ހުޅުމާލޭގައި ކުރިއަށްގެންދިއުމަށް ހަމަޖެހިފައިވާ ދަނޑުވެރިކަމުގެ ޕްރޮގްރާމްގައި ބައިވެރިވުމުގެ ފުރުސަތު ހައުސިންގ ޑިވެލޮޕްމަންޓް ކޯޕަރޭޝަން އެޗްޑީސީން ހުޅުވާލައިފިއެވެ.
"ކޮމިއުނިޓީ އަރބަން ފަރމިންގ" ޕްރޮޖެކްޓްގައި 600އަކަފޫޓުގެ 16 ޕްލޮޓް ދޫކުރާނެއެވެ. އެޗްޑީސީން ވިދާޅުވީ ޕްރޮޖެކްޓްގައި ބައިވެރިވުމަށް އެދި ހުށައެޅޭނީ 3 މީހުންގެ ގްރޫޕްހަދައިގެން ކަމަށެވެ.
ޕްލޮޓަށް އެދި ފޯމު ހުށައެޅުމުގެ ފުރުސަތު މިހާރު ހުޅުވާލާފައިވާއިރު، މި ފުރުޞަތު މިމަހުގެ 29 އާއި ހަމައަށް ވަނީ ހުޅުވާލާފައެވެ. 18އަހަރުން މަތީގެ، ހުޅުމާލޭގައި ދިރިއުޅޭ ކޮންމެ ތިންމީހަކަށްވެސް ގުރޫޕްހަދައި ޕްލޮޓަށް އެދި ހުށައެޅޭނެއެވެ. ކޮންމެ ގްރޫޕަކުން ހުށައެޅޭނީ އެއް ފޯމެވެ. އަދި ކޮންމެ ވަކި ފަރުދަކަށް ބައިވެރިވެވޭނީވެސް އެއް ގްރޫޕްގައެވެ.
16 ޕްލޮޓް 3 ގްރޫޕަކަށް ބެހުމަށް ވަނީ ހަމަޖެހިފައެވެ. ޕްލޮޓްތަކުގެ 40% ޚާއްސަކޮށްފައި ވަނީ އަންހެނުން ނަށެވެ. ޒުވާނުންނާއި ނުކުޅެދުންތެރިކަން ހުންނަ މީހުންނަށް 30% އަދި އާއްމުކޮށް ހުޅުވާލައިގެން 30% ޕްލޮޓް ދޫކުރާނެއެވެ.
މި މަޝްރޫޢު ކުރިއަށްގެންދަނީ ހުޅުމާލެ "ނެއިބަހުޑް 3" ސަރަޙައްދުގައެވެ.
މަޝްރޫޢު ކުރިއަށްގެންދަނީ ތިން ފިޔަވައްސަކަށް ބަހާލައިގެންނެވެ. އެގޮތުން ފުރަތަމަ ފިޔަވަހީގެ ތިންމަސް ދުވަހު އެއްވެސް ފީއެއް ނުނަގާނެކަމަށް އެޗްޑީސީން ބުނެއެވެ. ހަތަރުވަނަ މަހުން(ދެވަނަ ފިޔަވަހި) ފެށިގެން 3މަސްދުވަހުގެ މުއްދަތަށް ކޮންމެ ޕްލޮޓަކުން މަހަކު 1275ރުފިޔާގެ ފީއެއް ދައްކަންޖެހެއެވެ. އަދި ހަތްވަނަ މަހުން ފެށިގެން ކޮންމެ މަހަކު ޕްލޮޓަކަށް 2500ރުފިޔާ ފީއެއް ދައްކަން ޖެހޭނެއެވެ.
ޕްލޮޓް އެޗްޑީސީން ދޫކުރަނީ ގިނަ ޚިދުމަތްތަކާއިއެކުއެވެ. އެގޮތުން ކޮންމެ ގްރޫޕަކަށް 600 އަހަފޫޓުގެ ބިމާއި، ގަސްކާނާ އާއި ދަނޑުވެރިކަމަށް ބޭނުންވާ އާލާތްތައް ގަނެވޭ ފިހާރައެއް އެ އޭރިއާގައި ހުންނާނެއެވެ. އަދި ގަސް މުޑުވަށް ކުރުމަށް ގްރީން ހައުސް ބޭނުންކުރެވޭނެ ގޮތްތަކާއި، މަސައްކަތްކުރަން ބޭނުންކުރާ ސާމާނު ރައްކާކުރާ ޓޫލް ޝެޑާއި، އާއްމު ފާޚާނަ ބަރިއާއި، މަޑުކޮށްލައިގެން ތިބެވޭ ގޮތަށް ކުޑަ ޕާކަކާއި، ސެކިއުރީ ބެލެހެއްޓުމުގެ ޚިދުމަތްވެސް ލިބޭނެއެވެ.
އަދި ފުރަތަމަ ހަމަ ސްދުވަހަށް ބަހާލައިގެން 25 ކިލޯގެ 25 ބަސްތާ ގަސްކާނާ ކޮންމެ ޕްލޮޓަކަށް ދިނުމާއި، 3 މަހު ފެނާއި ކަރަންޓުގެ ޚަރަދަށް ހޭދަކުރުމަށް 500ރުފިޔާގެ އެލަވަންސެއްވެސް ދޭނެކަމަށް އެޗްޑީސީން ބުނެއެވެ.
"ކޮމިއުނިޓީ އަރބަން ފަރމިންގ" ޕްރޮޖެކްޓަކީ އެޗްޑީސީއާއި ޔޫއެންޑީޕީ އާއި އެގްރިކަލްޗަރ މިނިސްޓްރީ އަދި އިކޮނޮ،މިކް މިނިސްޓްރީ ގުޅިގެން ކުރިއަށްގެންދާ މަސައްކަތެކެވެ. މި ޕްރޮގްރާމްގެ އެންމެ ބޮޑު މަޤުސަދަކީ ރަށުގައި ތިބެގެން މަންފާ ހޯދޭނެ މަގު ފަހިކޮށްދިނުމެވެ.