ފަތުރުވެރިން ރާއްޖެ އައުމުގެ ކުރިން ހަދަންޖެހޭ ޕީސީއާރު ޓެސްޓްް ހެދުމުގައި އޮންނަ އުސޫލަށް ޓޫރިޒަމް މިނިސްޓްރީން ބަދަލުތަކެއް ގެނެސްފިއެވެ.
މިދިޔަ މަހުގެ 10 ވަނަ ދުވަހުން ފެށިގެން ރާއްޖެ އަންނަ ހުރިހާ ފަތުރުވެރިން، ރާއްޖެއަށް އެތެރެވެވޭނީ 72 ގަޑިއިރުނުވާ ނެގެޓިވް ޕީސީއާރު ޓެސްޓަކާއެކުއެވެ. ނަމަވެސް ޓޫރިޒަމް މިނިސްޓްރީން ވިދާޅުވީ މިހާރު ފަތުރުވެރިން ހުށަހަޅަންޖެހޭނީ 96 ގަޑިއިރުނުވާ ނެގެޓިވް ޕީސީއާރު ޓެސްޓެއްކަމަށެވެ.
މި ބަދަލާއިއެކު ރާއްޖެ އަންނަ ފަތުރުވެރިންގެ އަދަދު އިތުރުވެގެންދާނެކަމަށް ޓޫރިޒަމް މިނިސްޓްރީން ވަނީ އަންދާޒާކޮށްފައެވެ. ރާއްޖެ އަންނަ ހުރިހާ ފަތުރުވެރިން ކޯވިޑް19އަށް ނެގެޓިވް ޕީސީއާރު ޓެސްޓެއް އޮންނަން ޖެހޭނެކަމަށް ސަރުކާރުން ކަނޑައެޅީ ރާއްޖެއަކީ ރައްކާތެރި ފަތުރުވެރިކަމުގެ މަންޒިލެއްކަން ކަށަވަރުކުރުމަށްޓައެވެ.
ރާއްޖެއަށް އެތެރެވުމަށް ޕީސީއާރް ޓެސްޓް ހެދުން މަޖުބޫރުކޮށްފައިވާއިރު، މިހާރު ރާއްޖެއިން ފުރާ ފަތުރުވެރިންނަށްވެސް މި ޓެސްޓް ހެދޭނެ އިންތިޒާމް 4 ސަރަހައްދެއްގައި ވަނީ ހަމައްސާފައެވެ. އެއީ ހުޅުމާލެ ހޮސްޕިޓަލް، ކުޅުދުއްފުށީ ރީޖަނަލް ހޮސްޕިޓަލް، އައްޑޫ އިކުއެޓޯރިއަލް ހޮސްޕިޓަލް އަދި މާލޭގައިނަމަ ފޮލިސް ލެބް އަދި އައިޖީއެމް ހޮސްޕިޓަލެވެ.
ކޯވިޑް19އަށްފަހު ރާއްޖޭގެ ބޯޑަރު އަލުން ހުޅުވާލުމާއެކު މިމަހުގެ 5 ވަނަ ދުވަހާއި ހަމައަށް ބާވީސް ހާހަށްވުރެ ގިނަ ފަތުރުވެރިން ރާއްޖެ ޒިޔާރަތްކޮށްފައިވާކަމަށް ތަފާސް ހިސާބުތަކުން ދައްކައެވެ.