ވިލާ އެއަރގެ، ފްލައިމީން މާމިގިއްޔާއި އިންޑިއާއާ ދެމެދު ޝެޑިއުލް ދަތުރުތައް ފެށުމަށް ތައްޔާރުވެއްޖެއެވެ.
ސެޕްޓެމްބަރުމަހުގެ 3 ވަނަ ދުވަހު ވިލާ އެއަރއަށް ވަނީ ބައިނަލްއަޤްވާމީ ދަތުރުތައް ކުރުމުގެ ހުއްދަ ލިބިފައެވެ. މި ދަތުރުތައް ކުރުމުގެ ހުއްދަ ދީފައިވަނީ އޭޝިއާގެ މަންޒިލްތަކަށެވެ.
ޕީއެސްއެމް ނިއުސްއަށް މައުލޫމާތުދެއްވަމުން ފްލައިމީގެ މެނޭޖިންގ ޑިރެކްޓަރ އަބްދުﷲ ނާޝިދު ވިދާޅުވީ، އިންޑިއާއަކީ ރާއްޖޭގެ ފަތުރުވެރިކަމުގައި މުހިންމު މަންޒިލެއްކަމަށާއި އެހެންކަމުން ރާއްޖޭގެ ފަތުރުވެރިކަމަށް އިތުރު ކުރިއެރުމެއް ގެނެސްދެވޭނެ ގޮތްތައް ފްލައިމީން ބަލަމުންދާކަމަށެވެ.
އަންނަ އަހަރުގެ ކުރީކޮޅު އިންޑިއާގެ 4 މަންޒިލަކަށް ފްލައިމީން ދަތުރުތައް ފެށުމަށް ހަމަޖެހިފައިވާކަމަށް ނާޝީދު ވިދާޅުވިއެވެ. އެއީ ދިއްލީ، ބެންގަލޫރު، އަހްމަދުއާބާދު، އަދި މުމްބާއީއެވެ. މި ދަތުރުތައް ކުރާނީ މާމިނގިލި އެއަރޕޯޓުންނެވެ.
މި ދަތުރުތައް ކުރުމަށް ނެރޯ ބޮޑީގެ މަތިންދާބޯޓެއް ގެނައުމުގެ މަސައްކަތް މިހާރު ކުރަމުންދާކަން އޭނާ ފާހަގަކުރެއްވިއެވެ. އަންނަ އަހަރުގެ ކުރީކޮޅު އިންޑިއާގެ 4 މަންޒިލަކަށް ދަތުރުފެށުމަށްފަހު އެއަހަރުގެ 2 ވަނަ ކުއާޓަރުގައި އިތުރު މަތިންދާބޯޓުތައް ގެނެސް ޗައިނާގެ މަންޒިލްތަކަށް ދަތުރުތައް ފެށުމަށްވެސް ވިލާ އެއަރއިން އަންނަނީ މަސައްކަތްކުރަމުންކަމަށް ނާޝިދު ވިދާޅުވިއެވެ.
އިންޑިއާގެ އިތުރުން ކޮލަންބޯގެ ބޯޑަރު ހުޅުވާލުމުން ރާއްޖެއާއި ލަންކާގެ ރަތަމަލާން އެއަރޕޯޓާއި ދެމެދު ޝެޑިއުލް ދަތުރުތައް ފެށުމަށް ފްލައިމީން އަންނަނީ ތައްޔާރުވަމުންނެވެ. ކޯވިޑް19 އަށްފަހު ގިނަ ދުވަސްތަކެއް ވަންދެން ފްލައިމީގެ ޑޮމެސްޓިކް ފްލައިޓްތައް ހުއްޓާލާފައި އޮތުމަށްފަހު މިމަހުގެ 1 ވަނަ ދުވަހު ވަނީ ޑޮމެސްޓިކް ދަތުރުތައްވެސް ފަށާފައެވެ.