ގެސްޓްހައުސްތައް އަލުން ހުޅުވާލާއިރު ގެސްޓްހައުސްތަކަށާއި، ގެސްޓްހައުސް އޮޕަރޭޓްކުރާ ރަށްރަށުގެ ރައްޔިތުންނަށް މާސްކް ބަހަން ނިންމާފައިވާކަމަށް ޓޫރިޒަމް މިނިސްޓްރީން ވިދާޅުވެއްޖެއެވެ.
އަތޮޅުތެރޭގެ ރަށްރަށުގެ ގެސްޓްހައުސްތައް ފަތުރުވެރިންނަށް މިއަދު ހުޅުވާލާފައިވާއިރު ޓޫރިޒަމް މިނިސްޓްރީން ވިދާޅުވީ، ގެސްޓްހައުސް ސިނާއަތް އަލުން ފަށަން ވަމުންދާ ތައްޔާރީތައް ފާހަގަކޮށް، ކޯވިޑް 19 ގެ ބަލިމަޑުކަމުން އަރައިގަތުމަށް ރާއްޖެއިން ކުރަމުންދާ މަސައްކަތައް އެހީތެރިވުމުގެ ގޮތުން ޔޫއެންޑީޕީން ނޮން ސަރޖިކަލް މާސްކް ހަދިޔާކޮށްފައިވާކަމަށެވެ. އަދި މި މާސްކުތައް ރާއްޖޭގައި ހިންގާ ގެސްޓްހައުސްތަކަށް ބެހުމަށް ހަމަޖެހިފައިވާކަމަށް މިނިސްޓްރީން ވިދާޅުވެއެވެ. މީގެއިތުރުން ދިވެހި ރައްޔިތުންގެ ސަލާމަތާއި ރައްކާތެރިކަމަށް ސަރުކާރުންދޭ އަހައްމިއްޔަތު ފާހަގަކޮށް ސިންގަޕޫރުގެ ޓެމަސެކް ފައުންޑޭޝަންއިންވެސް ވަނީ ރީޔޫސަބަލް މާސްކް ވަނީ ހަދިޔާކޮށްފައެވެ. މި މާސްކްތައް ބަހާނީ ގެސްޓްހައުސް ހިންގާ ރަށްރަށުގެ ރައްޔިތުންނަށްކަމަށް ޓޫރިޒަމް މިނިސްޓްރީން ވިދާޅުވެއެވެ. މި މާސްކުތައް ގެސްޓްހައުސްތަކާއި ރަށްރަށުގެ ރައްޔިތުންނަށް ކައުންސިލް މެދުވެރިކޮށް ބެހުމަށްޓަކައި އެލްޖީއޭއާއި ހަވާލުކުރާނެކަމަށް ޓޫރިޒަމް މިނިސްޓްރީން ވިދާޅުވެއެވެ.
ޓޫރިޒަމް މިނިސްޓްރީން ވިދާޅުވީ، ގެސްޓްހައުސް ހުޅުވުމަށް އެޗްޕީއޭއިން ކަނޑައަޅާފައިވާ އުސޫލާއި އެއްގޮތައް ރާއްޖޭގެ ބައެއް ގެސްޓްހައުސްތައް މިހާރު ހުޅުވުމަށް ތައްޔާރުވެފައިވާކަމަށެވެ. އަދި ފާއިތުވި ދުވަސްތަކުގައި ފަތުރުވެރިކަމުގެ ސިނާއަތުގައި ހަރަކާތްތެރިވާ ފަރާތްތަކުން އެޗްޕީއޭއާއި ކަމާގުޅުންހުރި ފަރާތްތަކުގެ އިރުޝާދުތަކާއި އެންގުންތަކަށް ބޯލަނބާފައިވާތީ މިނިސްޓްރީން ވަނީ ޝުކުރުއަދާކޮށްފައެވެ.