އިހަވަންދިއްޕޮޅުގައި
ތަރައްގީކުރާ އައިހެވަން މަޝްރޫއުގައި ހިމެނޭ ޓްރާންސްޝިޕްމަންޓް ބަނދަރު
ތަރައްގީކުރާނެ ސަރަހައްދު ކަނޑައެޅުމުގެ ދިރާސާތަކެއް ކުރިއަށް ގެންގޮސްފިއެވެ.
އެގޮތުން އައިހެވަންގެ ފީސިބިލިޓީ ސްޓަޑީޒް ކުރިއަށްގެންދާ ބޮސްޓަން ކޮންސަލްޓިންގ
ގްރޫޕުން ވަނީ މިމަހުގެ 15 އަދި 16އަށް ވައިގެ މަގުންނާއި، ކަނޑު މަގުން
އެސަރަހައްދުގައި ދިރާސާތަކެއްކުރިއަށް ގެންގޮސްފައެވެ.
އިހަވަންދިއްޕޮޅުގައި ތަރައްގީ ކުރާ އައިހެވަން މަޝްރުއުގެ ފީސިބިލިޓީ ސްޓަޑީޒް
ހަދަނީ އެމެރިކާގެ ބޮސްޓަން ކޮންސަލްޓިން ގްރޫޕް، ބީސީޖީގެ ފަރާތުންނެވެ. ބީސީޖީ އަކީ މިފަދަ ދިރާސާތައް ކުރާ ދުނިޔޭގެ އެންމެ
ފުންނާބުއުސް އެއް ކުންފުނިންނެވެ. އެފަރާތުން
ދިރާސާތައް ކުރިއަށްގެންދަނީ ސަރުކާރުން ހުށަހަޅާފައިވާ މައިގަނޑު
ކޮމްޕޯނެންޓްތައް އިހަވަންދިއްޕޮޅުގައި އެންމެ ރަނގަޅަށް ތަރައްގީކުރެވޭނީ
ކޮންގޮތަކަށްތޯ ބެލުމަށެވެ. އެ ގޮތުން، ބޯޓުފަހަރު ބަންނަ ކުންފުނިތަކާއި
ބަންކަރިން އާއި ޑޮކިންގެ ޚިދުމަތް ދޭ ކުންފުނިތަކާ ވާހަކަދައްކައިގެން ވަރަށް
ތަފްސީލީ ދިރާސާތަކެއް ކުރިއަށްގެންދެއެވެ.
މިމަހުގެ ފަނަރައިން ސޯޅައަށް ބީސީޖީގެ ފަރާތުން
ވަނީ ޓްރާންޝިޕްމަންޓް ބަނަދަރު ތަރައްގީކުރެވޭނެ ސަރަހައްދުތައް ކަނޑައެޅުމަށް
އެސަރަހައްދު ބަލާ ދިރާސާތަކެއް ކޮށްފައެވެ. އެގޮތުން އެސަރަހައްދުގައި ކަނޑުގެ
އޮއިވަރާއި ވައި ހުރިގޮތާއި، ފަޅުތައް ބަލާހަދާފައިވެއެވެ. ބީސީޖީގެ ފަރާތުން
އެސަރަހައްދު ބެލުމަށް ރާއްޖެއައި އެކަމުގެ ތަޖުރިބާކާރެއްކަމަށްވާ ޓިމް ޑެންޓަން
ބުނިގޮތުގައި ޓްރާންޝިޕްމަންޓް ބަދަރު އެސަރަހައްދުގައި ތަރައްގީކުރުމަކީ ކުރިން
ލަފާކުރިވަރަށްވުރެ މާ ފަސޭހަކަމެކެވެ. ސަބަބަކީ އެސަރަހައްދުގެ ފަޅު ތިލަކަމުންކަން
ޓިމް ފާހަގަކުރެއްވިއެވެ.
ޖޯގްރަފީގޮތުން ހޯރަފުށި އޮތް
ސަރަހައްދަކީ ރާއްޖޭގައި މިވަގުތު އޮތް އެންމެ ބޮޑު ފަޅު އޮތް ސަރަހައްދެވެ. އެސަރަހައްދުން
ފަންސާސް ހާސް ޓަނުގެ ބޮޑެތި ބޯޓުފަހަރު ދަތުރު ކުރަނީ އެފްރިކާ ސަރަހައްދު
ހުރަސްކޮށްފައި އިރުމައްޗަށް ކަމަށް ވާއިރު، އިހަވަންދިއްޕޮޅަކީ ސެންޓާއެއްގެ
ގޮތުގައި ތަރައްގީކޮށްފި ނަމަ، އެ ބޯޓުތައް މަޑުކޮށް މުދާ އަރުވާ ބޭލުމުގެ
ލޮކޭޝަނަކަށް އިހަވަންދިއްޕޮޅު ވާނެކަމަށް ސަރުކާރުންދެކެއެވެ.
