ދަނޑުވެރިކަމަކީ ޒަމާނުއްސުރެން ދިވެހިން ކުރަމުން އަންނަ މުހިންމު މަސައްކަތެކެވެ. އޭރު ދިވެހިންގެ އިޤްތިސާދު މުޅިންހެން ބިނާވެފައިއޮތީ ދަނޑުވެރިކަމުގެ މައްޗަށެވެ. ނަމަވެސް ގިނަ ފަރާތްތަކުން ދަނޑުވެރިކަމަކީ މޫސުމީ ކަމެއްކަމަށް ޤަބޫލުކޮށް އެހެނިހެން ސިނާއަތްތަކަށް އިސްކަންދޭން ފެށުމުގެ ސަބަބުން ދިވެހި އިޤްތިސާދުގައި ދަނޑުވެރިކަން ޙިއްޞާކުރާ މިންވަރު ވަނީ ދަށްވެފައެވެ.
މިއަހަރުން ފެށިގެން ކޮންމެ އަހަރަކުވެސް އޮކްޓޯބަރ މަހުގެ 15 ވަނަ ދުވަހަކީ ރާއްޖޭގެ ދަނޑުވެރިންގެ ދުވަސްކަމަށް ރައީސުލްޖުމްހޫރިއްޔާ އިބްރާހިމް މުޙައްމަދު ޞާލިހް ވަނީ ކަނޑައަޅުއްވާފައެވެ. މިއަހަރުގެ ދަނޑުވެރިންގެ ދުވަސް އަޅުގަނޑުމެންނަށް ކުރިމަތިލާންޖެހިފައި ވަނީ މުޅި ދުނިޔެއަށްވެސް ސިއްހީ ބޮޑު ކާރިސާއެއް ކުރިމަތިވެފައިވަނިކޮށެވެ.
ކޯވިޑް19 ރާއްޖެއަށް ކުރިމަތިވިއިރު ރާއްޖޭގެ އިޤްތިޟާދު މުޅިންހެން ބިނާވެފައިވަނީ ފަތުރުވެރިކަމުގެ މައްޗަށެވެ. ނަމަވެސް މި ކާރިސާގެ ސަބަބުން ފަރުދީ ފެންވަރުގައި އަދި ޤައުމީ ފެންވަރުގައިވެސް ދަނޑުވެރިކަން ކުރިއަރުވައި ދެމެހެއްޓެނިވި ގޮތެއްގައި ދަނޑުވެރިކަން ކުރުމުގެ މުހިންމުކަން މިވަނީ ހާމަވެގެންގޮސްފައެވެ. އެގޮތުން މިއަހަރުގެ ދަނޑުވެރިންގެ ދުވަހުގެ ޝިއާރެއްގެ ގޮތުގައި ކަނޑައަޅާފައިވަނީވެސް "ފަރުދީ ދަނޑުވެރިކަން – ކާނާގެ ޔަޤީންކަން" މެވެ.
އިޤްތިޟާދު ވަކި ސިނާއަތަކަށް ބަރޯސާވެފައި އޮންނަ އޮތުން ނިމުމަކަށްގެނެސް ދަނޑުވެރިކަމަކީވެސް ރާއްޖޭގެ އިޤްތިޟާދުގައި މުހިންމު ސިނާއަތަކަށް ހެދުމަށް ސަރުކާރުން މިހާރު އަންނަނީ ގިނަ މަސައްކަތްތަކެއް ކުރަމުންނެވެ. އެގޮތުން ދަނޑުވެރިކަމަށް ރާއްޖެ އެތެރެކުރާ ބައެއް ތަކެތީގެ ޑިއުޓީ ކަނޑާލައި އަދި ޑިއުޓީ ރޭޓްވެސް ވަނީ ދަށްކޮށްފައެވެ. ދަނޑުވެރިންނަށް ޙާއްސަކޮށް "ދަނޑުވެރި ނަފާ" ގެ ނަމުގައި ލޯނުވެސް މިހާރު އަންނަނީ ދޫކުރަމުންނެވެ. މީގެއިތުރުން ދަނޑުވެރިކަން ކުރުމަށް ފަޅު ރަށްތަކާއި މީހުން ދިރިއުޅޭ ރަށްރަށުން ބިންތައްވެސް ދޫކުރާކަން ފާހަގަކޮށްލެވެއެވެ.
