މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން، އެމްޓީޑީސީގެ ހިއްސާދާރުންގެ އެ ކުންފުނީގެ ވެބް ޕޯޓަލްގައި ރަޖިސްޓްރީވުމަށް އެދިއްޖެއެވެ.
އެމްޓީޑީސީއިން ބުނީ، އެ ކުންފުނީގެ ހިއްސާދާރުންނަކީ 2006 ވަނަ އަހަރު ކުންފުނި އުފެދުނީއްސުރެ ހިއްސާ ގަނެ، ހިއްސާދާރުންގެ ގޮތުގައި ރަޖިސްޓްރީކޮށްފައިވާ ފަރާތްތައްކަމަށެވެ. އަދި ވެތުވެދިޔަ 14 އަހަރުގެ ތެރޭގައި ބައެއް ހިއްސާދާރުން މައުލޫމާތު ބަދަލުވެ، ބައެއް ހިއްސާދާރުން ނިޔާވެފައިވާތީ ހިއްސާދާރުންގެ ރަޖިސްޓްރީ އަދާހަމަކުރުމަށްޓަކައި ވެބް ޕޯޓަލްއެއް ތައްޔާރުކޮށްފައިވާކަމަށް އެމްޓީޑީސީން ބުނެއެވެ. ކުންފުނީގެ ކޮންމެ ހިއްސާދާރެއްވެސް އެ ވެބް ޕޯޓަލްގައި ރަޖިސްޓްރީވުމަށްފަހު ފުރިހަމަކުރަންޖެހޭ މައުލޫމާތު ފުރިހަމަކުރުމަށް އެމްޓީޑީސީން ވަނީ އެދިފައެވެ.
އެމްޓީޑީސީއިން ބުނީ ނިޔާވެފައިވާ ހިއްސާދާރެއްނަމަ ވާރިސުންގެ ފަރާތުން އެކަން އިނގޭނެ ރަސްމީ ލިޔުމެއް ނޮވެމްބަރުމަހުގެ 15 ވަނަ ދުވަހުގެ ކުރިން އެ ކުންފުނީގެ އޮފީހަށް ނުވަތަ މެއިލްއަށް ފޮނުވުމަށް އެދޭކަމަށެވެ.
11 އަހަރަށްފަހު އެމްޓީޑީސީން ވަނީ އެކުންފުނީގެ ފައިދާ ހިއްސާދާރުންނަށް ބެހުމަށް ނިންމާފައެވެ. ހިއްސާގެ ފައިދާގެ ގޮތުގައި ބަހަނީ ހިއްސާއަކަށް 0.50 ރުފިޔާއެވެ. އެމްޓީޑީސީއިން ބުނީ. އޮކްޓޯބަރުމަހުގެ 15 ވަނަ ދުވަހުން ފެށިގެން ހިއްސާގެ ފައިދާ ހިއްސާދާރުންނަށް ބެހުމަށް އެ އެމްޓީޑީސީން ނިންމާފައިވާއިރު ހިއްސާގެ ފައިސާ ޖަމާކުރާނީ ހިއްސާދާރުންގެ މައުލޫމާތު ކުންފުނީގެ ވެބް ޕޯޓަލްއިން ފުރިހަމަކުރުމުންކަމަށް އެކުންފުނިން ބުނެއެވެ.