ރާއްޖޭގައި ކުރެވޭ މާލީ މުޢާމަލާތް ތައް ހަރުދަނާކޮށް ޒަމާނީކުރުމަށް ޤާއިމްކުރާ ޤައުމީ ޕޭމަންޓް ސިސްޓަމް އަންނަ އަހަރުގެ އޮކްޓޫބަރު މަހުގެ ތެރޭގައި ބޭނުންކުރަން ފެށޭވަރުވާނެކަމަށް މަރުކަޒީ ބޭންކު، އެމްއެމްއޭގެ ގަވަރުނަރު ޢަލީ ޙާޝިމް ވިދާޅުވެއްޖެއެވެ.
ސަރުކާރުގެ ފަރާތުން ރައްޔިތުންގެ މަޖިލީހުގެ ދިއްދޫ ދާއިރާގެ މެންބަރު ޢަބްދުﷲ ވަޙީދު މަޖިލީހަށް ހުށައަޅުއްވާފައިވާ ޕޭމަންޓް ސިސްޓަމާއި ޕޭމަންޓް ޚިދުމަތްތަކުގެ ބިލާއި ގުޅިގެން ގަވަރުނަރު ޢަލީ ޙާޝިމް ވަނީ މަޖިލީހަށް ހާޒިރުވެވަޑައިގެން ޤައުމީ ޕޭމަންޓް ސިސްޓަމާ ގުޅޭ މަޢުލޫމާތު މެންބަރުންނާ ޙިއްސާކުރައްވާފައެވެ.
ޕޭމަންޓް ސިސްޓަމާއި ޕޭމަންޓް ޚިދުމަތުގެ ބިލަކީ މާލީ މުޢާމަލާތް ފަސޭހަކަމާއެކު ކުރެވޭނެ އިންތިޒާމް ފަހިކޮށްދިނުމުގެ މަޤްޞަދުގައި ހުށަހަޅުއްވާފައިވާ ބިލެކެވެ. މިއީ ރާއްޖެއާއި ރާއްޖޭއިން ބޭރަށް ފަސޭހަކަމާއެކު ބޭންކު މެދުވެރިކޮށް ވަގުތުން ފައިސާ ފޮނުވުމުގެ ޚިދުމަތް ލިބިގެންދާނެ ނިޒާމެކެވެ. މީގެ އިތުރުން މި ނިޒާމުގެ ސަބަބުން ކުދި ވިޔަފާރިތަކާއި މެދުފަންތީގެ ވިޔަފާރިތަކަށް ޕޭމަންޓް އިންޑަސްޓްރީގައި ހަރަކާތްތެރިވުމުގެ ފުރުޞަތު ލިބިގެންދިއުމާއެކު ޚަރަދުކުޑަ ޕޭމަންޓް ހެދޭނެ ތަފާތު ސޮލިއުޝަންތައް މާކެޓަށް ނެރުމުގެ ފުރުޞަތު ފަހިވެގެންދާނެކަމަށް އެމްއެމްއޭއިން ވިދާޅުވެއެވެ.
ޤައުމީ ޕޭމަންޓް ސިސްޓަމާ ގުޅޭގޮތުން ވާހަކަފުޅުދައްކަވަމުން އެމްއެމްއޭގެ ގަވަރުނަރު ޢަލީ ޙާޝިމް ވިދާޅުވީ، ޤައުމީ މިފަދަ ނިޒާމެއް ޤާއިމްކުރުމުގެ މަސައްކަތް ވަރަށް ކުރިއްސުރެ ކުރަމުން އަންނަކަމަށާ، މިހާރު މިފަދަ ސިސްޓަމެއް ރާއްޖޭގައި ޤާއިމްކުރެވުން ލަސްވެފައިވެސް ވާކަމަށެވެ.
ކޯވިޑް-19އާ ގުޅިގެން އޮންލައިން މުޢާމަލާތްތައް ރާއްޖޭގައި އިތުރުވެފައިވާކަން ފާހަގަކުރައްވައި ގަވަރުނަރު ވިދާޅުވީ މިފަދަ ނިޒާމެއް މިހާތަނަށް ޤާއިމްކުރެވިފައި އޮތްނަމަ އެކަމުގެ ފެސާހަކަން ވިޔަފާރިތަކަށާއި ޢާންމުންނަށްވެސް ލިބިގެން ދިޔައީސްކަަމަށެވެ. މިއީ ވަރަށް ރައްކާތެރި މާލީ މުޢާމަލާތްކުރެވޭނެ ނިޒާމެއްކަން ފާހަގަކުރައްވައި ގަވަރުނަރު ވިދާޅުވީ ދުނިޔޭގެ ކުރިއަރާފައިވާ ޤައުމުތަކުގައިވެސްމި ނިޒާމް ބޭޏުންކުރަމުން އަންނަކަމަށެވެ. މިހާތަނަށް މިސިސްޓަމް ރާއްޖޭގައި ޤާއިމްކުރުން ލަސްވީ ކޯވިޑް-19އާ ގުޅިގެން ރާއްޖެ ގެނައުމަށް ހަމަޖެހިފައިވާ ބޭރުގެ މާހިރުންގެ ޓީމް އައުމުގައި ލަސްތަކެއް ވުމުގެ ސަބަބުންކަމަށް ގަވަރުނަރު ވިދާޅުވިއެވެ.