ދަނޑުވެރިކަމުގެ ސިނާޢަތަށް ޒުވާނުން ޝައުޤުވެރިކުރުވުމަށް ގިނަ ޙަރަކާތްތަކެއް ހިންގާ ހޭލުންތެރިކުރުވުމުގެ ވޯކްޝޮޕްތައް ރާއްޖޭގެ ތަފާތު އެކި ހިސާބުތަކުގައި އަންނަނީ ހިންގަމުންނެވެ. ރާއްޖެއަށް އިންޕޯޓް ކުރެވޭތަކެތި މަދުކޮށް ރާއްޖޭގައި އުފައްދާ ތަކެތި ގިނަ ކުރުމަށް ސަރުކާރުން ގިނަ މަސައްކަތްތަކެއް ކުރަމުން އަންނައިރު ވަކި ބާވަތްތަކެއްގެ މޭވާއާއި ތަރުކާރީ ރާއްޖެއަށް އެތެރެކުރަން ނުޖެހޭވަރަށް އެތަކެތި ހެއްދުމަށް އެގްރިކަލްޗަރ މިނިސްޓްރީން ވަނީ އަމާޒު ކަނޑައަޅާފައެވެ.
ދަނޑުވެރިކަމުގެ ސިނާއަތުގައި މަސައްކަތްކުރާ ފަރާތްތަކުގެ އެންމެ ބޮޑު ޝަކުވާއަކަށް އަބަދުވެސް ވެފައިވަނީ އެމީހުން ހައްދާ ތަކެތި އެންމެ އެކަށީގެންވާ ގޮތުގައި މާކެޓް ނުކުރެވި، ހަމައަގު ނުލިބުމެވެ. މިކަން ހައްލުކުރުމުގެ ގޮތުން "އެގްރޯ ނޭޝަނަލް ކޯޕަރޭޝަން"ގެ ނަމުގައި ސަރުކާރުގެ 100 އިންސައްތަ ހިއްސާ އޮންނަ ކުންފުންޏެއް އުފައްދައި ކުންފުނީގެ މަސައްކަތްތައް މިހާރު ވަނީ ފަށާފައެވެ.
ޒަމާނަށް އަންނަމުންދާ ބަދަލުތަކާއިއެކު ދިވެހިންގެ ދަނޑުވެރިކަމަށްވެސް މިހާރުވަނީ ބޮޑެތި ބަދަލުތަކެއް އަންނަން ފަށާފައެވެ. ދިވެހިން ކުރިން ޢާއްމުކޮށް ދަނޑުވެރިކަން ކުރަމުން އައީ ބިމުގެ ފަސްގަނޑުގައެވެ. ނަމަވެސް މިހާރު ފެނުގައި ވެސް ގަސް އިންދައެވެ. އަދި ގަހަށް ފެން ދިނުމަށް ވެސް ތަފާތު ގޮތްތައް ދަނީ ބޭނުންކުރަމުންނެވެ.
މިނިސްޓްރީ އޮފް ފިޝަރީޒް މެރިން ރިސޯސަސްއިން ހެދި ދިރާސާއަކުން ދައްކާގޮތުގައި ރާއްޖޭގެ ގިނަ ރަށްރަށަކީ، މަސައްކަތްކޮށްފިނަމަ އެކަށީގެންވާ ފެންވަރަކަށް ދަނޑުވެރިކަން ކުރެވިދާނެ ރަށްރަށެވެ. އެހެންކަމުން މިހާރު ރާއްޖޭގައި ހައްދާ ބާވަތްތަކުގެ އިތުރަށްވެސް ބައެއްކަހަލަ މޭވާއާއި ތަރުކާރީ ރާއްޖޭގައިވެސް ހެއްދިދާނެކަމަށް އެމިނިސްޓްރީން ބުނެއެވެ. ރާއްޖޭގައި ހެއްދިދާނެކަމަށް ކުރިން ޤަބޫލުނުކުރެވޭ އެތަކެއް ބާވަތެއްގެ މޭވާއާއި ތަރުކާރީއެއް މިއަދު ރާއްޖޭގައި ހައްދަމުންވެސް އެބަދެއެވެ.