5 ގެސްޓްހައުސްއެއް ހުޅުވައި ޙިދުމަތްދޭން ފަށާނެކަމަށް އުސްމާން ވިދާޅުވިއެވެ.
މާފުށީގައި މުޅި ޖުމްލަ 42 ގެސްޓްހައުސް އެބަހުއްޓެވެ. މާފުށީ ކައުންސިލްގެ ރައީސް އުސްމާން ވިދާޅުވީ، ގެސްޓްހައުސް ސިނާއަތް އަދި މި ހުޅުވާލެވުނީކަމަށާއި މިއީ އަދި ވަރަށް ދަތި ދުވަސްކޮޅެއްކަމަށެވެ. ރަށު ފެންވަރުގައި މިވަގުތު މާބޮޑު ޕްރޮމޯޝަނަލް ހަރަކާތްތަކެއް ނުހިންގުނު ނަމަވެސް ގެސްޓްހައުސްތަކުން އަމިއްލައަށް ގިނަ ޕްރޮމޯޝަނަލް ހަރަކާތްތައް ހިންގަމުންއަންނަކަމަށެވެ. ކުރިއަސްއޮތްތަނުގައި ރަށު ފެންވަރުގައި ގެސްޓްހައުސް އެސޯސިއޭޝަންއެއް ހުޅުވައި، އެ އެސޯސިއޭޝަން މެދުވެރިކޮށް މާފުށީގެ ގެސްޓްހައުސް ސިނާއަތް ޕްރޮމޯޓްކުރުމުގެ މަސައްކަތް ކުރުމަށް މަޝްވަރާތައް ކުވެމެވުންދާކަމަށް އުސްމާން ވިދާޅުވިއެވެ.
ފަތުރުވެރިކަމުގެ ހައި ސީޒަންގައި އާންމުގޮތެއްގައި 1600 ފަތުރުވެރިން މާފުށީގައި ޗުއްޓީ ހޭދަކުރެއެވެ. ގެސްޓަހައުސް ސިނާއަތް މިމަހު އަލުން ހުޅުވާލުމާއިއެކު ރާއްޖޭގެ ހަތަރު އަތޮޅަކުން ނުވަ ރަށެއްގައި ހިންގާ 29 ގެސްޓުހައުސްއެއް އަލުން ހުޅުވުމުގެ ހުއްދަ ޓޫރިޒަމް މިނިސްޓްރީން މިހާތަނަށް ވަނީ ދޫކޮށްފައެވެ. އެރަށްތަކަކީ ހނ. ފޮއްދޫ، ކ. ހުރާ، ކ. މާފުށި، ކ. ގުރައިދޫ، އއ. މަތިވެރި، އއ. އުކުޅަސްއެވެ. މީގެއިތުރުން އއ. ތޮއްޑޫ، ވ.ތިނަދޫ އަދި ވ. ފުލިދޫ އަށްވެސް ގެސްޓްހައުސް ހުޅުވުމުގެ ހުއްދަ ޓޫރިޒަމް މިނިސްޓްރީން ވަނީ ދީފައެވެ.
ކޯވިޑް19 ގެ ސަބަބުން ރާއްޖޭގެ ގެސްޓްހައުސްތައް ބަންދުކޮށްފައިވަނީ މިދިޔަ މާރޗް މަހުގެ 17 ވަނަ ދުވަހުއެވެ. އަދި އަލުން މި ސިނާއަތް ފަތުރުވެރިންނަށް ހުޅުވާލާފައިވަނީ މިމަހުގެ 15 ވަނަ ދުވަހުއެވެ. ގެސްޓްހައުސް ސިނާއަތް ހުޅުވާލުމާއިއެކު އެންމެ ފުރަތަމަ ފަތުރުވެރިންގެ ބަޔަކު އައިސްފައިވަނީވެސް މާފުއްޓަށެވެ. މާފުއްޓަކީ ލޯކަލް ޓޫރިޒަމްގައި މިއަދު ރާއްޖޭގައި އެންމެ ކުރިއަރާފައިވާ އެއްރަށެވެ.
ގެސްޓް ހައުސްތައް އަލުން ހުޅުވުމަށް ޓޫރިޒަމް މިނިސްޓްރީން ހުއްދަދޭއިރު އެންމެ ފުރަތަމަ ކަމެއްގެ ގޮތުގައި ބަލާނީ ރަށު ފެންވަރުގައި ފުރިހަމަކުރަންޖެހޭ ކަންކަން ފުރިހަމަކޮށްފައިވޭތޯއެވެ. އެގޮތުން ކަރަންޓީނާއި، އައިސޮލޭޝަންގެ އިންތިޒާމްތަކާއި، ޞިއްޙީގޮތުން ފުރިހަމަކުރަންޖެހޭ ކަންކަން ފުރިހަމަކޮށްފައިވާކަން އެ ރަށެއްގެ ކައުންސިލުން މިނިސްޓްރީއަށް ކަށަވަރުކޮށްދޭންޖެހެއެވެ. އަދި އެތަނެއް ހުޅުވުމުގައި ކައުންސިލުގެ އެއްވެސް އިއުތިރާޒެއްނެތްކަމަށް މިނިސްޓްރީއަށް އެންގުމުން، ވަކިވަކި ގެސްޓް ހައުސްތަކުން ހުށަހަޅާ އެސް.އޯ.ޕީތަކަށް ބެލުމަށްފަހު، ހުޅުވުމުގެ ހުއްދަ ޓޫރިޒަމް މިނިސްޓްރީން ދަނީ ދެމުންނެވެ.
ލޯކަލް ޓޫރިޒަމްގެ ޚިދުމަތްދޭ ރަށްރަށުގައި ގެއިން ބޭރުގައާއި، އާއްމު ތަންތަނުގައި އުޅޭއިރު، އަނގައާއި، ނޭފަތާއި، ދަތްދޮޅި ނިވާވާގޮތަށް މާސްކް އެޅުމަށް އެޗް.ޕީ.އޭއިން ވަނީ އަންގަވާފައެވެ.