"މިސާލަކަށް ރަށެއްގައި ހުރި ޚިދުމަތެއް އެރަށެއް ނުވަތަ އެސަރަހައްދެއްގައި ދޭން ބޭނުންވެއްޖެނަމަ މިސިސްޓަމަށް ގުޅާލުމުން އެއީ މެދުފަންތީގެ ނުވަތަ ކުޑަ މެދުފަންތީގެ ވިޔަފާރިއަކަށްވެފަ މިއަށް ގުޅާލަން ފަސޭހަވާނެ." ގަވަރުނަރު ޢަލީ ހާޝިމް ވިދާޅުވިއެވެ.
މިސިސްޓަމުގެ ސަބަބުން ރާއްޖޭގައި ކުރެވޭ އިންވެސްޓްމަންޓައް އިތުރުވެ ވިޔަފާރީގެ ވާދަވެރިކަން އިތުރުވެގެންދާނެކަމަށްވެސް ގަވަރުނަރު ވިދާޅުވިއެވެ.
""ޕޭމަންޓް ސިސްޓަމް ނިޒާމުގެ ތެރޭގައި ކޮމްމެޓިޝަން އުފެދޭނެ. އެއީ ކުދި ފަންތިއާއި މެދުފަންތީގެ ބިޒްނަސް އަދި ބޮޑެތި ބިޒްނަސް، ބޮޑެތި ބިޒްނަސްއޭ އަޅުގަނޑު މިދަންނަވަނީ ބޭންކުތަކަށް ފައިނޭންސްޝަން ދާއިރާގަހުރި ބޮޑެތި ޕްލެޔާސްއިންނަށްއެއްހަމައަކަށް ގެނެވި ކޮންމެޕެޓިޝަން އިތުރުވާނެ."އެމްއެމްއޭގެ ގަވަރުނަރު ޢަލީ ޙާޝިމް ވިދާޅުވިއެވެ.
ގަވަރުނަރު ވިދާޅުވީ ރާއްޖޭގައި ބޭނުންކުރުމަށް ގެންނަ ޕޭމަންޓް ސިސްޓަމަކީ ބޭރު ޤައުމެއްގައި ޓެސްޓްކުރުމަށްފަހު ރާއްޖެ ގެނެސް ރާއްޖޭގެ މާހައުލާގުޅޭގޮތަށް ބަދަލުތަކެއް ގެނައުމުގެ މަސައްކަތްކުރަމުންއަންނަ ނިޒާމެއްކަމަށެވެ. އަދި ރާއްޖެއިން ބޭރުން އަންނަ މިކަމޖުގެ މާހިރުންގެ ޓީމު ރާއްޖެއައިސް ފުރަތަމަ 3 މަސް ދުވަހު ރާއްޖޭގެ މާލީ ދާއިރާ ދެނގަތުމުގެ މަސައްކަތް ކުރާނެކަމަށްވެސް ގަވަރުނަރު ވިދާޅުވިއެވެ.
ޤައުމީ ޕޭމަންޓް ސިސްޓަމް ޤާއިމްކުރުމުގެ ކޮންޓްރެކްޓްގައި އަންނަ ހަފްތާގައި ސޮއިކުރެވޭނެކަމަށްވެސް ގަވަރުނަރު ވިދާޅުވިއެވެ. މިސިސްޓަމް ޤާއިމްކުރެވުމުން ޕޭމަންޓް ޚިދުމަތް ލިބިގަންނަ ފަރާތްތަކުގެ ޙައްޤުތައް ޙިމާޔަތްކުރުމަށްޓަކައި ޚދުމަތްދޭ ފަރާތްތަކުން އަމަލުކުރަންވީގޮތް ކަނޑައަޅައި އުސޫލްތަކާއި ޤަވާއިދުތަކެއްވެސް އެކުލެވިގެންދާނެކަމަށް އެމްއެމްއޭއިން ވިދާޅުވެއެވެ.