މި ދަތުރުގައި
ހައުސިންގ މިނިސްޓްރީގެ ފަންނީ ބޭފުޅުންނާއި އިކޮނޮކމިކް މިނިސްޓްރީގެ ބޭފުޅުން
ބައިވެރިވެ ވަޑައިގެންނެވިއެވެ. އެބޭފުޅުން ހާމަކުރިގޮތުގައި އެސަރަހައްދުގައި
ބިން ހިއްކުމަށް ބޭނުންވާ ވަސީލަތްތައް އެންމެ ފަސޭހައިން ލިބޭނެ ސަރަހައްދުތައް
ކަނޑައެޅުމާއިގުޅޭގޮތުން ވެސް މައުލޫމާތު އެއްކުރިއެވެ.
ހޯރަފުށީ ދާއިރާގެ މެމްބަރު މުހައްމަދު އިސްމާއިލް ވިދާޅުވިގޮތުގައި އަހަރަކު
އެތައްބޯޓެއް އެސަރަހައްދު ހުރަސްކޮށް ދަތުރުކުރުމަކީ ވަރަށް ބޮޑު އާމްދަނީއެއް ލިބޭނެކަމެއްކަމަށާއި،
އެއީ ރާއްޖެއަށް އަދި ޚާއްސަކޮށް އެސަރަހައްދަށް އަންނާނެ އެންމެ ބޮޑު ކުރިއެރުމަށް
އެކަންވާނެކަން ފާހަގަކުރެއްވިއެވެ.
އައިހެވަންގައި ހިމެނޭ ކޮމްޕޯނަންޓްތަކާ އެކު ތަރައްގީ ކޮށްފި ނަމަ ރާއްޖެ
އަށް އެއީ ރާއްޖެއަށް ލިބިގެންދާނެ ވަރަށް ބޮޑު ކުރިއެރުމެއްގެގޮތުގައި
އެސަރަހައްދުގެ މީހުންވެސް ދެކެއެވެ. އެއީ ތަރައްގީގެ ދުވެލީގައި މި ސަރަހައްދުގެ
ބޮޑެތި ގައުމުތަކާ ވާދަކުރުމުގެ މަގު ފަހިވާނެ ފުރުސަތަކަށްވާނޭކަމަށް އެމީހުން
ގަބޫލުކުރެއެވެ.
އައިހެވަން މަޝްރޫއުއަކީ ރައީސް އަބްދުﷲ ޔާމީންގެ
ރިޔާސީ ވައުދެކެވެ. ޓޫރިޒަމަށް ރާއްޖެ ބަރޯސާވެފައި އޮތް އޮތުން ނިމުމަކަށް ގެނައުމަށް
ރާވާފައިވާ އެންމެ ބޮޑު މަޝްރޫއު އަކީ ވެސް އައިހެވަން މަޝްރޫއުއެވެ. އެގޮތުން
މިހާރުވެސް އިންވެސްޓަރުންގެ ޝައުގުވެރިކަން އެތަނަށް އޮތް އޮތުން އެއީ އެ
ހުވަފެން ހަގީގަތަކަށް ވުމުގެ ކޮޅުމަތި ކަމަށް ސަރުކާރުން ދެކެއެވެ. ސަބަބަކީ
އެމަޝްރޫއު ހަގީގަތަކަށް ވުމަކީ ރާއްޖެއަށް އާ އަދި ވަރަށް ބޮޑު އިންޑަސްޓްރީއެއް
ހުޅުވިގެންދާނެކަމަށްވާތީއެވެ. ސަރުކާރުގެ އަމާޒަކީ ބޮޑު ޓްރާންސްޝިޕްމަންޓް
ބަނދަރެއްގެ އިތުރުން އެއާޕޯޓަކާއި ޔޮޓް މެރީނާ އަކާއި ކްރޫޒް ހަބަކާއި ޑޮކްޔާޑް
އަދި ބަންކަރިން ފެސިލިޓީޒްއާ އެކު އައިހެވަން ތަރައްގީ ކުރުމެވެ.