ކޯވިޑް-19ގެ ހާލަތުގައި ފަރުވާ ދިނުމަށް ބޭނުންވާ ވެންޓިލޭޓަރުތައް ރާއްޖެއަށް ހޯދުމުގެ މައްސަލައިގައި ރައްޔިތުންގެ މަޖިލީހަށް މައުލޫމާތު ދިނުމުގައި އެއްވެސް ކަމެއް އޮޅުވާލާފައި ނުވާނެކަމަށް ހެލްތު މިނިސްޓަރ ޢަބްދުﷲ އަމީން ވިދާޅުވެއްޖެއެވެ.
ވެންޓިލޭރުތައް ހޯދުމުގައި ދުބާއީގެ އެގްޒެކިއުޓާސް ކުންފުންޏަކާ ހަވާލުކުރީ ޑަބްލިއުއެޗްއޯގެ ލަފާގެ މަތިންކަމަށް ހެލްތު މިނިސްޓަރ އަމީން މަޖިލީހާއި ހިއްސާކުރެއްވި މަޢުލޫމާތުގައި ވިދާޅުވެފައި ވީނަމަވެސް، އެމިނިސްޓްރީގެ އޮޑިޓް ރިޕޯޓުގައި ޑަބްލިޔުއެޗްއޯގެ ލަފާ ހޯދާފައިނުވާކަމަށް ބުނެފައި ވާތީ، މަޖިލީހުން ވަނީ މިނިސްޓަރ އަމީން މަޖިލީހަށް ދޮގު މަޢުލޫމާތު ދިންކަމަށް ތުހުމަތުކޮށް އެމައްސަލަ އިމްތިޔާޒުތަކާއި ސުލޫކު ކޮމިޓިން ބަލަން ނިންމާފައެވެ.
މިމައްސަލަ އާއި ގުޅިގެން މިއަދު މިނިސްޓަރ އަމީން ކޮމިޓީއަށް ޙާޒިރުކުރުމުން މިނިސްޓަރ އަމީން ވިދާޅުވީ މިހާތަނަށް މަޖިލީހަށް އެއްވެސް މަޢުލޫމާތެއް އޮޅުވާލާފައި ނުވާނެކަމަށާއި ކޯވިޑް-19ގެ އޭރުގެ ހާލަތުގައި މިނިސްޓްރީން މަސައްކަތްކުރީ ވީހާވެސް އަވަހަށް ރާއްޖެއަށް ވެންޓިލޭޓަރުތައް ގެނެވޭނެ ގޮތަކަށް ކަމަށެވެ. މިކަމާއި ގުޅިގެން ޑަބްލިޔުއެޗްއޯގެ ލަފާ ހޯދާފައިވާކަމަށްވެސް މިނިސްޓަރ ވިދާޅުވިއެވެ. މިކަމުގައި އެންމެ ފުރަތަމަ މަސައްކަތްކުރީ ޑަބްލިޔުއެޗްއޯ މެދުވެރިކޮށް ވެންޓިލޭޓަރުތައް ހޯދުމަށްކަމަށާއި ނަމަވެސް އެއިރުގެ ޙާލަތުން އެކަން ޑަބްލިޔުއެޗްއޯއަށް ކޮށްދެވެން ނެތްކަމަށެވެ. ނަމަވެސް ރާއްޖެއަށް ވެންޓިލޭޓަރުތައް ގެނައުމުގެ މަސައްކަތް ކުރީ ޑަބްލިޔުއެޗްއޯގެ ލަފާގެ މަތިންކަމަށާއި، ޑަބްލިޔުއެޗްއޯ އާއި މުއާމަލާތްކުރަން ޖެހުނީ ވެންޓިލޭޓަރުތައް ގެނައުމަށް އޭރު ހަވާލުކުރި ދިވެހި ކުންފުނިތަކަށް އެތަކެތި ގެނެވޭނެކަމުގެ ޔަޤީންކަން ނެތުމުންކަމަށެވެ. އެގޮތުން ދުނިޔޭގެ ޤައުމުތަކުގެ ބޯޑަރުތައް ބަންދުކޮށް ބައެއް ޤައުމުތަކުން އެތަކެތި އެކްސްޕޯޓްކުރުން ހުއްޓައިލަމުން ދިއުމުން އެމަސައްކަތް އަވަސްކުރުމަށް މަސައްކަތްކުރިކަމަށް ވިދާޅުވިއެވެ. މިނިސްޓަރ ވިދާޅުވީ ޑަބްލިއުއެޗްއޯއާއެކު މުއާމަލަތްކޮށް އެތަކެތި ގެންނަން ނިންމީ އޭރުގެ ޕްރޮޖެކްޝަންތައް ހުރިގޮތުން ވަރަށް ގިނަ ބައެއްގެ ފުރާނަ ގެއްލި ދިއުމުގެ ބިރު އޮތުމުންކަމަށެވެ.
"އަޅުގަނޑު އަޅުގަނޑުގެ ފައިނޭންޝަލް އެގްޒެކެޓިވްއާ މަސައްކަތް ހަވާލުކޮށްފައި ދެންނެވިން ޑަބްލިޔުއެޗްއޯގެ ތެރެއިން ބައްލަވާށޭ. މިމަޢުލޫމާތު ވެރިފައިކުރައްވާށޭ. އެބޭފުޅުން ފުރަތަމަ މަސައްކަތްކުރެއްވީ ޑަބްލިޔުއެޗްއޯ މެދުވެރިކޮށް ގެނެވޭތޯ. ނަމަވެސް އެބޭފުޅުންގެ އޭރުގެ ހާލަތު ހުރިގޮތުން ސީދާ އެބޭފުޅުންނަށް ގެނެވޭނެގޮތެއް ނެތް. އޭރުގަ އެކަން ކުރުމުގަ އެންމެ މުހިންމު ކަމަކަށްވެފައި އޮތީ ވީހާވެސް އަވަހަށް ކުރެވޭނެ މަގެއް ހޯދުން. އެހެންވީމަ އެކި ގޮތްގޮތުން އެންމެ އަވަހަށް އެކަން ކުރެވޭނެ މަގެއް ހޯދުން އެއީ އަލުގަނޑު އެކަންޏެއްނޫން. އަޅުގަނޑުމެންގެ ތެެރެއިން ހުރިހާ އެންމެންވެސް ކުރަންޖެހިފަ އޮތް މަސައްކަތެއް." މިނިސްޓަރ އަމީން ވިދާޅުވިއެވެ.
މިނިސްޓަރ އަމީން ވިދާޅުވީ ރާއްޖޭގެ އެވަގުތު ހާލަތަށް ރިޔާއަތްނުކޮށް ގޮތެއް ނިންމައިފިނަމަ އެކަމުގެ ނަތީޖާ ރަނގަޅު ނުވާނެކަމަށެވެ. ހެލްތު މިނިސްޓްރީގެ ހުރިހާ މުވައްޒަފުންވެސް އަމިއްލަ ފައިދާއެއް ނުވަތަ މަންފާއެއް ހޯދުމަށް މަސައްކަތްކޮށްފައި ނުވާނެ ކަމަށާއި، އެއީ ހެޔޮ ނިޔަތުގައި ކުރި މަސައްކަތެއް ކަމުގައި މިނިސްޓަރ އަމީން ވަނީ ވިދާޅުވެފައެވެ.