ޗައިނާ-ރާއްޖެ އެއްބަސްވުމުގައި ސުން ޕަސެންޓް ހިމަނާފައިވަނީ ރާއްޖޭގައި ނުބާނާމަހަށް : މަޖިލީހުގެ ރައީސް
ރާއްޖެއާއި ޗައިނާއާއި ދެމެދު އެކުލަވާލާފައިވާ މިނިވަން ވިޔަފާރީގެ އެއްބަސްވުމުގެ ދަށުން ޗައިނާއަށް އެތެރެކުރެވޭ މަހުގެ ބާވަތްތަކުގެ ތެރެއިން ސުން ޕަސެންޓު ނަގާ ލިސްޓުގައި ހިމަނާފައިވަނީ ރާއްޖޭގައި އެއްގޮތަކަށްވެސް ނުބާނާ މަހަށްކަމަށް ރައްޔިތުންގެ މަޖިލީހުގެ ރައީސް މުޙައްމަދު ނަޝީދު ވިދާޅުވެއްޖެއެވެ.
ދިވެހި ސަރުކާރުން ޗައިނާ އާ ދެމެދު ހަދާފައިވާ މިނިވަން ވިޔަފާރީގެ އެއްބަސްވުމުން ދިވެހި މަސްވެރިންނަށް ލިބެންޖެހޭ މަންފާތައް މިނިސްޓްރީން ހިފަހައްޓާފައިވާކަމަށް ބުނެ ކާށިދު ދާއިރާގެ މެންބަރު ޢަބްދުﷲ ޖާބިރު ހުށައެޅުއްވި ސުވާލަކަށް ޖަވާބުދެއްވުމަށް ފިޝަރީޒް މިނިސްޓަރ ޒަހާ ވަޙީދު ޙާޒިރުކުރި ޖަލްސާގައި، މިނިވަން ވިޔަފާރީގެ އެއްބަސްވުމާއި ގުޅޭގޮތުން މަޖިލީހުގެ ރައީސް މުޙައްމަދު ނަޝީދު ވިދާޅުވީ މިއެއްބަސްވުން މިހާރު ވުޖޫދުގައި ނެތްކަމަށެވެ. އެ އެއްބަސްވުމުގެ ދަށުން އެކުލަވާލާފައިވާ މަސްވެރިކަމުގެ ޑިއުޓީ ޝީޓް ލިބިވަޑައިގެންފައިވާ ކަމަށްވެސް މަޖިލީހުގެ ރައީސް ވިދާޅުވިއެވެ.
"އޭގެތެރޭގައި ދިރޭ މަސް، އޯނަމަންޓަލް މަހަށް 17.5 ޕަސެންޓް، އެހެން ދިރޭ މަހަށް 17.5 ޕަސެންޓް. ދެން ރާއްޖޭގައި ނުލިބޭ އެއްޗެއްވެއްޖާ ސުން ޕަސެންޓް. އެކަހަލަ އެއްޗިއްސަށް ވަރަށް ރަނގަޅަށް ހުރީ. އިއްޒަތްތެރި މެންބަރުން ބައްލައްވާ ލައްވައިފިއްޔާ މި ޑިއުޓީ ޝީޓު ފެނިވަޑައިގަންނަވާނެ ފްރީޓްރޭޑް އެގްރިމަންޓްގައި އަޅުގަނޑުމެންނަށް ލިބިފައިމިވާ ޑީލު. މިރާއްޖޭގައި ނުބާނާ ހުރިހާ ބާވަތެއްގެ މަހަކަށް ސުން ޕަސެންޓު އެބަހުރި." މަޖިލީހުގެ ރައީސް މުހައްމަދު ނަޝީދު ވިދާޅުވިއެވެ.
ރާއްޖެއިން ލިބޭ މަހެއްވެއްޖެނަމަ ޔޫރަޕިއަން ޔޫނިއަނުން ނަގާ ޑިއުޓީއާއި ދާދި އެއްވަރެއްގެ ޑިއުޓީއެއް ނަގާކަމަށް ލިސްޓުގައި ހިމަނާފައިވާކަމަށްވެސް މަޖިލީހުގެ ރައީސް ވިދާޅުވިއެވެ.
ރައީސް ނަޝީދު މިހެން ވިދާޅުވުމުން ކުރީ ސަރުކާރުގައި މިއެއްބަސްވުން އެކުލަވާލުމުގައި އެންމެ އިސް ދައުރެއް އަދާކުރެއްވި މާވަށު ދާއިރާގެ މިހާރުގެ މެންބަރު މުޙައްމަދު ސަޢީދު ވަނީ ނިޒާމީ މައްސަލައެއް ނަންގަވާ ވިދާޅުވީ، މަޖިލީހުގެ ރައީސް ވިދާޅުވި ވާހަކަފުޅަކީ އިތުރުފުޅެއްކަމަށެވެ.
"އަޅުގަނޑު ވަރަށް ބޮޑަށް އެދެން މަޖިލީހުގައި ތިވާހަކަފުޅު ތިގޮތަށް ވިދާޅުވީމަ އަޅުގަނޑު ކުރީ ދުވަހު ދެންނެވިގޮތަށް 296 އައިޓަމް ސުން ޕަސެންޓުގައި އެކްސްޕޯޓް ކުރެވޭނެ ވާހަކަ. އިއްޒަތްތެރި ރައީސް ވިދާޅުވި ތިވާހަކަފުޅަކީ މުޅިން ރަނގަޅު ވާހަކަފުޅެއް ނޫން އިނގޭތޯ."މާވަށު ދާއިރާގެ މެންބަރު މުޙައްމަދު ސަޢީދު ވިދާޅުވިއެވެ.
ސަޢީދު އެހެން ވިދާޅުވުމުން ރައީސް ނަޝީދު ވިދާޅުވީ އެ އެގްރިމަންޓްގެ ސީދާ ކޮޕީ އަތްޕުޅުގައި އޮންނެވިކަމަށާއި، އެއީ މަޖިލީހުގައި އޮތް ކޮޕީއެއްކަމަށެވެ. އެއީ މަޖިލީހަށް ގެނެސްގެން ނިންމި އެގްރިމެންޓެއްކަމަށާއި އެގްރިމަންޓަށް ވޯޓް ދިނީވެސް މަޖިލީހުންކަމަށެވެ. ރައީސް ނަޝީދު ވިދާޅުވީ އެއެގްރިމަންޓް ފާސްކޮށްފައިވަނީ ބައްލަވަންޖެހޭ މިންވަރަށް ނުބައްލަވާކަމަށެވެ.
ކުރީގެ ސަރުކާރުން ޗައިނާއާއެކު އެކުލަވާލާފައިވާ މިނިވަން ވިޔަފާރީގެ އެއްބަސްވުމަކީ ދައުލަތަށް ފައިދާވާ އެއްބަސްވުމެއް ނޫންކަމަށް ސަރުކާރުން އަންނަނީ ވިދާޅުވަމުންނެވެ.