ބޭރުފައިސާ ގަނެވިއްކުމުގެ ލައިސަންސް ދިނުން އެމްއެމްއޭއިން ވަގުތީގޮތުން ހުއްޓާލައިފިއެވެ.
މޯލްޑިވްސް މަނިޓަރީ އޮޓޯރިޓީ، އެމްއެމްއޭއިން ވިދާޅުވީ، ރާއްޖޭގެ އާބާދީއާއި އަޅާބަލާއިރު ގިނަ އަދަދެއްގެ ވިޔަފާރިތަކަކަށް ބޭރު ފައިސާ ގަނެވިއްކުމުގެ ލައިސަންސް އެ އޮތޯރިޓީން ދޫކޮށްފައިވާކަމަށެވެ. އެހެންކަމުން ބޭރުފައިސާ ގަނެވިއްކުމުގެ ވިޔަފާރިކުރުމަށް އިތުރު ފަރާތްތަކަށް ލައިސަންސް ދޫކުރުން މިއަދުން ފެށިގެން ވަގުތީގޮތުން ހުއްޓާލާފައިވާކަމަށް އެމްއެމްއޭއިން ވިދާޅުވިއެވެ.
އެމްއެމްއޭއިން ބުނީ މަނީ ޗޭންޖަރުންނާއި ގުޅޭ ގަވާއިދު އިސްލާހު ކުރުމުގެ މަސައްކަތްވެސް އެ އޮތޯރިޓީން ކުރަމުންދާކަމަށެވެ. ބޭރުފައިސާ ގަނެވިއްކުމުގެ ލައިސަންސަދިނުން އެމްއެމްއޭއިން ވަގުތީގޮތުން ހުއްޓާލާފައިމިވަނީ ކޯވިޑް19އާ ގުޅިގެން ބޭރު ފައިސާ ލިބުން ދަތިވެފައިވާ ދަނޑިވަޅެއްގައެވެ.
ކޯވިޑް19އާ ގުޅިގެން ބޭންކުތަކަށް ޑޮލަރު ދޫކުރާ މިންވަރު މީގެކުރިން އެމްއެމްއޭއިން ވަނީ ހިފަހައްޓާފައެވެ. ނަމަވެސް މިމަހުގެ ތެރޭގައި އެމްއެމްއޭއިން ވަނީ ބޭންކުތަކަށް ދޫކުރާ ޑޮލަރުގެ މިންވަރު އަނެއްކާވެސް އިތުރުކޮށްފައެވެ. ޑޮލަރު ދޫކުރާ މިންވަރު އިތުރުކުރުމަށް ނިންމާފައިވަނީ ބޭރު ފައިސާގެ ބާޒާރަށް އޮތް ޕްރެޝަރު ކުޑަކުރުމަށް އެހީވެދިނުމަށްކަމަށް އެ އިދާރާއިން ވަނީ ބުނެފައެވެ.